ନିର୍ବାଚନ ହାରିବା ପରେ ତୃଣମୂଳ କଂଗ୍ରେସରେ କିଛି ଠିକ୍ ଚାଲିନି । ମମତା ବାନାର୍ଜୀଙ୍କୁ ଖାତିର କରୁ ନାହାଁନ୍ତି ଦଳର ବିଧାୟକ ଏବଂ ସାଂସଦ । ବୈଠକକୁ ଆସୁ ନାହାଁନ୍ତି । ଦଳରେ ଗୋଷ୍ଠୀ କନ୍ଦଳ ତୀବ୍ର ହେଲାଣି । ମମତାଙ୍କ ହାତରୁ ନେତୃତ୍ୱ ଖସିବାକୁ ବସିଲାଣି । କେବଳ ପଶ୍ଚିମବଙ୍ଗ ନୁହେଁ ବରଂ ଦିଲ୍ଲୀରେ ମଧ୍ୟ ଟିଏମସିର ନୂଆ ବିଦ୍ରୋହ ମୁଣ୍ଡ ଟେକିଛି ।
ରିପୋର୍ଟ ଅନୁସାରେ, ଋତବ୍ରତ ବାନାର୍ଜୀଙ୍କ ନେତୃତ୍ୱରେ୬୦ରୁ ଅଧିକ ବିଧାୟକ ମମତାଙ୍କ ବିରୋଧରେ ବିଦ୍ରୋହ ଆରମ୍ଭ କରିଛନ୍ତି । ଟିଏମସି ପ୍ରଥମ ଥର ଏତେ ବଡ ଆଭ୍ୟନ୍ତରୀଣ କନ୍ଦଳର ସମ୍ମୁଖୀନ ହୋଇଛି । ତେବେ ଏହି ବିଦ୍ରୋହ ସଂସଦ ଯାଏଁ ପହଁଚିଗଲାଣି । ସାଂସଦ ସୁଖେନ୍ଦୁ ଶେଖର ରୟ ଏନେଇ ବୟାନ ରଖିଛନ୍ତି ।
ସେ କହିଛନ୍ତି ଯେ, କମ୍ ସମୟରେ ଅଧିକରୁ ଅଧିକ ବିଧାୟକ ମମତାଙ୍କ ହାତ ଛାଡିଛନ୍ତି । ଲୋକସଭାରେ ସମାନ ସ୍ଥିତି ଦେଖିବାକୁ ମିଳିବ । ରାଜ୍ୟସଭାରେ ମଧ୍ୟ ଏପରି ସମ୍ଭାବନାକୁ କେହି ଏଡାଇ ଦେଇପାରିବେ ନାହିଁ । ଅନ୍ୟ ଦିଗରେ ବରିଷ୍ଠ ଟିଏମସି ସାଂସଦ ସୌଗତ ରୟ ମମତାଙ୍କ ସପକ୍ଷରେ ବାହାରି କୌଣସି କନ୍ଦଳ ଏବଂ ବିଦ୍ରୋହର ଚର୍ଚ୍ଚାକୁ ଖଣ୍ଡନ କରିଛନ୍ତି । ମମତା ଖୁବ୍ ଶୀଘ୍ର ସମସ୍ତ ସମସ୍ୟାର ସମାଧାନ କରିବେ ବୋଲି ସେ କହିଛନ୍ତି ।
ତେବେ ବାରାସାତ୍ ସାଂସଦ କାକୋଲି ଘୋଷଙ୍କୁ ନେଇ ଅଧିକ ଚର୍ଚ୍ଚା ହେଉଛି । କାରଣ ଦଳରେ ସେ ସନ୍ତୁଷ୍ଟ ନାହାଁନ୍ତି । ଲୋକସଭାରେ ଦଳର ମୁଖ୍ୟ ସଚେତକ ପଦରୁ ହଟାଯିବା ପରେ ସେ ଖୋଲାଖୋଲି ବିଦ୍ରୋହ ଆରମ୍ଭ କରିଛନ୍ତି । ତେବେ ଗତ ଦୁଇ ଦିନ ମଧ୍ୟରେ ମମତା ଅନେକ ଅସନ୍ତୁଷ୍ଟ ବିଧାୟକ ଏବଂ ସାଂସଦଙ୍କ ସହ କଥା ହୋଇଥିବା କୁହାଯାଉଛି । ସମସ୍ୟା ଜଟିଳ ହେବା ପୂର୍ବରୁ ଏହାର ସମାଧାନ ପାଇଁ ମମତା ଉଦ୍ୟମ କରୁଛନ୍ତି । ସଂସଦରେ ଦୁଇ ସବୁଠୁ ବିଶ୍ୱସ୍ତ ସାଂସଦଙ୍କୁ ଅନ୍ୟ ସାଂସଦଙ୍କ ସହ ଲଗାତାର ଆଲୋଚନା କରିବାକୁ ଦାୟିତ୍ୱ ଦିଆଯାଇଛି ।
ଏବେ ଟିଏମସି ପାଖରେ ଲୋକସଭାରେ୨୮ସାଂସଦ ଏବଂ ରାଜ୍ୟସଭାରେ୧୩ଜଣ ସାଂସଦ ଅଛନ୍ତି । ଯଦି ଦୁଇ ତୃତୀୟାଂଶ ସାଂସଦ କୌଣସି ଅନ୍ୟ ଦଳକୁ ଯାଆନ୍ତି ତାହାଲେ ସେମାନଙ୍କ ସଦସ୍ୟତା ରବ୍ଦ ହେବ ନାହିଁ । ପ୍ରଥମେ ଋତବ୍ରତ ଗୋଷ୍ଠୀର ଅନେକ ସାଂସଦ ନିଜକୁ ପ୍ରକୃତ ଟିଏମସି କହୁଛନ୍ତି । ସେମାନେ ମମତାଙ୍କଠୁ ଭିନ୍ନ ହୋଇପାରନ୍ତି । ଦ୍ୱିତୀୟରେ ଏହି ସାଂସଦମାନେ ଅନ୍ୟ କୌଣସି ଦଳ ସହ ବିଲୟ କରିବା ନେଇ ମଧ୍ୟ ଚର୍ଚ୍ଚା ହେଉଛି ।
ଅନ୍ୟ ଦିଗରେ ଦଳର ଚିହ୍ନ ଏବଂ ସଙ୍ଗଠନ ଉପରେ ଦାବି କେବଳ ବିଧାୟକ ଏବଂ ସାଂସଦଙ୍କ ସଂଖ୍ୟାରେ ସ୍ଥିର ହେବ ନାହିଁ । ଏଥିପାଇଁ ନିର୍ବାଚନ ଆୟୋଗଙ୍କ ଆଗରେ ପ୍ରକୃତ ବହୁମତ କାହା ପାଖରେ ଅଛି ପ୍ରମାଣିତ କରିବାକୁ ହେବ । ସେ ଯାହା ବି ହେଉ ନା କାହିଁକି ପଶ୍ଚିମବଙ୍ଗରେ ଟିଏମସିର କନ୍ଦଳ ଏବେ କେବଳ ବିଧାନସଭାରେ ସୀମିତ ନଥିବା ସ୍ପଷ୍ଟ ହୋଇ ସାରିଛି ।
