ସଂଚାର ବ୍ୟୁରୋ: କେନିଆର ଏକ ସ୍କୁଲ ଛାତ୍ରାବାସରେ ଭୟାବହ ଅଗ୍ନିକାଣ୍ଡ ଘଟିଛି । ଏହି ଦୁର୍ଘଟଣାରେ ୧୭ ଜଣ ଛାତ୍ରଙ୍କ ମୃତ୍ୟୁ ଘଟିଥିବା ବେଳେ ୧୩ ଜଣ ଗୁରୁତର ଆହତ ହୋଇଛନ୍ତି । ଆଜି (ଶୁକ୍ରବାର) ପୋଲିସ ଏ ସମ୍ପର୍କରେ ସୂଚନା ଦେଇଛି । ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ପୋଲିସ ଆଶଙ୍କା କରିଛି । ପୋଲିସ ମୁଖପାତ୍ର ରେସିଲା ଓନ୍ୟାଙ୍ଗୋ କହିଛନ୍ତି ଯେ, ଗୁରୁବାର ରାତିରେ ନାଇରି ଜିଲ୍ଲାର ହିଲସାଇଡ୍ ଏଣ୍ଡାରାଶା ପ୍ରାଇମେରୀରେ ଏହି ଅଗ୍ନିକାଣ୍ଡ ଘଟିଛି ଏବଂ ଏହାର କାରଣ ଜାଣିବା ପାଇଁ ଉଦ୍ୟମ ଜାରି ରହିଛି । ଆମେ ଏହାର କାରଣ ଜାଣିବାକୁ ଚେଷ୍ଟା କରୁଛୁ ଏବଂ ଆବଶ୍ୟକ ପଦକ୍ଷେପ ଗ୍ରହଣ କରିବୁ ।
ନାଇରି କାଉଣ୍ଟି କମିଶନର ପାୟସ ମୁରୁଗୁ ଏବଂ ଶିକ୍ଷା ମନ୍ତ୍ରଣାଳୟ କହିଛି ଯେ, ଅଗ୍ନିକାଣ୍ଡ ଘଟିଥିବା ଛାତ୍ରାବାସରେ ୧୫୦ ରୁ ଅଧିକ ଛାତ୍ର ରହୁଥିଲେ । ଯେହେତୁ କୋଠା ଗୁଡ଼ିକ ମୁଖ୍ୟତ କାଠ ପଟା ଦ୍ୱାରା ନିର୍ମିତ, ତେଣୁ ନିଆଁ ଅତି ଶୀଘ୍ର ବ୍ୟାପିଗଲା । ଦେଶର ମଧ୍ୟବର୍ତ୍ତୀ ପାର୍ବତ୍ୟ ଅଞ୍ଚଳରେ ରାଜଧାନୀ ନୌରୋବୀ ଠାରୁ ୨ଶହ କିଲୋମିଟର ଉତ୍ତରରେ ଅବସ୍ଥିତ ଏହି ବିଦ୍ୟାଳୟରେ ମୋଟ ୮୨୪ ଛାତ୍ର ଅଧ୍ୟୟନ କରନ୍ତି। ନାଇରୋବିରେ ସାଧାରଣତଋ କାଠରେ ନିର୍ମିତ କୋଠା ଗୁଡିକ ଥାଏ । ତେବେ ଦେଶର ରାଷ୍ଟ୍ରପତି ୱିଲିୟମ୍ ରୁଟୋ ଏହି ଖବରକୁ ଭୟଙ୍କର ବୋଲି ବର୍ଣ୍ଣନା କରିଛନ୍ତି । ସେ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଲେଖିଛନ୍ତି ଯେ ମୁଁ ଏହି ଭୟଙ୍କର ଘଟଣାର ପୁଙ୍ଖାନୁପୁଙ୍ଖ ଅନୁସନ୍ଧାନ କରିବାକୁ ସମ୍ପୃକ୍ତ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଉଛି। ଯେଉଁମାନେ ଦାୟୀ ହେବେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
