ସଂଚାର ବ୍ୟୁରୋ: ଗଣେଶ ପୂଜା ଭସାଣୀ ସମୟରେ ଦୁଇ ଗୋଷ୍ଠୀ ମଧ୍ୟରେ ଝଗଡ଼ା ହୋଇଥିଲା । ଏଥିରେ ଛୁରା ମାଡରେ ଜଣେ ପ୍ରାଣ ହରାଇଥିବା ବେଳେ ତିନି ଜଣ ଗୁରୁତର ହୋଇଛନ୍ତି । କଟକ ଖୁଣ୍ଟୁଣି ଥାନା ଅନ୍ତର୍ଗତ ଧୁରୁଷିଆ ଗାଁରେ ଗଣେଷ ପୂଜା ଭସାଣୀ ସମୟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ଧୁରୁଷିଆ ଗାଁର ଗୋପାଳ ସାହି ଓ ହରିଜନ ସାହିର ଗଣେଶ ଭସାଣ ଚାଲିଥିଲା । ଏହି ସମୟରେ ଦୁଇଟି ମେଢ ମୂହାଁମୂହିଁ ହେବା ସହ ୨ ଗୋଷ୍ଠୀ ମଧ୍ୟରେ ଉତ୍ତେଜନା , ପାଟିତୁଣ୍ଡ ହୋଇଥିଲା । ଫଳରେ ଉଭୟ ଗୋଷ୍ଠୀ ମଧ୍ୟରେ ଛୁରା, ଭୁଜାଲି ମାଡ ହୋଇଥିଲା । ଏଥିରେ ୪ ଜଣଙ୍କୁ ଗୁରୁତର ଅବସ୍ଥାରେ ପ୍ରଥମେ ବ୍ରହୁପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ପରେ କଟକ ସ୍ଥାନାନ୍ତର କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଜଣେ ପ୍ରାଣ ହରାଇଛନ୍ତି ।
ଏହି ଘଟଣା ସମ୍ୱନ୍ଧରେ ଗ୍ରାମବାସୀ ପୋଲିସକୁ ଖବର ଦେଇଥିଲେ । ଅନ୍ୟପଟେ ଏହି କାରଣରୁ ଗାଁରେ ଲାଗି ରହିଛି ଉତ୍ତେଜନା । ବିନା ଅନୁମତିରେ ଚାଲିଥିଲା ଭସାଣ । ଏହି କାରଣରୁ ଗାଁରେ ପୋଲିସ ଫୋର୍ସ ମୁତୟନ ହୋଇଥିବା ବେଳେ ପୋଲିସ ୨ ଜଣକୁ ଅଟକ ରଖି ପଚରାଉଚରା କରୁଛି ।
