ସଂଚାର ବ୍ୟୁରୋ: ବାଂଲାଦେଶ ରାଜନୈତିକ ସଂକଟକୁ ନେଇ ଭାରତରେ ଚିନ୍ତା । ବିଶେଷକରି ପୂର୍ବ ଭାରତର ସୁରକ୍ଷା ନେଇ ଚିନ୍ତା ବଢିଛି । ପୂର୍ବ ଭାରତରେ ଓଡିଶା, ପଶ୍ଚିମବଙ୍ଗ ତଟବର୍ତ୍ତୀ ଅଞ୍ଚଳକୁ ଅନୁପ୍ରବେଶ ଓ ସନ୍ତ୍ରାସବାଦୀ କାର୍ଯ୍ୟକଳାପ ଭୟ ବଢିଛି । ଏହାକୁ ଦୃଷ୍ଟିରେ ରଖି ଏବେ ସରକାର ବଙ୍ଗୋପସାଗର ଉପକୂଳରେ ଥିବା ଜିଲ୍ଲାଗୁଡିକୁ ସତର୍କ କରିଛନ୍ତି । ଶେଖ ହସିନାଙ୍କୁ ଭାରତ ଶରଣ ଦେଇଥିବାରୁ ଭାରତ ବିରୋଧୀ ଶକ୍ତିଗୁଡିକ ସକ୍ରିୟ ହୋଇଛନ୍ତି । ସେହି ବିରୋଧୀ ଶକ୍ତିଗୁଡିକ ପଶ୍ଚିମବଙ୍ଗ ଏବଂ ଓଡିଶାକୁ ସମୁଦ୍ର ପଥରେ ଅନୁପ୍ରବେଶ କରିବାର ଭୟ ରହିଛି । ତେଣୁ ଓଡିଶା ଉପକୂଳରେ କିଛି ବି ଅଘଟଣ ପୂର୍ବରୁ ସରକାର ସତର୍କ ହେବାକୁ ଚେତାଇ ଦେଇଛନ୍ତି ବିଶେଷଜ୍ଞ ।
ବାଂଲାଦେଶରେ ଅରାଜକତା । ଟେନସନରେ । ବାଂଲାଦେଶ ସୀମାକୁ ଲାଗିଥିବା ପୂର୍ବଭାରତର ୪ ହଜାର ୪୬ କିଲୋମିଟରରେ ହାଇ ଆଲର୍ଟ । ବିପଦ ମୁକ୍ତ ନୁହେଁ ଓଡ଼ିଶା । ବାଂଲାଦେଶରେ ଏବେ ସକ୍ରିୟ ହୋଇଛନ୍ତି ଭାରତ ବିରୋଧୀ ଶକ୍ତି । ସୁଯୋଗ ପାଇଲେ ଜଳପଥ ଦେଇ ଏମାନେ ଅନୁପ୍ରବେଶ କରି ଘଟାଇପାରନ୍ତି କିଛି ବି ଅଘଟଣ । ବଙ୍ଗୋପସାଗର ଦେଇ ଓଡ଼ିଶାକୁ ଅନୁପ୍ରବେଶ କରିବାର ଯଥେଷ୍ଟ ସମ୍ଭାବନା ରହିଛି । ରାଜ୍ୟ ସରକାରଙ୍କ ଗୁଇନ୍ଦା, ତଟସୁରକ୍ଷା ବାହିନୀ, କେନ୍ଦ୍ରୀୟ ଗୁଇନ୍ଦା ସଂସ୍ଥା, ପୋଲିସ ସହିତ ସମନ୍ବୟ ରକ୍ଷା କରିବା ଜରୁରୀ । ତୁରନ୍ତ ଏ ନେଇ ତତ୍ପରତା ଦେଖାଇବାକୁ ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି ବିଶେଷଜ୍ଞ । ବାଂଲାଦେଶରେ ଅସ୍ଥିରତା ଯୋଗୁ ଓଡ଼ିଶା ବି ଆର୍ଥିକ କ୍ଷେତ୍ରରେ କ୍ଷତିଗ୍ରସ୍ତ ହେବାକୁ ଯାଉଛି ।
ଭାରତୀୟ ତଟସୁରକ୍ଷା ବାହିନୀ ପକ୍ଷରୁ ପଶ୍ଚିମବଙ୍ଗ ସୁନ୍ଦରବନ ଓ ବାଂଲାଦେଶ ସୀମାରେ କଡ଼ା ନଜର ରଖାଯାଇଛି । ପାରାଦୀପରୁ ଦୈନିକ ୨୦ ହଜାର ମତ୍ସ୍ୟଜୀବୀ ସମୁଦ୍ର ଭିତରକୁ ମାଛ ଧରିବାକୁ ଯାଇଥାନ୍ତି । ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣା ପରେ ମତ୍ସ୍ୟଜୀବୀ, କୋଷ୍ଟଗାର୍ଡ, ମତ୍ସ୍ୟବିଭାଗ, ମେରାଇନ୍ ପୋଲିସ, ନୌସେନା ପରି ୧୮ଟି ବିଭାଗକୁ ନେଇ ବର୍ଷକୁ ଦୁଇଥର ପ୍ରଶିକ୍ଷଣ ଦିଆଯାଉଛି । କୌଣସି ଅଘଟଣ ନେଇ ଆଶଙ୍କା ଉପୁଜିଲେ ସଙ୍ଗେ ସଙ୍ଗେ ସତର୍କ କରିବା ବ୍ୟବସ୍ଥା ରହିଥିବା କହିଛନ୍ତି ଓଡ଼ିଶା ମତ୍ସ୍ୟ ଉତ୍ପାଦକ ସଂଘ ।
