ସଂଚାର ବ୍ୟୁରୋ: ମହିଳା ଟି-୨୦ ବଶ୍ବକପରେ ଟିମ ଇଣ୍ଡିଆ ଆଜିଠାରୁ ଅଭିଯାନ ଆରମ୍ଭ କରିବ। ଆଜି ନୁଜିଲାଣ୍ଡକୁ ଭେଟିବ ଭାରତ। ଗତବର୍ଷ ଭାରତ ସେମିଫାଇନାଲରେ ପରାଜିତ ହୋଇଥିଲା। ମହିଳା କ୍ରିକେଟରେ ଭାରତ ଏକ ଶକ୍ତିଭାବେ ବିବେଚିତ ହେଉଥିଲେ ମଧ୍ୟ ସୀମିତ ଓଭରରେ ଆଦୌ ଟାଇଟଲ ନ ଜିତିବା ଦଳକୁ ଶୀର୍ଷସ୍ଥାନକୁ ନେଇପାରି ନାହିଁ। ଅମୋଲ ମଜୁମଦାର ପ୍ରଶିକ୍ଷକ ଦାୟିତ୍ୱ ନେବା ପରେ ଚାପକୁ କିପରି ମୁକାବିଲା କରିବାକୁ ହେବ ତାହା ଉପରେ ଗୁରୁତ୍ୱ ଦେଇଛନ୍ତି। ଖେଳାଳିମାନଙ୍କୁ ମନସ୍ତତ୍ତ୍ୱବିତ୍ଙ୍କ ସହାୟତାରେ ପ୍ରସ୍ତୁତ କରିଛନ୍ତି। ବିଭିନ୍ନ ସ୍ଥାନରେ ପ୍ରଶିକ୍ଷଣ ଶିବିରମାନ ଆୟୋଜନ କରିଛନ୍ତି। ତଥାପି ଦଳ ଏସିଆ କପ୍ ଫାଇନାଲରେ ଶ୍ରୀଲଙ୍କା ନିକଟରୁ ପରାଜିତ ହେବା ଦଳର ଆତ୍ମବିଶ୍ୱାସକୁ ଆଘାତ ପହଞ୍ଚାଇଛି। ଏହି ମ୍ୟାଚ୍ରେ ହାରିବା ପରେ ଭାରତ ଏବେ ଆଉ ଏକ ବଡ଼ ଟୁର୍ଣ୍ଣାମେଣ୍ଟରେ ଖେଳିବାକୁ ଯାଉଛି।
ଭାରତ ଆଜି ଗ୍ରୁପ୍-ଏ’ରେ ପ୍ରଥମ ମ୍ୟାଚ୍ ନ୍ୟୁଜିଲାଣ୍ଡ ସହ ଖେଳିବ। ଚଳିତବର୍ଷ ଭାରତ ଏହି ପ୍ରତିଯୋଗିତାର ଦୁଇ ଶକ୍ତିଶାଳୀ ଦଳ ଇଂଲଣ୍ଡ ଓ ଅଷ୍ଟ୍ରେଲିଆକୁ ୩ ଥର ଲେଖାଏଁ ପରାସ୍ତ କରିଛି। ଚେନ୍ନଇରେ ଦଳ ଦକ୍ଷିଣ ଆଫ୍ରିକା ପ୍ରଦତ୍ତ ୧୯୦ ପ୍ଲସ୍ ଟାର୍ଗେଟକୁ ହାସଲ କରିଛି। କହିବାକୁ ଗଲେ ଦଳ ଭଲ ଫର୍ମରେ ରହିଛି। ଗତ ବିଶ୍ୱକପ୍ ଖେଳିଥିବା ଭାରତୀୟ ଦଳର ୧୦ଜଣ ଖେଳାଳି ଏଥର ସ୍ଥାନ ବଜାୟ ରଖିଛନ୍ତି। ଏଭଳି ସ୍ଥିତିରେ ଭାରତ ନିକଟରେ ଯେପରି ଅଭିଜ୍ଞତା ରହିଛି, ସେହିପରି ପ୍ରତିଭା ମଧ୍ୟ ଅଛି। ଏଣୁ ହରମନପ୍ରୀତ କୌର କିପରି ନିଜର ଖେଳାଳିମାନଙ୍କୁ ବ୍ୟବହାର କରିବେ ତାହା ଟୁର୍ଣ୍ଣାମେଣ୍ଟରେ ଜଣାପଡ଼ିବ।
