ଫୁଲୁଛି ନଦୀ, ବଢ଼ୁଛି ବନ୍ୟା ଆଶଙ୍କା । ଉବୁଟୁବୁ ଉତ୍ତର ଓଡ଼ିଶା । ଉଛୁଳୁଛି ବୈତରଣୀ, ବୁଢାବଳଙ୍ଗ, ସାଳନ୍ଦୀ ଓ ଜଳକା । ବାଲେଶ୍ବର, ଭଦ୍ରକ, ଯାଜପୁର , ମୟୂରଭଞ୍ଜ ଓ କେନ୍ଦୁଝରର ଅନେକ ଅଞ୍ଚଳରେ ଜଳମଗ୍ନ ହୋଇଛି । ବୈତରଣୀରେ ଦ୍ୱିତୀୟ ବନ୍ୟା । ନଦୀରେ ପାଣି ବଢ଼ୁଥୁବାରୁ ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ଓଲଗ ପଞ୍ଚାୟତର ବୋଡ଼କ ଠାରେ କୂଳ ଲଙ୍ଘିଛି ବୈତରଣୀ । ସାଠିବାଙ୍କୁଡ଼ା ଠାରୁ ବୋଡ଼କ ରାସ୍ତାରେ ତିନୋଟି ସ୍ଥାନରେ ଦୁଇ ଫୁଟର ବନ୍ୟା ପାଣି ପ୍ରବାହିତ ହେଉଛି । ଫଳରେ ଆରଡ଼ିରୁ କଟକ, ଯାଜପୁର, ଭୁବନେଶ୍ଵରକୁ ଗାଡି ଚଳାଚଳ ବାଧାପ୍ରାପ୍ତ ହୋଇଛି ।
ଯାଜପୁର , କୋରେଇ ଓ ଦଶରଥପୁର ବ୍ଲକ ବିଶେଷ ଭାବେ ପ୍ରଭାବିତ । ଦଶରଥପୁର ବ୍ଲକ ଜୟନ୍ତରାରେ ସୁଇଚ ଗେଟ ପାଇଁ ନିର୍ମାଣଧୀନ ବନ୍ଧ ଗତକାଲି ରାତିରେ ଭାଙ୍ଗିଯାଇ ଅନେକ ଗ୍ରାମରେ ବନ୍ୟା ଜଳ ପ୍ରବେଶ କରିଛି । ମାଲାନ୍ଦପୁରରେ ପାଣି ଭୟଙ୍କର ପରିସ୍ଥିତି ସୃଷ୍ଟି ହୋଇଛି । ଯାଜପୁର-ଛତାଵର ରାସ୍ତାର ପଣସା ନିକଟରେ ଚାଲିଛି ୩ଫୁଟର ପାଣି । ଫଳରେ ଯାଜପୁର ଭଦ୍ରକ ଯୋଗାଯୋଗ ବିଛିନ୍ନ ହୋଇଛି । ଦଶରଥପୁର ବ୍ଳକର ୧୦ଟି ପଂଚାୟତର ୫୦ରୁ ଉର୍ଦ୍ଧ୍ବ ପଂଚାୟତରେ ବନ୍ୟାଜଳ ପ୍ରବେଶ କରିଛି। ଅନେକ ଅଞ୍ଚଳରେ ଲୋକେ ଜଳବନ୍ଦୀ । ନଦୀକୂଳିଆ ଲୋକେ ଏହି ବନ୍ୟା କୁ ନେଇ ଭୟଭୀତ ହେଉଥିବା ଦେଖିବାକୁ ମିଳିଛି। ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ନଦୀ କୂଳିଆ ଅଞ୍ଚଳରେ ମାଇକିଙ୍ଗ କରାଯିବା ସହ ତଳିଆ ଅଞ୍ଚଳବାସୀଙ୍କୁ ଆଶ୍ରୟ ସ୍ଥଳକୁ ସ୍ଥାନାନ୍ତରିତ କରାଯାଇଛି। ଲଗାଣ ବର୍ଷା ପାଇଁ ଯାଜପୁର ଜିଲ୍ଲାର ସମସ୍ତ ସରକାରୀ ଓ ବେସରକାରୀ ବିଦ୍ୟାଳୟ ଓ ଉଚ୍ଚ ମାଧ୍ୟମିକ ବିଦ୍ୟାଳୟ କୁ ଆଜି ପାଇଁ ଛୁଟି ଘୋଷଣା କରିଛନ୍ତି ଜିଲ୍ଲାପାଳ।ବନ୍ୟା ମୁକାବିଲା ପାଇଁ ପ୍ରଶାସନିକ ସ୍ତରରେ ତତ୍ପରତା ପ୍ରକାଶ ପାଇଛି । ବନ୍ୟା ମୁକାବିଲା ପାଇଁ ଜିଲ୍ଲା ପ୍ରଶାସନ ପ୍ରସ୍ତୁତ ବୋଲି ଜିଲ୍ଲାପାଳ କହିଛନ୍ତି । ବନ୍ୟା ମୁକାବିଲା ପାଇଁ ବରିଷ୍ଠ ଆଏସ ତଥା ପୂର୍ବତନ ଜିଲ୍ଲାପାଳ ପି ଅନ୍ୱେସା ଯାଜପୁର ଜିଲ୍ଲାର ବିଭିନ୍ନ ବନ୍ୟାଞ୍ଚଳ ପରିଦର୍ଶନ କରିଛନ୍ତି ।
ସେହିପରି ଜଗତସିଂହପୁର ଜିଲ୍ଲାରେ ଲଗାଣ ବର୍ଷା ଜାରି । ବର୍ଷା ପାଣିରେ ବୁଡ଼ି ରହିଛି ହଜାର ହେକ୍ଟର ଚାଷ ଜମି । ଚାଷ ଜମି ଜଳମଗ୍ନ ଥିବା ବେଳେ ତଳି ଶଢ଼ିବାରେ ଲାଗିଲାଣି । ଫଳରେ ଚାଷ କାର୍ଯ୍ଯ ବିଳମ୍ବ ହେବା ସହ ଏକ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ହଠାତ ମହାନଦୀର ଜଳସ୍ତର ବୃଦ୍ଧି ପାଇବା ଫଳରେ ଗାଁରେ ପଶିଥିଲା ବନ୍ୟା ପାଣି । ରାତିଅଧରେ ପାଣି ମାଡି ଆସିବା ଫଳରେ ଲୋକମାନେ ଜୀଵନ ବଞ୍ଚାଇବା ପାଇଁ ଘର ଦ୍ୱାର ଛାଡି ଉଚ୍ଚ ସ୍ଥାନ କୁ ଦୌଡ଼ି ଥିଲେ। ପାଣିରେ ଭାସିଥିଲେ ଘରର ସମସ୍ତ ଆସବାବପତ୍ର । ପିଲାଛୁଆ ଧରି ଜଳବନ୍ଦୀ ହୋଇ ରହିଛନ୍ତି ଗାଁଲୋକ।
