ହିଂସା ପରେ ମାଲକାନଗିରି କୋରକଣ୍ଡାକୁ ଫେରୁଛି ଶାନ୍ତି । ପୋଲିସ ଡିଜିଙ୍କ ଉପସ୍ଥିତିରେ ବସିଛି ଶାନ୍ତି କମିଟି ବୈଠକ । ସେପଟେ ମହିଳାଙ୍କ କଟାମୁଣ୍ଡ ନ ମିଳିବାରୁ ମାଟିରେ ମୁଣ୍ଡ ଆକାରର ପ୍ରତିକୃତି ତିଆରି କରି ହୋଇଛି ମୃତଦେହର ଶେଷକୃତ୍ୟ । ଇଣ୍ଟରନେଟ ସେବା ବନ୍ଦ ଆହୁରି ୧୮ ଘଣ୍ଟା ଲାଗି ବଢ଼ାଇ ଦେଇଛି ।
ମାଲକାନଗିରି ଜିଲ୍ଲା ଏମ୍ଭି ୨୬ରେ ଜମି ବିବାଦରୁ ଆରମ୍ଭ ହୋଇଥିବା କଳହକୁ ନେଇ ଆଦିବାସୀଙ୍କୁ ମହିଳାଙ୍କୁ ବିଭତ୍ସ ହତ୍ୟା କରାଯାଇଥିଲା । ମହିଳାଙ୍କୁ ନିର୍ମମ ଭାବେ ହତ୍ୟା କରି ମୁଣ୍ଡ ଆଉ ଗଣ୍ଡିକୁ ଅଲଗା କରି ପୋଟେରୁ ନଦୀରେ ଫିଙ୍ଗୀ ଦେଇଥିବା ଅଭିଯୋଗ ହୋଇଥିଲା ।
ହେଲେ ଘଟଣାର ଚାରି ଦିନ ପରେ କରୁକୋଣ୍ଡା ପୋଲିସ ମୁଣ୍ଡ ବିହୀନ ଶବ ଉଦ୍ଧାର କରିଥିବା ବେଳେ ମିଳିନଥିଲା ମୁଣ୍ଡ । ପରେ ଦମକଳ ବାହିନୀ ଓ ଓଡ୍ରାଫ ଟିମ ପକ୍ଷରୁ ପୋଟରୁ ନଦୀରେ ମୁଣ୍ଡ ଖୋଜା ଚାଲିଥିବା ବେଳେ ମିଳିନାହିଁ ।
ମହିଳାଙ୍କ କଟାମୁଣ୍ଡ ନ ମିଳିବାରୁ ମାଟିରେ ମୁଣ୍ଡର ପ୍ରତିକୃତି କରି ମୃତଦେହର ଶେଷକୃତ୍ୟ କରାଯାଇଛି । ସ୍ଥାନୀୟ ଅଞ୍ଚଳରେ ଆହୁରି ୧୮ ଘଣ୍ଟା ପର୍ଯ୍ୟନ୍ତ ଇଣ୍ଟରନେଟ ସେବାକୁ ବନ୍ଦ କରାଯାଇଛି । ଆଉ ୨ ଦିନ ବନ୍ଦ ରହିବ ସ୍ଥାନୀୟ ଅଞ୍ଚଳରେ ଥିବା ବିଦ୍ୟାଳୟ । ମୃତକଙ୍କ ପରିବାରକୁ ସରକାର ଦେଢ଼ ଲକ୍ଷ ଟଙ୍କା ପ୍ରଦାନ କରିଛନ୍ତି ।
ମହିଳାଙ୍କୁ ନିର୍ମମ ହତ୍ୟା ପରେ ପ୍ରତିଶୋଧର ନିଆଁରେ ଜଳି ପୋଡ଼ି ଯାଇଛଠି ଏମ୍ଭି ୨୬ର ପ୍ରାୟ ୧୬୦ ଘର । ରବିବାର ଠାରୁ ଲାଗି ରହିଥିବା ଉତ୍ତେଜନା ଥମିବା ସହ ଉତ୍ତ୍ୟକ୍ତ ଆଦିବାସୀଙ୍କୁ ବୁଝାଇବାରେ ସଫଳ ହୋଇଛି ପ୍ରଶାସନ ।
ବରିଷ୍ଠ ପୋଲିସ ଅଧିକାରୀ, ମାଲକାନାଗିରି ବିଧାୟକ ନରସିଂହ ମାଡ଼କାମୀ, ଜିଲ୍ଲାପାଳ ସୋମେଶ ଉପାଧ୍ୟାୟଙ୍କ ଉପସ୍ଥିତିରେ ପରିବାର ଲୋକ ମୃତ ମହିଳାଙ୍କ ଶେଷକୃତ୍ୟ ସଂପନ୍ନ କରିଛନ୍ତି । ଶେଷକୃତ୍ୟ ବେଳେ ଗାଁରେ ସୃଷ୍ଟି ହୋଇଥିଲା ଶୋକାକୁଳ ପରିବେଶ ।
ତେବେ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି ରାଖେଲଗୁଡା ଗାଁ ଲୋକେ । ମହିଳାଙ୍କ ହତ୍ୟା କରିଥିବା ଦୁର୍ବୃତ୍ତକୁ ଫାଶୀ ଦେବା ସହ ପୀଡ଼ିତ ପରିବାରକୁ ୩୦ ଲକ୍ଷ ଟଙ୍କା ଦେବାକୁ ଦାବି କରିଛନ୍ତି । ଏମ୍ଭି ୨୬ ଗାଁରୁ ଶରଣାର୍ଥୀଙ୍କୁ ବାହାର କରିବା ଆଦି ୭ଟି ଦାବି ରଖିଛି ଆଦିବାସୀ ମହାସଂଘ ।
ରାଖେଲଗୁ଼ଡ଼ାର ଆଦିବାସୀ ମହିଳା ଲାଖେ ପଡିଆମୀଙ୍କ ହତ୍ୟା ପରେ ଉତ୍ତେଜିତ ଗ୍ରାମବାସୀ ଏମ୍ଭି ୨୬ ଗାଁରେ ପୋଡ଼ାଜଳା କରିଥିଲେ । ଏବେ ହିଂସା ଥମିବା ପରେ ନିଆଁର ଆଁରୁ ବର୍ତ୍ତି ଯାଇଥିବା ଆସବାବପତ୍ରକୁ ସାଉଣ୍ଟୁଛନ୍ତି ଗ୍ରାମବାସୀ । ପୋଲିସ ଡିଜିଙ୍କ ଉପସ୍ଥିତିରେ ଶାନ୍ତି କମିଟି ବୈଠକ ବସିଛି ।
