ନୂଆଦିଲ୍ଲୀ: ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟ ମ୍ୟାଚ ଜିତି ନେଇଛି ଟିମ୍ ଇଣ୍ଡିଆ । ସିଂହଳୀ ଦଳକୁ ଘରୋଇ ମାଟିରେ ପାଣି ପିଆଇଛି ଗିଲ୍ ବାହିନୀ । ତେବେ ଏହି ମ୍ୟାଚରେ ୪ଟି ନୋ-ବଲ ପକାଇଥିଲେ ଭାରତର ଅଭିଜ୍ଞ ବୋଲର ରବିନ୍ଦ୍ର ଜାଡେଜା । ଯାହାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି । ଏମିତି ସେହି ନୋ-ବଲ ପକାଉଥିବାର ଭିଡିଓକୁ ସେୟାର କରି ଟ୍ରୋଲ୍ କରାଯାଉଛି । ଶ୍ରୀଲଙ୍କାର ଅଧିନାୟକ ଯେଉଁ ବଲରେ ଜାଡେଜା ଆଉଟ୍ କରିଥିଲେ ସେହି ବଲଟି ନୋ-ବଲ୍ ହୋଇଥିଲା । ଯାହାକୁ ନେଇ ଚର୍ଚ୍ଚା ଅଧିକ ହେଉଛି । ତେବେ ନୋ-ବଲରେ ଫ୍ରିଽହିଟ୍ ରହଥିବାବେଳେ ଏହା ବୋଲରଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଥାଏ । ତେବେ କ୍ରିକେଟରେ ପ୍ରଥମ ନୋ-ବଲ୍ କିଏ ପକାଇଥିଲେ ?
ନୋ-ବଲର ଇତିହାସର ପୃଷ୍ଠାକୁ ଯଦି ଓଲଟାଇବା ତାହେଲେ ୧୮୨୨ ମସିହା ଜୁଲାଇ ୧୫ ତାରିଖରେ ପ୍ରଥମ ନୋ-ବଲ୍ ପଡ଼ିଥିଲା । ଲର୍ଡ୍ସରେ ଖେଳାଯାଉଥିବା କେଣ୍ଟ ଏବଂ ଏମସିସି ମଧ୍ୟରେ ଅନୁଷ୍ଠି ମ୍ୟାଚରେ ଜନ୍ ଓ୍ବିଲ୍ସ ପ୍ରଥମ ନୋ-ବଲ ପକାଇଥିଲେ । ତେବେ ରାଉଣ୍ଡ ଆର୍ମ ପାଇଁ ସେତେବେଳେ କେବଳ ନୋ-ବଲ୍ ନିୟମ ରହିଥିଲା । ୱିଲ୍ସ ତାଙ୍କ ଭଉଣୀ କ୍ରିଷ୍ଟିନାଙ୍କ ସହ ଅଭ୍ୟାସ କରିବା ସମୟରେ ରାଉଣ୍ଡ-ଆର୍ମ ବୋଲିଂ ଶିଖିଥିଲେ। ଏହା ଇତିହାସରେ ପ୍ରଥମ ଥର ପାଇଁ ହୋଇଥିଲା ଯେ ଜଣେ ବୋଲରଙ୍କୁ ବେଆଇନ ଆକ୍ସନ୍ ପାଇଁ ନୋ-ବଲ୍ କରାଯାଇଥିଲା।
ଆରମ୍ଭ କାଳରେ ‘ନୋ-ବଲ୍’ ଡାକିବା ପଛରେ କାରଣ ଆଜିଠାରୁ ଭିନ୍ନ ଥିଲା । ସେ ସମୟରେ ବୋଲର ଯଦି କ୍ରିଜ୍ ଅତିକ୍ରମ କରୁଥିଲେ କିମ୍ବା ବୋଲିଂ କରିବା ସମୟରେ ନିୟମ ଭଙ୍ଗ କରୁଥିଲେ, ତେବେ ଅମ୍ପାୟାର ‘ନୋ-ବଲ୍’ ଦେଉଥିଲେ । କାଳକ୍ରମେ, ବୋଲିଂ ଶୈଳୀରେ ପରିବର୍ତ୍ତନ ଆସିବା ସହ ଏହାର ନିୟମରେ ମଧ୍ୟ ଅନେକ ପରିବର୍ତ୍ତନ କରାଯାଇଛି।
କ୍ରିକେଟ୍ ଜଗତରେ ଏପରି କିଛି ମହାନ ବୋଲର ରହିଛନ୍ତି ଯେଉଁମାନଙ୍କ ବିଷୟରେ କୁହାଯାଏ ଯେ, ସେମାନେ ନିଜ ପୂରା କ୍ୟାରିୟରରେ କେବେ ବି ନୋ-ବଲ୍ ପକାଇ ନଥିଲେ। ଏହି ତାଲିକାରେ ଭାରତର କପିଲ ଦେବ, ଅଷ୍ଟ୍ରେଲିଆର ଡେନିସ୍ ଲିଲି, ଇଂଲଣ୍ଡର ଇଆନ୍ ବୋଥାମ୍, ପାକିସ୍ତାନର ଇମ୍ରାନ ଖାନ ଏବଂ ୱେଷ୍ଟଇଣ୍ଡିଜର ଲାନ୍ସ ଗିବ୍ସଙ୍କ ନାମ ନିଆଯାଏ । ଆଜିକାଲି ଟେକ୍ନୋଲୋଜିର ଯୁଗରେ ପ୍ରତିଟି ବଲ୍କୁ କ୍ୟାମେରା ଓ ଟେକ୍ନୋଲୋଜି ଦ୍ୱାରା ଯାଞ୍ଚ କରାଯାଉଛି, ଯାହା ଫଳରେ ନୋ-ବଲ୍ ଧରିବା ସହଜ ହୋଇଛି । କିନ୍ତୁ ପ୍ରାଚୀନ କ୍ରିକେଟ୍ର ସେହି ପ୍ରଥମ ନୋ-ବଲ୍ କିଏ ପକାଇଥିଲେ, ତାହା କ୍ରିକେଟ୍ ପ୍ରେମୀଙ୍କ ପାଇଁ ଏବେ ବି ଏକ ରହସ୍ୟ ହୋଇ ରହିଛି।
୧୯୭୭ ମସିହାରେ ପାକିସ୍ତାନ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ଖେଳାଯାଇଥିବା ଟେଷ୍ଟ ମ୍ୟାଚ୍ରେ ସର୍ବାଧିକ ନୋ-ବଲ୍ ପଡ଼ିଥିଲା। ବ୍ରିଜଟାଉନ୍ରେ ଅନୁଷ୍ଠିତ ଏହି ମ୍ୟାଚ୍ରେ ଉଭୟ ଦଳ ମିଶି ମୋଟ ୧୦୩ଟି ନୋ-ବଲ୍ ପକାଇଥିଲେ। କ୍ରିକେଟ୍ ଇତିହାସରେ ଏହା ଏକମାତ୍ର ମ୍ୟାଚ୍ ଯେଉଁଠାରେ ଗୋଟିଏ ମ୍ୟାଚ୍ରେ ୧୦୦ରୁ ଅଧିକ ନୋ-ବଲ୍ ପଡ଼ିଥିଲା। ୧୯୮୮ ମସିହାରେ ୱେଷ୍ଟଇଣ୍ଡିଜ୍ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ୯୦ଟି ନୋ-ବଲ୍ ପଡ଼ିଥିଲା। ସେପଟେ ଟେଷ୍ଟ କ୍ରିକେଟରେ ସର୍ବାଧିକ ନୋ-ବଲ୍ ପକାଇଥିବା ବୋଲର ହେଉଛନ୍ତି ବ୍ରେଟ୍-ଲି । ଯିଏକି ନିଜର ଟେଷ୍ଟ କଶରିୟରରେ ୪୭୨ଟି ନୋ-ବଲ୍ ପକାଇଛନ୍ତି ।
