ରାଜଧାନୀରେ ଚାଲିଛି ଲୁଟେରାଙ୍କ ରାଜ୍ । ପୁଣି ମାତିଲେ ସିନ୍ଧି ଚୋର । ସୁନା ଦୋକାନର ତାଲା କାଟି ଲୁଟେରା ନେଇଗଲେ ଲକ୍ଷାଧିକ ଟଙ୍କାର ଅଳଙ୍କାର । ପାଖାପାଖି ଦୁଇ କିଲୋଗ୍ରାମ୍ ରୁପା ଓ ୨୦ଗ୍ରାମ ସୁନା ଅଳଙ୍କାର ନେଇଥିବା ବେଳେ ଏହାର ଦୃଶ୍ୟ ସିସିଟିଭିରେ କଏଦ ହୋଇଛି । ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଚକେଇସିଆଣି ମୁଖ୍ୟ ବଜାରରେ ଥିବା ସୁବର୍ଣା ଜୁଏଲାରୀରୁ ହୋଇଛି ସିନ୍ଧି ଚୋରି । ଡିସେମ୍ୱର୧୯ ତାରିଖ ବିଳମ୍ବିତ ରାତିରେ ଦୋକାନର ସାମ୍ନା ପଟ ତାଲା କାଟି ଅଳଙ୍କାର ନେଇଛନ୍ତି ଲୁଟେରା । ପ୍ରଥମେ ଶାବଳରେ ଲୁହା କବାଟ ତାଡ଼ି ଦୋକାନରେ ପଶିଥିଲେ । ଚୋରି ପୂର୍ବରୁ ସିସିଟିଭିର ମୁହଁ ଉପରକୁ କରିବା ସହ ସିସିଟିଭିର ଡିଭିଆର୍ ମଧ୍ୟ ନେଇଯାଇଛନ୍ତି ଚୋର । ଏନେଇ ସ୍ଥାନୀୟ ମଞ୍ଚେଶ୍ୱର ଥାନାରେ ଅଭିଯୋଗ କଲେ ଦୋକାନ ମାଲିକ ବ୍ରହ୍ମା ସାହୁ । ଉକ୍ତ ଅଭିଯୋଗ ଆଧାରରେ ଆଖପାଖ ଅଞ୍ଚଳର ସିସିଟିଭି ଯାଞ୍ଚ କରି ଘଟଣାର ତଦନ୍ତ କରୁଛି ମଞ୍ଚେଶ୍ୱର ଥାନା ପୋଲିସ ।
