ସଂଚାର ବ୍ୟୁରୋ: ରାଜା ରଘୁବଂଶୀ ହତ୍ୟା ମାମଲା। ଜେରାରୁ ମିଳୁଛି ଅନେକ ଗୁରୁତ୍ବପୂର୍ଣ୍ଣ ତଥ୍ୟ। ବିବାହ ପରେ ପ୍ରଥମେ ଆସାମର କାମାକ୍ଷାକୁ ଯାଇ ଦେବୀ ଦର୍ଶନ କରିବାକୁ ସ୍ବାମୀଙ୍କୁ ପରାମର୍ଶ ଦେଇଥିଲା ସୋନମ। ସେହି ଅନୁସାରେ ଗୁଆହାଟି ଓ ମେଘାଳୟକୁ ହନିମୁନରେ ଯିବା ଲାଗି ରାଜା ଯୋଜନା କରିଥିଲେ। ରାଜାଙ୍କୁ ସୋନମ କହିଥିଲା କାମାକ୍ଷା ଦେବୀଙ୍କ ନିକଟରେ ଭକ୍ତି ଅର୍ପଣ କରିବା ପରେ ହିଁ ଏହି ବିବାହ ପୂର୍ଣ୍ଣତା ଲାଭ କରିବ। ସେପଟେ ରାଜା ରଘୁବଂଶୀ ହତ୍ୟା ଘଟଣାରେ ଆଜିଠାରୁ ୮ ଦିନିଆ ରିମାଣ୍ଡରେ ନେଇ ୫ ଅଭିଯୁକ୍ତଙ୍କୁ ମାରାଥନ ଜେରା କରୁଛି ମେଘାଳୟ ଏସଆଇଟି। ତେଣେ ୮ ଦିନିଆ ରିମାଣ୍ଡରେ ନେଇ ସୋନମଙ୍କୁ ଜେରା କରିଛି ପୋଲିସ।
ମେଘାଳୟରୁ କାହିଁକି ରିଟର୍ଣ୍ଣ ଟିକେଟ କରାଯାଇ ନଥିଲା ସେନେଇ ଶାଶୂ କରିଥିବା ଅଭିଯୋଗ ସମ୍ପର୍କରେ ସୋନମଙ୍କୁ କରାଯାଇଛି ଜେରା। ସେହିପରି ରାଜାଙ୍କୁ ବିବାହ କରିବାକୁ ସୋନମଙ୍କୁ ବାଧ୍ୟ କରାଯାଇଥିଲା କି ନାହିଁ ସେ ସମ୍ପର୍କରେ ବି ଜେରା ହୋଇଛି। ଏପରିକି ଯଦି ବାଧ୍ୟବାଧକତାରେ ବିବାହ କରାଯାଏ ତେବେ ଫଳ ଭୋଗିବାକୁ ପଡିବ ବୋଲି ସୋନମ କହିଥିବା ନେଇ ସୂଚନା ଦେଇଛନ୍ତି ରାଜାଙ୍କ ଭାଇ। ଏହି ଘଟଣାରେ ମୋଟ ୫ ଜଣଙ୍କ ସମ୍ପୃକ୍ତି ପଦାକୁ ଆସିଥିବାବେଳେ ଏହି ଲିଙ୍କରେ ଆସିଛନ୍ତି ଜିତେନ୍ଦ୍ର ରଘୁବଂଶୀ।
ସୋନମଙ୍କ ପ୍ରେମିକ କୁହାଯାଉଥିବା ରାଜ ଖୁସୱାହାଙ୍କ ସହ ଜିତେନ୍ଦ୍ରଙ୍କ ସମ୍ପର୍କ ଥିବା ସୂଚନା ମିଳିଛି। ସେପଟେ ମେଘାଳୟରେ ରହଣୀ କାଳରେ ସୋନମ ଛାଡ଼ିଯାଇଥିବା ଏକ ମଙ୍ଗଳସୂତ୍ର ଓ ଏକ ମୁଦି ପୋଲିସ ଜବତ କରିବା ପରେ ଘଟଣାର ଖିଅ ଧରିପାରିଥିଲା ପୋଲିସ। ଜଣେ ନବବିବାହିତା କାହିଁକି ମଙ୍ଗଳସୂତ୍ର ଛାଡି ଚାଲିଯିବେ ବୋଲି ପୋଲିସର ସନ୍ଦେହ ଘନୀଭୂତ ହୋଇଥିଲା। ଗତକାଲି ହତ୍ୟା ଷଡ଼ଯନ୍ତ୍ରରେ ସାମିଲ ଥିବା ନେଇ ମାନିଥିଲା ପତ୍ନୀ ସୋନମ। ସିସିଟିଭି ଫୁଟେଜ, କଲ ରେକର୍ଡ ଆଦି ପ୍ରମାଣ ମିଳିବା ପରେ ଜେରା ବେଳେ ଭାଙ୍ଗି ପଡିଥିଲା ସୋନମ।
ଅନ୍ଯ ୪ ଅଭିଯୁକ୍ତ ରାଜ ଖୁସୱାହା, ଆନନ୍ଦ କୁର୍ମୀ, ଆକାଶ ରାଜପୁତ, ବିଶାଲ ସିଂ ଚୌହାନଙ୍କୁ ବି ଆଜିଠାରୁ ହେବ ମାରାଥନ ଜେରା। ଖୁବ ଶୀଘ୍ର ସମସ୍ତଙ୍କୁ ନେଇ କରାଯାଇପାରେ ସିନ ରିକ୍ରିଏସନ। ହତ୍ଯା ଘଟଣାରେ ଏହି ୫ ଅଭିଯୁକ୍ତ ନା ଅନ୍ୟ କେହି ଅଛନ୍ତି ତାହାର ଖୋଳତାଡ଼ କରୁଛି ଏସଆଇଟି। ଗତକାଲି ରାଜା ରଘୁବଂଶୀଙ୍କ ଘରକୁ ଯାଇ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ ସୋନମର ଭାଇ ଗୋବିନ୍ଦ।
