ଚଳିତ ଆଇପିଏଲ୍ର ୧୧ତମ ଲିଗ୍ ମ୍ୟାଚରେ ରବିବାର ୫ଥର ଚାମ୍ପିଅନ୍ ଚେନ୍ନାଇ ଡିଫେଣ୍ଡିଂ ଚାମ୍ପିଅନ୍ ବେଙ୍ଗାଲୁରୁକୁ ଭେଟିବ । ବେଙ୍ଗାଲୁରୁ ପ୍ରଥମ ମ୍ୟାଚରେ ହାଇଦ୍ରାବାଦକୁ ହରାଇଥିଲା । ଆଜି ଘରୋଇ ଗ୍ରାଉଣ୍ଡରେ ବିଜୟ ଧାରା ଜାରି ରଖିବାକୁ ବେଙ୍ଗାଲୁରୁ ପ୍ରୟାସ କରିବ । ଚେନ୍ନାଇ ଇତି ମଧ୍ୟରେ ୨ଟି ମ୍ୟାଚ ଖେଳି ସାରିଥିଲେ ହେଁ ବିଜୟ ଖାତା ଖୋଲି ନାହିଁ । ଫଳରେ ଯଥା ସମ୍ଭବ ବିଜୟ ଅଭିଯାନ ଆରମ୍ଭ କରିବାକୁ ଚେନ୍ନାଇ ଚେଷ୍ଠା କରିବ ।
ପୂର୍ବ ରେକର୍ଡ ଚେନ୍ନାଇ ପକ୍ଷରେ ରହିଛି । ମାତ୍ର ବେଙ୍ଗାଲୁରୁ ଦୀର୍ଘ ୧୮ ବର୍ଷ ପରେ ଫେରି ପାଇଥିବା ଲୟକୁ ଏତେ ସହଜରେ ହରାଇବାକୁ ଚାହିଁବ ନାହିଁ । ଫଳରେ ମ୍ୟାଚଟି ସଂଘର୍ଷପୂର୍ଣ୍ଣ ହେବ । ଉଭୟ ଦଳ ଇତି ମଧ୍ୟରେ ପରସ୍ପରକୁ ୩୫ଥର ଭେଟିଛନ୍ତି । ଏଥିରୁ ବେଙ୍ଗାଲୁରୁ ୧୩ଟି ମ୍ୟାଚ ଜିତିଥିବାବେଳେ ଚେନ୍ନାଇ ୨୧ଟି ମ୍ୟାଚରେ ବିଜୟୀ ହୋଇଛି ।
ଗତ ସିଜନରେ ଉଭୟ ଦଳ ପରସ୍ପରକୁ ୨ଥର ଭେଟିଥିଲେ । ବେଙ୍ଗାଲୁରୁ ଉଭୟ ମ୍ୟାଚ ଜିତିଥିଲା । ଗତ ସିଜନରେ ବେଙ୍ଗାଲୁରୁକୁ ଚାମ୍ପିଅନ କରାଇଥିବା ଜୋସ ହାଜେଲଉଡ୍ ଏ ପର୍ଯ୍ୟନ୍ତ ଫିଟ୍ ହୋଇ ନଥିଲେ ହେଁ ତାଙ୍କ ଅନୁପସ୍ଥିତି ଅନୁଭବ ହୋଇ ନାହିଁ । କାରଣ ହାଜେଲଉଡ୍ଙ୍କ ସ୍ଥାନରେ ଖେଳୁଥିବା ଜାକବ ଡଫି ଘାତକ ବୋଲିଂ କରୁଛନ୍ତି । ଆଜି ସେ ବେଙ୍ଗାଲୁରୁର ବୋଲିଂ ବିଭାଗ ସମ୍ଭାଳିବେ ।
ସିଏସକେର ବୋଲିଂ ବିଭାଗ ଦୁର୍ବଳ ମନେ ହେଉଛି । ନୂର ଅହମ୍ମଦ ଓ ମାଟ ହେନରୀ ଗତ ପଞ୍ଜାବ ବିପକ୍ଷ ମ୍ୟାଚରେ ବୋଲିଂ ବିଭାଗ ସମ୍ଭାଳିଥିଲେ ଓ ବ୍ୟୟ ବହୁଳ ସାବ୍ୟସ୍ତ ହୋଇଥିଲେ । ଆଜି ଚେନ୍ନାଇ ଜାମି ଓଭରଟନଙ୍କୁ ଏକାଦଶକୁ ଫେରାଇ ଆଣିବାକୁ ଯୋଜନା କରିବ । ଫର୍ମ ହରାଇଥିବା ନୂରଙ୍କ ସ୍ଥାନରେ ପେସ୍ ବୋଲର ଗୁରଜନପ୍ରୀତ ସିଂହ ଖେଳିବାର ଯଥେଷ୍ଟ ସମ୍ଭାବନା ରହିଛି । ଚିନ୍ନାସ୍ୱାମୀ ଷ୍ଟାଡ଼ିୟମ୍ର ବାଉଣ୍ଡାରୀ ଛୋଟ ଥିବାରୁ ସ୍ପିନରଙ୍କ ସ୍ଥାନରେ ପେସ୍ ବୋଲରଙ୍କୁ ଖେଳାଇବା ଉନ୍ନତ ନିଷ୍ପତ୍ତି ସାବ୍ୟସ୍ତ ହେବ ।
ଆଜି ବେଙ୍ଗାଲୁରୁ ପକ୍ଷରୁ ଭୁବନେଶ୍ୱର କୁମାର ଓ ଚେନ୍ନାଇ ପକ୍ଷରୁ ସଞ୍ଜୁ ସାମସନଙ୍କ ଉପରେ ନଜର ରହିବ । ଇତି ମଧ୍ୟରେ ୧୯୯ଟି ୱିକେଟ୍ ଅକ୍ତିଆର କରିସାରିଥିବା ଭୁବନେଶ୍ୱର ଆସନ୍ତାକାଲି ୨୦୦ ୱିକେଟ୍ କ୍ଲବରେ ସାମିଲ ହେବାର ଯଥେଷ୍ଟ ସମ୍ଭାବନା ରହିଛି । ପ୍ରଥମ ୨ଟି ମ୍ୟାଚରେ ସଞ୍ଜୁଙ୍କ ବ୍ୟାଟ୍ ନିରବ ରହିଥିଲା । ମାତ୍ର ଗତ ଟି-ଟ୍ୱେଣ୍ଟି ବିଶ୍ୱକପ୍ରେ ତାଙ୍କ ପ୍ରଦର୍ଶନକୁ ଦର୍ଶକ ଭୁଲି ନାହାନ୍ତି । ଖୁବ୍ ଶୀଘ୍ର ସଞ୍ଜୁ ଫର୍ମକୁ ଫେରି ଚେନ୍ନାଇ ପାଇଁ ମ୍ୟଚ ବିଜୟୀ ଇନିଂସ ଖେଳିବେ ।
ଚିନ୍ନାସ୍ୱାମୀ ଷ୍ଟାଡ଼ିୟମ୍ର ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ ରହିବ । ଏଠାରେ ଆଜି ବିଶାଳ ସ୍କୋର ସଂଗୃହୀତ ହେବା ଏକ ପ୍ରକାର ନିଶ୍ଚିତ । ରାତ୍ରିରେ କାକର ପ୍ରଭାବ ରହିବ । ଫଳରେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ଚେନ୍ନାଇ ଦଳ: ସଞ୍ଜୁ ସାମସନ, ଋତୁରାଜ ଗାଏକୱାଡ୍(ଅଧିନାୟକ), ଆୟୂଷ ମାହତ୍ରେ, ସର୍ଫରାଜ ଖାନ, ଶିବମ ଦୁବେ, କାର୍ତ୍ତିକ ଶର୍ମା, ପ୍ରଶାନ୍ତ ବୀର, ମାଟ ହେନରୀ, ନର ଅହମ୍ମଦ/ଗୁରଜନପ୍ରୀତ ସିଂହ, ଅଂଶୁଲ କାମ୍ବୋଜ, ଖଲିଲ ଅହମ୍ମଦ, ରାହୁଲ ଚହର/ଅକିଲ ହୋସେନ ।
ବେଙ୍ଗାଲୁରୁ ଦଳ: ବିରାଟ କୋହଲି, ଫିଲ ସଲ୍ଟ, ଦେବଦତ୍ତ ପାଡ଼ିକଲ, ରଜତ ପାତିଦାର(ଅଧିନାୟକ), ଜିତେଶ ଶର୍ମା, ଟିମ ଡେଭିଡ୍, ରୋମାରିଓ ସେଫର୍ଡ, କୃନାଲ ପାଣ୍ଡ୍ୟା, ଭୁବନେଶ୍ୱର କୁମାର, ଅଭିନନ୍ଦନ ସିଂହ, ଜାକବ ଡଫି, ସୂୟାଶ ଶର୍ମା ।
