ବ୍ୟବସାୟୀ ସୁଧୀର ପାତ୍ର ଅପହରଣ ଓ ହତ୍ୟା ଉପରୁ ହଟୁଛି ପରଦା । ହତ୍ୟା ପଛରେ ନିଜ ଝିଆରୀ ମାଷ୍ଟରମାଇଣ୍ଡ ବୋଲି ଜାଣିବାକୁ ପାଇଛି ପୋଲିସ । ଏହି ହତ୍ୟା ପଛରେ ରହିଛି ସମ୍ପତ୍ତି ଭାଗବଣ୍ଟା । ଏହି ଘଟଣାରେ ପୁତୁରା ଓ ଝିଆରୀ ସମେତ ୮ ଜଣଙ୍କୁ ଗିରଫ କରିଛି ପୋଲିସ । ଏହି ଘଟଣାରେ ପ୍ରଥମରୁ ହିଁ ସନ୍ଦେହ ଘେରରେ ଥିଲେ ସୁଧୀରଙ୍କ ବଡ଼ଭାଇଙ୍କ ଝିଅ, ପୁଅ ଓ ସ୍ତ୍ରୀ । ହତ୍ୟା ପଛରେ ଝିଆରୀର ପ୍ରେମିକ ଓ ତା ସହଯୋଗୀଙ୍କ ହାତ ଥିବା ପୋଲିସ ଜାଣିବାକୁ ପାଇଛି । ପ୍ରଥମ ପର୍ଯ୍ୟାୟରେ କାଳୁ ଚରଣ ପ୍ରଧାନ,ଶୁଭମ ନାୟକ,ଜିତୁନ ପୋଲାଈ, ଶୁଭମ ଗୌଡ଼ଙ୍କୁ ପୋଲିସ ଗିରଫ କରିଛି ।
ଗୋପାଳପୁର ସ୍ୱାସ୍ଥ୍ୟ କେନ୍ଦ୍ରରେ ସେମାନଙ୍କ ସ୍ୱାସ୍ଥ୍ୟ ପରୀକ୍ଷା କରାଇଛି । ଜମି ବ୍ୟବସାୟୀ ସୁଧୀର ପାତ୍ରଙ୍କୁ ସମ୍ପତ୍ତି ଭାଗବଣ୍ଟାକୁ କେନ୍ଦ୍ରକରି ଅପହରଣ ପରେ ହତ୍ୟା କରାଯାଇଛି । ସୁଧୀର ଓ ତାଙ୍କ ନିଜ ପୁତୁରା ଓ ଝିଆରୀଙ୍କ ମଧ୍ୟରେ ଘରର ସମ୍ପତ୍ତି ନେଇ ବିବାଦ ଲାଗି ରହିଥିଲା । ପୁତୁରା ଓ ଝିଆରୀ ମିଶି କିଛି ସୁପାରୀ କିଲରଙ୍କ ଜରିଆରେ ଏଭଳି କାଣ୍ଡ ଘଟାଇଛନ୍ତି ବୋଲି ଚର୍ଚ୍ଚା ହେଉଛି । ଗୋପାଳପୁର ଥାନା ଅନ୍ତର୍ଗତ ସତ୍ୟନାରାୟଣପୁର ଗାଁର ସୁଧୀର ପାତ୍ରଙ୍କୁ ଗତ ୧୫ ତାରିଖ ସନ୍ଧ୍ୟାରେ ଦୁର୍ବୁତ୍ତ ମାନେ ଅପହରଣ କରି ତାଙ୍କ ସ୍ତ୍ରୀଙ୍କୁ ଫୋନ କରି ଦୁଇ କୋଟି ମାଗିଥିଲେ । ଏପରିକି ତାଙ୍କୁ ନିର୍ଯାତନା ଦେବାର ଭିଡ଼ିଓ ପଠାଇଥିଲେ । ସେମାନେ ଟଙ୍କା ଓ ସୁନା ଧରି ଯାଇଥିଲେ ବି ଦୁର୍ବୁତ୍ତ ମାନେ ମୋବାଇଲ ସୁଇଚ ଅଫ କରି ସୁଧୀରଙ୍କୁ ହତ୍ୟା କରିଦେଇଥିଲେ । ସୋରଡ଼ା ନିକଟ ଏକ ଜଙ୍ଗଲରେ ସୁଧୀରଙ୍କ ମୃତଦେହକୁ ଠାବ କରି ତଦନ୍ତ ଚଳାଇଛି ।
