ସଂଚାର ବ୍ୟୁରୋ: ଦେଶର ଷ୍ଟାର ରେସଲର (କୁସ୍ତିଯୋଦ୍ଧା) ତଥା ବର୍ତ୍ତମାନର କିସାନ କଂଗ୍ରେସର କାର୍ଯ୍ୟରତ ଅଧ୍ୟକ୍ଷ ବଜରଙ୍ଗ ପୁନିଆଙ୍କୁ ହତ୍ୟା ଧମକ ମିଳିଛି । ହ୍ବାଟ୍ସ ଆପ୍ ମେସେଜ୍ ମାଧ୍ୟମରେ ତାଙ୍କୁ ଏହି ହତ୍ୟା ଧମକ ଆସିଛି । ଏକ ବିଦେଶୀ ନମ୍ବରରୁ ଏହି ଧମକଭରା ମେସେଜ୍ ତାଙ୍କୁ ମିଳିଛି । ତେବେ ମେସେଜ୍ରେ ଏହା ଲେଖାଯାଇଛି ଯେ, ବଜରଙ୍ଗ କଂଗ୍ରେସ ଛାଡ, ନଚେତ୍ ଏହା ତୁମ ଏବଂ ତୁମର ପରିବାର ପାଇଁ ଭଲ ହେବ ନାହିଁ, ଏହା ଆମର ଶେଷ ବାର୍ତ୍ତା ।
ନିର୍ବାଚନ ପୂର୍ବରୁ ଆମେ ଦେଖାଇବୁ ଆମେ କଣ । ଆପଣ ଯେଉଁଠାରେ ଚାହାଁନ୍ତି ଅଭିଯୋଗ କରନ୍ତୁ, ଏହା ଆମର ପ୍ରଥମ ଏବଂ ଶେଷ ଚେତାବନୀ । ତେବେ ମେସେଜ ପାଇବା ପରେ ବଜରଙ୍ଗ ପୁନିଆ ସୋନିପତର ବାହାଲଗଡ ପୋଲିସ ଷ୍ଟେସନରେ ଅଭିଯୋଗ କରିଛନ୍ତି । ପୋଲିସ ଏହି ଘଟଣାର ଗୁରୁତର ତଦନ୍ତ କରୁଛି।
ସୂଚନାଥାଉକି, କୁସ୍ତିଯୋଦ୍ଧା ବିନେଶ ଫୋଗାଟ ଏବଂ ବଜରଙ୍ଗ ପୁନିଆ ରାଜନୈତିକ ମଞ୍ଚରେ ପ୍ରବେଶ କରି ଶୁକ୍ରବାର ଦିନ କଂଗ୍ରେସ ସହ ହାତ ମିଳାଇଥିଲେ । କଂଗ୍ରେସର ଜାତୀୟ ସାଧାରଣ ସମ୍ପାଦକ କେ ସି ବେଣୁଗୋପାଲ ବିନେଶ ଏବଂ ବଜରଙ୍ଗଙ୍କୁ ଦଳର ସଦସ୍ୟତା ଦେଇଥିଲେ । ସେ କଂଗ୍ରେସରେ ଯୋଗଦେବା ମାତ୍ରେ ଦଳ ବଜରଙ୍ଗ ପୁନିଆକୁ ଏକ ବଡ ଦାୟିତ୍ବ ଦେଇଛି। କଂଗ୍ରେସ ବଜରଙ୍ଗ ପୁନିଆକୁ କୃଷକ ସେଲର ଜାତୀୟ କାର୍ଯ୍ୟକାରିଣୀ ସଭାପତି କରିଛି ।
