ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ତଥା ଅଭିନେତା ପବନ କଲ୍ୟାଣ ଏବଂ ତାଙ୍କ ପତ୍ନୀ ଆନା କୋନିଡେଲାଙ୍କ ବିବାହ ବିଚ୍ଛେଦ ଘୋଷଣା କରିଛନ୍ତି । ଦୀର୍ଘଦିନ ଧରି ଏକାଠି ରହିବା ପରେ ଉଭୟ ଅଲଗା ହେବାକୁ ନିଷ୍ପତ୍ତି ନେଇଛନ୍ତି । ପବନ କଲ୍ୟାଣଙ୍କ କାର୍ଯ୍ୟାଳୟ ପକ୍ଷରୁ ଜାରି ବିବୃତ୍ତି ଅନୁଯାୟୀ, ପାରସ୍ପରିକ ବୁଝାମଣା ଓ ସମ୍ମାନର ସହ ଏହି ନିଷ୍ପତ୍ତି ନେଇଛନ୍ତି । ଏହା ପବନ କଲ୍ୟାଣଙ୍କ ତୃତୀୟ ବିବାହ ବିଚ୍ଛେଦ ହେବ ।
ପବନ କଲ୍ୟାଣ ୧୯୯୭ ମସିହାରେ ନନ୍ଦିନୀଙ୍କୁ ପ୍ରଥମ ବିବାହ କରିଥିଲେ । ତେବେ ଖୁବଶୀଘ୍ର ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିଲା ଏବଂ ସେମାନେ ଅଲଗା ହୋଇଥିଲେ । ପରେ ୨୦୦୯ ମସିହାରେ ଅଭିନେତ୍ରୀ ତଥା ମଡେଲ ରେଣୁ ଦେଶାଇଙ୍କୁ ବିବାହ କରିଥିଲେ ପବନ କଲ୍ୟାଣ । ତେବେ ୨୦୧୨ରେ ଉଭୟଙ୍କ ବୈବାହିକ ସମ୍ପର୍କର ଅନ୍ତ ଘଟିଥିଲା । ରେଣୁ ଓ ପବନଙ୍କର ଦୁଇଟି ସନ୍ତାନ ଅଛନ୍ତି । ସେମାନେ ହେଲେ ଅକିରା ନନ୍ଦନ ଏବଂ ଆଧ୍ୟା । ସେହିପରି ୨୦୧୩ ମସିହାରେ ପବନ କଲ୍ୟାଣ ତୃତୀୟ ବିବାହ ଆନା କୋନିଡେଲାଙ୍କୁ କରିଥିଲେ । ଆନା ମୂଳତଃ ରୁଷିଆର ବାସିନ୍ଦା । ଉଭୟଙ୍କର ଦୁଇଟି ସନ୍ତାନ ରହିଛନ୍ତି ।
ପବନ କଲ୍ୟାଣଙ୍କ କାର୍ଯ୍ୟାଳୟ ପକ୍ଷରୁ ଜାରି ବିବୃତ୍ତିରେ ଅନୁଯାୟୀ, ଜୀବନର ଏକ ଗୁରୁତ୍ୱପୂର୍ଣ୍ଣ ସମୟ ଏକାଠି ବିତାଇବା ପରେ ଉଭୟ ପାରସ୍ପରିକ ବୁଝାମଣା ଓ ସମ୍ମାନର ସହ ଅଲଗା ହେବାକୁ ନିଷ୍ପତ୍ତି ନେଇଛନ୍ତି । ବିବାହ ସମ୍ପର୍କର ଅନ୍ତ ଘଟିଥିଲେ ମଧ୍ୟ ଉଭୟ ଭଲ ବନ୍ଧୁ ହୋଇ ରହିବେ । ନିଜ ପିଲାମାନଙ୍କ ପାଇଁ ଦାୟିତ୍ୱବାନ ଅଭିଭାବକ ଭାବେ କାର୍ଯ୍ୟ କରିବେ।
ଏହି ବ୍ୟକ୍ତିଗତ ନିଷ୍ପତ୍ତି ସମ୍ପର୍କରେ ସୂଚନା ଦେବା ସହ ପବନ କଲ୍ୟାଣ ଓ ଆନା କୋନିଡେଲା ଲୋକଙ୍କୁ ସେମାନଙ୍କ ବ୍ୟକ୍ତିଗତ ଜୀବନକୁ ସମ୍ମାନ ଦେବାକୁ ଅନୁରୋଧ କରିଛନ୍ତି । ଏହି କଠିନ ସମୟରେ ସେମାନଙ୍କ ସହ ଛିଡ଼ା ହୋଇଥିବା ସମସ୍ତଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି ।
