ବାତ୍ୟାର ସୁଯୋଗ ନେଇ ମୋବାଇଲ୍ ଶୋ’ରୁମ୍ରୁ ପ୍ରାୟ ୨୦ ଲକ୍ଷ ଟଙ୍କାର ୪୦ଟି ଦାମୀ ମୋବାଇଲ୍ ଫୋନ୍ ଲୁଟ୍ ହୋଇଥିବା ଘଟଣା ରାଜଧାନୀରେ ଚାଞ୍ଚଲ୍ୟ ସୃଷ୍ଟି କରିଛି । ଖଣ୍ଡଗିରି ସ୍ଥିତ ‘ଫୋନ୍ ବାଲା’ ନାମକ ମୋବାଇଲ୍ ଶୋ’ରୁମ୍ରେ ଏହି ଲୁଟ୍ ହୋଇଛି । ଲୁଟେରାମାନେ କେବଳ ଦାମୀ ମୋବାଇଲ୍ ଫୋନ୍ ନୁହେଁ, ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ କମ୍ପ୍ୟୁଟର୍ ହାର୍ଡ ଡିସ୍କ, ସିସିଟିଭି କ୍ୟାମେରା ଓ ଡିଭିଆର୍ ମଧ୍ୟ ଖୋଲି ନେଇଛନ୍ତି ।
ସୂଚନା ଅନୁଯାୟୀ, ଶୋ’ରୁମ୍ର ମାଲିକ ଜୀବନଜ୍ୟୋତି ବେହେରା ମଙ୍ଗଳବାର ବିଳମ୍ବିତ ରାତିରେ ଦୋକାନ ବନ୍ଦ କରି ଘରକୁ ଫେରିଥିଲେ । ତେବେ ବୁଧବାର ସକାଳେ ଦୋକାନ ଖୋଲିବା ପରେ ସେ ଭିତରର ଦୃଶ୍ୟ ଦେଖି ସ୍ତବ୍ଧ ହୋଇଯାଇଥିଲେ । ଦୋକାନରେ ଥିବା ସମସ୍ତ ନୂଆ ମୋବାଇଲ୍ ଫୋନ୍ ଗାଏବ ହୋଇଯାଇଥିଲା । ଯାଞ୍ଚ କରିବା ପରେ ପ୍ରାୟ ୪୦ଟି ଦାମୀ ମୋବାଇଲ୍ ଫୋନ୍ ଚୋରି ହୋଇଥିବା ଜଣାପଡ଼ିଥିଲା । ଚୋରି ହୋଇଥିବା ମୋବାଇଲ୍ଗୁଡ଼ିକର ଆନୁମାନିକ ମୂଲ୍ୟ ପ୍ରାୟ ୨୦ ଲକ୍ଷ ଟଙ୍କା ହେବ ।
ଘଟଣା ପରେ ଦୋକାନ ମାଲିକ ଜୀବନଜ୍ୟୋତି ବେହେରା ଭରତପୁର ଥାନାରେ ପହଞ୍ଚି ଏ ସମ୍ପର୍କରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ବାତ୍ୟା ଯୋଗୁଁ ରାତିରେ ସହରରେ ଜନଶୂନ୍ୟ ପରିବେଶ ଓ ଅନ୍ଧାରର ସୁଯୋଗ ନେଇ ଦୁର୍ବୃତ୍ତମାନେ ଏହି ଲୁଟ୍ କରିଥିବା ସନ୍ଦେହ କରାଯାଉଛି । ଲୁଟେରାଙ୍କୁ ଚିହ୍ନଟ କରିବା ପାଇଁ ପୋଲିସ ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିବା ସହ ବିଭିନ୍ନ ଦିଗରୁ ଛାନ୍ଭିନ୍ ଜାରି ରଖିଛି । ଏହି ଘଟଣାରେ ସମ୍ପୃକ୍ତ ଲୁଟେରାମାନଙ୍କୁ ଶୀଘ୍ର ଧରିବା ସହ ଚୋରି ସାମଗ୍ରୀ ଉଦ୍ଧାର କରିବା ପୋଲିସ ପାଇଁ ଏବେ ଚ୍ୟାଲେଞ୍ଜ ହୋଇଛି ।
