ସଂଚାର ବ୍ୟୁରୋ: ମିଳିଲା ନାହିଁ ଆମ୍ବୁଲାନ୍ସ । ଶବକୁ କାନ୍ଧରେ ବୋହି ୧୦ କିଲୋମିଟର ନିଜ ଗାଁକୁ ନେଲେ ମହିଳା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଦାରିଙ୍ଗବାଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ। ଦାରିଙ୍ଗବାଡି ଥାନା କାଜୁରୀ ବାଦେରୀ ଗାଁର ସୁରେନ୍ଦ୍ର ପ୍ରଧାନଙ୍କ ସ୍ତ୍ରୀ ସୁନିମା ପ୍ରଧାନ ୬ ମାସର ଗର୍ଭବତୀ ଥିଲେ। ପ୍ରସବ ବେଦନା ହେବାରୁ ସ୍ବାମୀ ତାଙ୍କୁ ଦାରିଙ୍ଗବାଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । ରୋଗ ପରୀକ୍ଷା ନକରି ଡାକ୍ତର ୨ଟି ଇଞ୍ଜେକ୍ସନ ଏବଂ ଗୋଟିଏ ସାଲାଇନ ଦେବାରୁ ସୁନିମା ପ୍ରଧାନ ଏବଂ ପେଟରେ ଥିବା ୬ ମାସର ଶିଶୁର ମୃତ୍ୟୁ ହୋଇଯାଇଥିଲା । ଶବକୁ ପୋଷ୍ଟମର୍ଟମ କରିବା ପାଇଁ ସକାଳ ୬ଟାରୁ ୧୨ଟା ଯାଏଁ ଅପେକ୍ଷା କରିଥିଲେ ସୁଦ୍ଧା କୌଣସି ବ୍ୟବସ୍ଥା କରାଯାଇ ନଥିଲା। ଫଳରେ ମହିଳାମାନେ ୧୦ କିଲୋମିଟର ଦୂର କାଜୁରୀ ବାଦେରୀ ଗାଁକୁ ଶବ କାନ୍ଧରେ ବୋହି ନେଇଥିଲେ।
