ଆଜିଠାରୁ ଆରମ୍ଭ ହେଉଛି ଆଇସିସି ମହିଳା ଟି୨୦ ବିଶ୍ବକପ ୨୦୨୬ । ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ ଇଂଲଣ୍ଡ ଏବଂ ଶ୍ରୀଲଙ୍କା ମଧ୍ୟରେ ଖେଳାଯିବ । ହରମନପ୍ରୀତଙ୍କ ନେତ୍ତ୍ବରେ ଟିମ୍ ଇଣ୍ଡିଆ ଜୁନ୍ ୧୪ରୁ ନିଜ ଅଭିଯାନ ଆରମ୍ଭ କରିବ । ତେବେ ମହିଳା କ୍ରିକେଟ ପ୍ରତି ବୃଦ୍ଧି ପାଉଥିବା ଲୋକପ୍ରିୟତାକୁ ଦେଖି ଆଇସିସି ଏକ ବଡ଼ ନିଷ୍ପତ୍ତି ନେଇଛି । ଇଂଲଣ୍ଡରେ ଅନୁଷ୍ଠିତ ହେବାକୁ ଥିବା ଆଇସିସି ମହିଳା ଟି-୨୦ ବିଶ୍ୱକପ୍ ୨୦୨୬ ପାଇଁ ପୁରସ୍କାର ରାଶିରେ ବୃଦ୍ଧି କରାଯାଇଛି । ମହିଳା ଟି-୨୦ ବିଶ୍ୱକପରେ ପ୍ରଥମ ଥର ପାଇଁ ୧୨ଟି ଦଳ ଅଂଶଗ୍ରହଣ କରିବେ । ଇଂଲଣ୍ଡର ସାତଟି ଗ୍ରାଉଣ୍ଡରେ ମୋଟ ୩୩ଟି ମ୍ୟାଚ୍ ଖେଳାଯିବ ।
ଏହି ବିଶ୍ୱକପ୍ ପାଇଁ ଆଇସିସି ପୁରସ୍କାର ରାଶି ବୃଦ୍ଧି କରିଛି । ଚାମ୍ପିଅନ ଦଳ ୨.୩୪ ମିଲିୟନ ଡଲାର ଏବଂ ରନର୍ସଅପ୍ ୧.୧୭ ମିଲିୟନ ଡଲାର ପାଇବେ । ବିଶ୍ବକପରେ ଖେଳିବାକୁ ଥିବା ପ୍ରତ୍ୟେକ ଦଳ ୨୪୭,୫୦୦ ଡଲାର ପାଇବେ । ସେମିଫାଇନାଲରେ ପରାଜିତ ଦଳକୁ ପ୍ରାୟ ୬୫.୬ ମିଲିୟନ ଡଲାର ମିଳିବ ।
ଆଇସିସି କେବଳ ନକଆଉଟ୍ ମ୍ୟାଚ୍ ପାଇଁ ନୁହେଁ ବରଂ ଲିଗ୍ ପର୍ଯ୍ୟାୟ ମ୍ୟାଚ୍ ପାଇଁ ମଧ୍ୟ ପୁରସ୍କାର ରାଶି ସ୍ଥିର କରିଛି । ଗ୍ରୁପ୍ ପର୍ଯ୍ୟାୟରେ ଜିତିଥିବା ପ୍ରତ୍ୟେକ ଦଳକୁ ପ୍ରାୟ ୨.୯ ନିୟୁତ ବୋନସ୍ ମିଳିବ । ମହିଳା ଟି-୨୦ ବିଶ୍ୱକପ୍ ଇତିହାସରେ ପ୍ରଥମ ଥର ପାଇଁ ୧୦ ବଦଳରେ ୧୨ ଦଳ ଅଂଶଗ୍ରହଣ କରୁଛନ୍ତି । ସମସ୍ତ ୧୨ ଦଳକୁ ଛଅ ଜଣିଆ ଦୁଇଟି ଗ୍ରୁପରେ ବିଭକ୍ତ କରାଯାଇଛି । ଲିଗ୍ ପର୍ଯ୍ୟାୟରେ, ପ୍ରତ୍ୟେକ ଦଳ ନିଜ ଗ୍ରୁପର ଅନ୍ୟ ପାଞ୍ଚଟି ଦଳ ବିପକ୍ଷରେ ଗୋଟିଏ ଲେଖାଏଁ ମ୍ୟାଚ୍ ଖେଳିବେ । ପ୍ରତ୍ୟେକ ଗ୍ରୁପର ଶ୍ରେଷ୍ଠ ଦୁଇଟି ଦଳ ସିଧାସଳଖ ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିବେ । ଟୁର୍ଣ୍ଣାମେଣ୍ଟରେ ମୋଟ ୩୩ଟି ମ୍ୟାଚ୍ ଖେଳାଯିବ ।
ବିଶ୍ୱକପ୍ ୨୦୨୬ ଗ୍ରୁପ୍ :
ଗ୍ରୁପ୍ ୧: ଭାରତ, ପାକିସ୍ତାନ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ବାଂଲାଦେଶ, ନେଦରଲ୍ୟାଣ୍ଡସ୍
ଗ୍ରୁପ୍ ୨: ଇଂଲଣ୍ଡ, ନ୍ୟୁଜିଲ୍ୟାଣ୍ଡ, ୱେଷ୍ଟଇଣ୍ଡିଜ୍, ଶ୍ରୀଲଙ୍କା, ସ୍କଟଲ୍ୟାଣ୍ଡ, ଆୟର୍ଲାଣ୍ଡ
