ଉତ୍ତରପ୍ରଦେଶର ଚର୍ଚ୍ଚିତ ‘ନୀଳ ଡ୍ରମ୍ ହତ୍ୟାକାଣ୍ଡ’ର ଦୋଷୀ ମୁସ୍କାନ ରସ୍ତୋଗୀ ଏବଂ ନିଜ ସ୍ୱାମୀଙ୍କ ହତ୍ୟାକୁ ସାପ କାମୁଡ଼ାରେ ମୃତ୍ୟୁ ହୋଇଥିବା ଭଳି ଦେଖାଇବା ମାମଲାରେ ଦୋଷୀ ରବିତାଙ୍କୁ ମୃତ୍ୟୁଦଣ୍ଡ ଶୁଣାଯିବା ପରେ ଉଭୟ ମାମଲା ପୁଣି ଚର୍ଚ୍ଚାକୁ ଆସିଛି । ଏହି ଘଟଣା ମଧ୍ୟରେ ଅଖିଳ ଭାରତ ହିନ୍ଦୁ ମହାସଭାର ଆଗ୍ରା ଜିଲ୍ଲା ସଭାପତି ମୀରା ରାଠୋର ଉଭୟ ମହିଳାଙ୍କୁ ଫାଶୀ ଦେବା ପାଇଁ ଜଲ୍ଲାଦ ହେବାକୁ ଇଚ୍ଛା ପ୍ରକାଶ କରିଛନ୍ତି।
ଏନେଇ ସେ ମଥୁରା ଜିଲ୍ଲାପାଳଙ୍କୁ ଏକ ଆବେଦନପତ୍ର ଦେଇ ଜଲ୍ଲାଦଙ୍କ ଦାୟିତ୍ୱ ତୁଲାଇବାକୁ ଅନୁମତି ମାଗିଛନ୍ତି। ଯଦି ପ୍ରଶାସନ ତାଙ୍କୁ ଏହି ଦାୟିତ୍ୱ ଦିଏ, ତେବେ ସେ ବିନା ପାରିଶ୍ରମିକରେ ଏହି କାର୍ଯ୍ୟ କରିବାକୁ ପ୍ରସ୍ତୁତ ବୋଲି କହିଛନ୍ତି। ଏଥିସହ ଫାଶୀ ପୂର୍ବରୁ ଉଭୟ ମହିଳାଙ୍କୁ ଗଙ୍ଗାଜଳରେ ଶୁଦ୍ଧିକରଣ କରିବା କଥା ମଧ୍ୟ ସେ କହିଥିବା ରିପୋର୍ଟରେ ଉଲ୍ଲେଖ ରହିଛି।
ଅନ୍ୟ ଏକ ଚର୍ଚ୍ଚିତ ମାମଲାରେ ରବିତା ଏବଂ ତାଙ୍କ ସହଯୋଗୀ ଅମରଦୀପଙ୍କୁ ରବିତାଙ୍କ ସ୍ୱାମୀ ଅମିତ କଶ୍ୟପଙ୍କ ହତ୍ୟା ମାମଲାରେ ଦୋଷୀ ସାବ୍ୟସ୍ତ କରାଯାଇଛି । ଅଭିଯୋଗ ପକ୍ଷର କହିବା ଅନୁଯାୟୀ, ହତ୍ୟା ପରେ ଏହାକୁ ସାପ କାମୁଡ଼ା ଯୋଗୁଁ ହୋଇଥିବା ମୃତ୍ୟୁ ବୋଲି ଦର୍ଶାଇବାକୁ ଉଦ୍ୟମ କରାଯାଇଥିଲା । କିନ୍ତୁ ତଦନ୍ତ ସମୟରେ ପୋଷ୍ଟମର୍ଟମ୍ ରିପୋର୍ଟ ଏବଂ ଅନ୍ୟ ପ୍ରମାଣ ଆଧାରରେ ହତ୍ୟା ମାମଲା ସାମ୍ନାକୁ ଆସିଥିଲା ।
ରିପୋର୍ଟ ଅନୁସାରେ, ଅକ୍ଟୋବର ୨୦୨୬ରେ ଅଦାଲତ ଉଭୟଙ୍କୁ ମୃତ୍ୟୁଦଣ୍ଡ ଶୁଣାଇଥିଲେ । ଉଭୟ ମାମଲାରେ ମୃତ୍ୟୁଦଣ୍ଡ ଘୋଷଣା ପରେ ମୀରା ରାଠୋର ନିଜେ ଜଲ୍ଲାଦ ହେବାକୁ ଇଚ୍ଛା ପ୍ରକାଶ କରିଛନ୍ତି । ମଥୁରା ଜିଲ୍ଲାପାଳଙ୍କୁ ଆବେଦନପତ୍ର ଦେଇ ସେ ଏହି ଦାୟିତ୍ୱ ପାଇଁ ଅନୁମତି ମାଗିଛନ୍ତି । ପ୍ରଶାସନ ଅନୁମତି ଦେଲେ ସେ ବିନା ପାରିଶ୍ରମିକରେ ଏହି କାର୍ଯ୍ୟ କରିବେ ବୋଲି ଜଣାଇଛନ୍ତି । ତେବେ ତାଙ୍କ ଆବେଦନ ଉପରେ ପ୍ରଶାସନର ପ୍ରତିକ୍ରିୟା କ’ଣ ରହିଛି ଏବଂ ଏନେଇ କୌଣସି ଅନୁମତି ମିଳିଛି କି ନାହିଁ, ସେ ସମ୍ପର୍କରେ ରିପୋର୍ଟରେ ସ୍ପଷ୍ଟ ସୂଚନା ଦିଆଯାଇନାହିଁ ।
