ସଂଚାର ବ୍ୟୁରୋ: ପାରିବାରିକ କଳହର କରୁଣ ପରିଣତି । କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ବୁଡ୍ରୁକିଆ ଗାଁରେ ଘଟିଛି ଅଭାବନୀୟ ଘଟଣା । ବୁଡ୍ରୁକିଆ ମଝିସାହିରେ ସ୍ବାମୀ ସ୍ତ୍ରୀ ଆତ୍ମହତ୍ୟା କରିଥିବା ଘଟଣା ଅଞ୍ଚଳବାସୀଙ୍କୁ ଚକିତ କରିଛି । ଭିନ୍ନ ଭିନ୍ନ ଦୁଇଟି ଘରେ ସ୍ବାମୀ ସ୍ତ୍ରୀ ବେକରେ ଦଉଡ଼ି ଲଗାଇ ଆତ୍ମହତ୍ୟା କରିଛନ୍ତି । ମୃତ ଦମ୍ପତ୍ତି ପ୍ରମୋଦ ମଲ୍ଲିକ ଓ ପୁଆରି ମଲ୍ଲିକ । ସେପଟେ ଆତ୍ମହତ୍ୟାର ପ୍ରକୃତ କାରଣ ଏଯାବତ୍ ସ୍ପଷ୍ଟ ହୋଇନଥିବା ବେଳେ ପାରିବାରିକ କଳହ ଯୋଗୁଁ ଏଭଳି ଘଟଣା ଘଟିଥିବା କୁହାଯାଉଛି । ଅନ୍ୟପଟେ ଘଟଣାସ୍ଥଳରେ ବାଲିଗୁଡ଼ା ପୋଲିସ୍ ଓ ଏକଜୁକୁଟିଭ୍ ମାଜିଷ୍ଟ୍ରେଟ ତଥା ବାଲିଗୁଡ଼ା ତହସିଲଦାର ପହଁଚି ଶବ ଜବତ କରିବା ସହ ବ୍ୟବଛେଦ ପାଇଁ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟକୁ ପଠାଇଛି । ଘଟଣାରେ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି ପୋଲିସ୍ । ଅନ୍ୟପଟେ ପ୍ରମୋଦ କୌଣସି କାମଧନ୍ଦା ନକରି ଏଣେ ତେଣେ ବୁଲିବା, ମଦ୍ୟପାନ କରିବା ଆଦି ଘଟଣାକୁ ନେଇ ସ୍ବାମୀ ସ୍ତ୍ରୀଙ୍କ ମଧ୍ୟରେ କଳହ ଲାଗି ରହୁଥିଲା । ଶେଷରେ ସ୍ତ୍ରୀ ପୁଆରି ର ମୋବାଇଲ୍ ଫୋନ୍ ଟିକୁ ମଧ୍ୟ ବନ୍ଧକ ରଖି କିଛି ଟଙ୍କା ଆଣି ଖର୍ଚ୍ଚ କରିଦେଇଥିଲା ପ୍ରମୋଦ । ଏସବୁ ଘଟଣାକୁ ନେଇ ଗତକାଲି ଦିନ ଦ୍ବିପହରରେ ଉଭୟଙ୍କ ମଧ୍ୟରେ ଝଗଡ଼ା ହେବା ପରେ ଉଭୟେ ଆତ୍ମହତ୍ୟା କରିଥିବା ସୂଚନା ମିଳୁଛି ।
