ଅସ୍ଵାସ୍ଥ୍ୟକର ପରିବେଶ, ନିମ୍ନମାନର ଖାଦ୍ୟ ପରଷିବା ସହ ଅଭାବନୀୟ ଭିତ୍ତିଭୂମିକୁ ନେଇ ଅସନ୍ତୋଷ ପ୍ରକାଶ କଲେ ରାଜ୍ୟ ଖାଦ୍ୟ କମିଶନଙ୍କ ଦୁଇ ଜଣିଆ ସଦସ୍ୟ । ତିନି ଦିନିଆ କୋରାପୁଟ ଜିଲ୍ଲା ଗସ୍ତରେ ଆସି ଜୟପୁର ବ୍ଲକର ବିଭିନ୍ନ ଅଙ୍ଗନବାଡ଼ି କେନ୍ଦ୍ର, ପ୍ରାଥମିକ ବିଦ୍ୟାଳୟ, ସରକାରୀ ଉଚ୍ଚ ବିଦ୍ୟାଳୟ ସହ ସେବାଶ୍ରମ ବିଦ୍ୟାଳୟ ଗସ୍ତ କରିଥିଲେ । ପ୍ରଥମେ ଜୟପୁର ସହର ଯମୁନାଗୁଡ଼ା ଅଙ୍ଗନବାଡ଼ି କେନ୍ଦ୍ର ପରିଦର୍ଶନ କରି କୁନି କୁନି ପିଲାଙ୍କ ସହ କଥାବାର୍ତ୍ତା କରିବା ସହ ପିଲାଙ୍କୁ କିପରି ଶିକ୍ଷା, ସ୍ବାସ୍ଥ୍ୟ ଓ ଖାଦ୍ୟ ପରସା ଯାଉଛି ପଚାରିଥିଲେ କମିଶନ ସଦସ୍ୟ ଦୟାନିଧି ଦାଶ ଓ ଅକ୍ଷୟ କୁମାର ବେହେରା । ଏହାପରେ ଅଙ୍ଗନବାଡ଼ି କେନ୍ଦ୍ରରେ ବୁଲିବା ପରେ ଅସନ୍ତୋଷ ପ୍ରକାଶ କରିଥିଲେ । କୌଣସି ପ୍ରଶ୍ନର ସନ୍ତୋଷ ଜନକ ଉତ୍ତର ଦେଇ ପାରି ନଥିଲେ କେନ୍ଦ୍ର ପରିଚାଳକ । ସେହିପରି ପଡୋଶୀ ହାନାଗୁଡ଼ା ସରକାରୀ ପ୍ରାଥମିକ ବିଦ୍ୟାଳୟରେ ମଧ୍ୟ ଛାତ୍ର ଛାତ୍ରୀଙ୍କ ଅନୁପସ୍ଥିତି ସହ ରୋଷେଇ ଘର ଦେଖି ଅସନ୍ତୋଷ ପ୍ରକାଶ କରିଥିଲେ । ବ୍ଲକ କାର୍ଯ୍ୟାଳୟ ନିକଟରେ ଥିବା ସରକାରୀ ପ୍ରାଥମିକ ବିଦ୍ୟାଳୟରେ ଖରାରେ ଛାତ୍ର ଛାତ୍ରୀଙ୍କୁ ମଧ୍ୟାହ୍ନ ଭୋଜନ ଦେବା ସହ ଅସ୍ୱାସ୍ଥ୍ୟକର ପରିବେଶରେ ଖାଦ୍ୟ ପରସିବାକୁ ନେଇ ସ୍କୁଲର ପ୍ରଧାନ ଶିକ୍ଷୟତ୍ରୀଙ୍କୁ ତାଗିଦ୍ କରିଥିଲେ । ଜିଲ୍ଲାରେ ୧୪ଟି ବ୍ଲକ, ୪ଟି ପୌରାଞ୍ଚଲରେ ପ୍ରତି ବ୍ଲକ ଓ ପୌରାଞ୍ଚଳରେ ୩୫୦ରୁ ଅଧିକ ଅଙ୍ଗନବାଡ଼ି କେନ୍ଦ୍ର ଥାଇ ନିର୍ଦ୍ଧିଷ୍ଟ ଗୋଟିଏ ଗୋଟିଏ ଏସଏଚଜିଙ୍କୁ ଛତୁଆ କେନ୍ଦ୍ର ଦାୟିତ୍ଵ ଦିଆଯାଇଥିବାରୁ ଅସନ୍ତୋଷ ପ୍ରକାଶ କରିଥିଲେ । ଦୁଇରୁ ତିନୋଟି ଏସଏଚଜିଙ୍କୁ ଦାୟିତ୍ଵ ଦେଇ କ୍ୱାଲିଟି ଓ କ୍ୱାଣ୍ଟିଟି ପ୍ରତି ଦୃଷ୍ଟି ଦେବା ପାଇଁ ପ୍ରଶାସନକୁ ଅନୁରୋଧ କରିବେ ବୋଲି କହିଛନ୍ତି କମିଶନ ସଦସ୍ୟ । ଗତକାଲି କୋରାପୁଟ ପୌରାଞ୍ଚଳ ସହ ଲକ୍ଷ୍ମୀପୁର ବ୍ଲକ ଗସ୍ତ କରିଥିଲେ । ଏହି ଗସ୍ତରେ କମିଶନ ସଦସ୍ୟଙ୍କ ସହ ଜିଲ୍ଲା ସମାଜ ମଙ୍ଗଳ ଅଧିକାରୀ ପୁଷ୍ପାଞ୍ଜଳି ପଟନାୟକ, ବିଡିଓ ଶକ୍ତି ମହାପାତ୍ର, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ, ଜିଲ୍ଲା ଯୋଗାଣ ଅଧିକାରୀ, ବ୍ଲକ ଶିକ୍ଷା ଅଧିକାରୀ, ସିଡ଼ିପିଓ ପ୍ରମୁଖ ଉପସ୍ଥିତ ଥିଲେ।
