ମାଡ଼ି ଆସୁଛି ବଡ଼ ବନ୍ୟା । ଆଜି ସଂଧ୍ୟା ସୁଦ୍ଧା ଭାସିବ ଉତ୍ତର ଉପକୂଳ । ସାଳନ୍ଦୀ, ଜଳକା ଓ ବୈତରଣୀରେ ସନ୍ଧ୍ୟା ସୁଦ୍ଧା ଆସିବ ବନ୍ୟା ପାଣି । ଏହି ସୂଚନା ଦେଇଛନ୍ତି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ ରାଉତ । ଆଜି ସନ୍ଧ୍ୟା ସୁଦ୍ଧା ଜଳକା, ଶାଳନ୍ଦୀ ଓ ବୈତରଣୀ ନଦୀରେ ବନ୍ୟା ସମ୍ଭାବନା ଅଛି । ସନ୍ଧ୍ୟା ସୁଦ୍ଧା ବୈତରଣୀରେ ବଡ଼ ବନ୍ୟା ହୋଇପାରେ । ବନ୍ୟା ପାଣି ଯୋଗୁ ଭଦ୍ରକରେ ୱାଟର ଲଗିଂ ହୋଇପାରେ ।
ତେବେ ଆସନ୍ତା ୨୪ ଘଣ୍ଟା ପରେ ପାଣି କମିବ । ପ୍ରଭାବିତ ଅଞ୍ଚଳରେ ଲୋକଙ୍କୁ ତୁରନ୍ତ ସ୍ଥାନାନ୍ତର କରାଯିବ । ବନ୍ୟାରେ ଧାମନଗର, ଦଶରଥପୁର, ଚାନ୍ଦବାଲି ବେଶୀ ପ୍ରଭାବିତ ହେବ । ଚାଷ ଜମି ପାଣିରେ ବୁଡ଼ିବ । ଜଳକା ନଦୀ ମାଖନୀ ବ୍ରିଜ ପାଖରେ ସନ୍ଧ୍ୟା ସୁଦ୍ଧା ୬.୮ରୁ ୭ ମିଟର ପର୍ଯ୍ୟନ୍ତ ପାଣି ବଢ଼ିପାରେ ।
ଗତ ସନ୍ଧ୍ୟାରେ ମହାନଦୀରେ ପିକ୍ ଫ୍ଲଡ୍ ହୋଇଥିଲା । ଯାହା ଆଜି ୧୨ଟା ସୁଦ୍ଧା କମିଛି । ମୁଣ୍ଡଳୀରେ ଜଳସ୍ତର କମୁଛି । ପୁରୀ, ଜଗତସିଂହପୁର, କେନ୍ଦ୍ରାପଡ଼ାରେ ୱାଟର ଲଗିଂ ହୋଇପାରେ । ବର୍ତ୍ତମାନ ହୀରାକୁଦର ଦୁଇଟି ଗେଟ୍ ଖୋଲା ଅଛି ।
ସେପଟେ ଗଭୀର ଅବପାତ ପ୍ରଭାବରେ ପ୍ରବଳରୁ ଅତିପ୍ରବଳ ବର୍ଷା ଯୋଗୁ ଉତ୍ତର ଓଡ଼ିଶା ବେଶୀ ପ୍ରଭାବିତ ହୋଇଛି । ବାଲେଶ୍ୱର ଜିଲ୍ଲା ନୀଳଗିରିରେ ସର୍ବାଧିକ ବର୍ଷା ହୋଇଛି । ମୟୂରଭଞ୍ଜ ଓ ବାଲେଶ୍ୱରରେ ଅଧିକ ବର୍ଷା ହୋଇଛି ।
