ମୋଟାପଣକୁ ନେଇ ବହୁ ଲୋକ ଚିନ୍ତାରେ ପଡିଯାନ୍ତି । ଏହି ମୋଟାପଣ ସମସ୍ତଙ୍କ କ୍ଷେତ୍ରରେ ଦେଖାଦେଇଥାଏ । ଛୋଟ ଛୁଆ ଠାରୁ ଆରମ୍ଭ କରି ବଡ ଲୋକମାନଙ୍କ କ୍ଷେତ୍ରରେ ବି ଦେଖାଦେଇ ଥାଏ । ଖାସ୍ କରି ମୋଟାପଣକୁ ନେଇ ମହିଳାମାନେ ଅଧିକ ଚିନ୍ତିତ ହୁଅନ୍ତି । କାରଣ ଅଧିକାଂଶ ମହିଳାମାନେ ଜିମ୍ ଯାଇ ପାରନ୍ତି ନାହିଁ ଅଥାର୍ତ ତାଙ୍କ ପାଖରେ ସମୟ ନଥାଏ । ଯଦି ଆପଣ ମଧ୍ୟ ଓଜନ କମ୍ କରିବାକୁ ଚାହୁଁଛନ୍ତି ଏବଂ ଜିମ୍ ଯିବାକୁ କଷ୍ଟମନେ କରୁଛନ୍ତି, ତେବେ ଘରେ କିଛି କାମ କରି ନିଜ ଓଜନକୁ ନିୟନ୍ତ୍ରଣ କରିପାରିବେ । ସମସ୍ତେ ନିଜ ଓଜନ ବିଷୟରେ ସଚେତନ ହେବା ଉଚିତ, କାରଣ ଏହା କେବଳ ବ୍ୟକ୍ତିତ୍ୱ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ନୁହେଁ, ବରଂ ସୁସ୍ଥ ରହିବା ପାଇଁ ଓଜନକୁ ନିୟନ୍ତ୍ରଣ କରିବା ମଧ୍ୟ ଆବଶ୍ୟକ । ତେଣୁ ଓଜନକୁ କିପରି ନିୟନ୍ତ୍ରଣ କରିବେ ଆସନ୍ତୁ ଜାଣିବା ।
ସର୍ବ ପ୍ରଥମେ ଏହି କାମ କରନ୍ତୁ :
ଯଦି ଆପଣଙ୍କର ଓଜନ କଣ୍ଟ୍ରୋଲ କରିବାକୁ ଚାହୁଁଛନ୍ତି, ତେବେ ପ୍ରଥମେ ଖାଇବା କଣ୍ଟ୍ରୋଲ କରନ୍ତୁ । ଏହା ଅର୍ଥ ନୁହେଁ ଯେ ଆପଣ ଖାଇବା ବନ୍ଦ କରି ଦେବେ ବରଂ ଅସ୍ୱାସ୍ଥ୍ୟକର ଖାଦ୍ୟ ଖାଇବେ ନାହିଁ । ଯେପରିକି ମଇଦାରେ ତିଆରି ହେଉଥିବା ଖାଦ୍ୟ, ଅଧିକ ତେଲ ଯୁକ୍ତ ଖାଦ୍ୟ ଏବଂ ଅଧିକ ମିଠା ଜାତୀୟ ଜିନିଷ ଠାରୁ ଦୂରେଇ ରୁହନ୍ତୁ । ଯାହା ଆପଣଙ୍କ ପାଇଁ ଲାଭଦାୟକ ହେବ ।
ପାହାଚ ଚଢ଼ିବା :
ଓଜନ କମ୍ କରିବାରେ ସର୍ବତ୍ତମ ଉପାୟ ହେଉଛି ଘରେ ସିଢ଼ି ଚଢ଼ିବା । ଯଦି ଆପଣ ଅଫିସ କିମ୍ବା ସପିଂ ମଲ୍ ଯାଉଛନ୍ତି ତେବେ ଲିଫ୍ଟ ବଦଳରେ ସିଢ଼ି ଚଢ଼ିଯାଆନ୍ତୁ । ଏହା ଅନେକ କ୍ୟାଲୋରୀକୁ କମ୍ କରେ । ଏହା ସହ ସବୁଦିନ ସକାଳୁ ଉଠିବା ପରେ ଘରେ ସିଢ଼ି ଚଢ଼ଇବା ଆରମ୍ଭ କରନ୍ତୁ, ଯାହା ଆପଣଙ୍କ ଓଜନକୁ କମ୍ କରିବାରେ ସାହାଯ୍ୟ କରିବ ।
ଖାଇବା ପରେ ବୁଲିବା :
ଓଜନକୁ କମ୍ କରିବା ପାଇଁ ଖାଦ୍ୟ ସଠିକ୍ ଭାବରେ ହଜମ ହେବା ଅତ୍ୟନ୍ତ ଜରୁରୀ । ଖାଇବା ପରେ ଗୋଟିଏ ସ୍ଥାନରେ ବସିକି ରହିବା କିମ୍ବା ସଙ୍ଗେ ସଙ୍ଗେ ଶୋଇପଡିବା ଏହା କରିବା ଦ୍ୱାରା ଓଜନ ବଢ଼ିଯାଏ । ତେଣୁ ଖାଇବା ପରେ କିଛି ସମୟ ବୁଲାବୁଲି କରନ୍ତୁ, ଯାହା ଖାଦ୍ୟକୁ ଶୀଘ୍ର ହଜମ କରିବା ସହ ଓଜନକୁ ନିୟନ୍ତ୍ରଣ କରିବ ।
ସ୍କିପିଙ୍ଗ୍ କରିବା ଦ୍ୱାରା କ୍ୟାଲୋରି କମ୍ ହୋଇଥାଏ :
ଯଦି ଘରେ ନିଜ ଓଜନକୁ କମ୍ କରିବା ପାଇଁ ଚାହୁଁଛନ୍ତି ତେବେ, ସବୁଦିନ ସ୍କିପିଙ୍ଗ୍ କରନ୍ତୁ । ଏହି ସ୍କିପିଙ୍ଗ ଏକ ଭଲ ବ୍ୟାୟାମ ଅଟେ । ସ୍କିପିଙ୍ଗ କରିବା ଦ୍ୱାରା ସମଗ୍ର ଶରୀର ବ୍ୟାୟାମ୍ ହୁଏ, ଯାହା କେବଳ କ୍ୟାଲୋରି ବର୍ଣକୁ ନୁହେଁ ବରଂ ଶରୀରକୁ ଶକ୍ତି ଯୋଗାଇଥାଏ ଏବଂ ମାଂସପେଶୀକୁ ଟୋନ୍ କରିଥାଏ ।
ବଗିଚା କାମ କରିବା ଦ୍ୱାରା ପୁରା ଶରୀର ହେବ ଏକ୍ସରସାଇଜ୍ :
ଯଦି ଆପଣଙ୍କ ଘରେ ବଗିଚା ଅଛି ତେବେ ଖାଲି ନବସି ବଗିଚାରେ କିଛି ସମୟ କାମ କରନ୍ତୁ । ଏହା ସମଗ୍ର ଶରୀରକୁ ଭଲ ବ୍ୟାୟାମ ଦେଇଥାଏ ଏବଂ ମାନସିକ ସ୍ତରରେ ଅଧିକ ଖୁସି ହେବା ସହ ନିଜକୁ ଆକ୍ଟିଭି ମଧ୍ୟ ଅନୁଭବ କରିପାରିବେ ।
ଘର କାମ କରି ନିଜକୁ ଆକ୍ଟଭି ରଖନ୍ତୁ :
ଓଜନ କମ୍ କରିବାକୁ ହେଲେ ଘରର ସମସ୍ତ କାର୍ଯ୍ୟ କରିବା ଉଚିତ୍ । ଘର କାମ କରିବା ଦ୍ୱାରା ଶରୀର ଏକ୍ସରସାଇଜ୍ ହେବା ସହ ରିଲାକ୍ସ ମଧ୍ୟ ଅନୁଭବ କରିପାରିବେ । ଏପରି କିଛି କାମ ଅଛି ଯାହା ମେସିନ୍ ଦ୍ୱାରା କରାଯାଏ, ଯେମିତିକି ଓ୍ୱାସିଙ୍ଗ ମେସିନ୍, ଟେଲର, ରୁଟି ମେକିଂ ଇତ୍ୟାଦି । ଯଦି ଆପଣ ଏହି ସବୁ କାର୍ଯ୍ୟକୁ ମେସିନ୍ ଦ୍ୱାରା କରୁଛନ୍ତି ତେବେ ଏହାକୁ ବନ୍ଦ କରନ୍ତୁ ଏବଂ ହାତରେ ତାହା କରନ୍ତୁ । ଯାହା ଦ୍ୱାରା ଆପଣଙ୍କ ଓଜନ କମ୍ ହେବ ।
ଜାଣିରଖନ୍ତୁ ଯେ, ଯଦି ଆପଣ ଓଜନ କମ୍ କରିବାକୁ ଚାହୁଁଛନ୍ତି ଏବଂ କୌଣସି କଷ୍ଟକର କାମ କରିପାରୁ ନାହାନ୍ତି, ତେବେ ଘରେ ଏହି ଭଳି ସହଜ କାମ କରି ନିଜର ଓଜନକୁ ନିୟନ୍ତ୍ରଣ କରିପାରିବେ ।
