ହର୍ମୁଜ ପ୍ରଣାଳୀ ବନ୍ଦ କଲା ଇରାନ । ବନ୍ଦ ହେଲା ୮୦% ଜାହାଜ ଚଳାଚଳ । ଆକାଶଛୁଆଁ ହୋଇପାରେ ପେଟ୍ରୋଲ ଓ ଡିଜେଲ ଦର । ହର୍ମୁଜ ପ୍ରଣାଳୀକୁ “ବନ୍ଦ” ବୋଲି ଘୋଷଣା କରିଛନ୍ତି ଇରାନର ସେନା ଅଧିକାରୀ । ଯଦି କୌଣସି ଜାହାଜ ଏହି ବାଟ ଦେଇ ଯିବାକୁ ଚେଷ୍ଟା କରେ ତେବେ ସେଥିରେ ନିଆଁ ଲଗାଇ ଦିଆଯିବ ବୋଲି ସେମାନେ ଧମକ ଦେଇଛନ୍ତି । ଇରାନ ଉପରେ ହୋଇଥିବା ଆକ୍ରମଣ ଏବଂ ସର୍ବୋଚ୍ଚ ନେତା ଆୟାତୋଲ୍ଲା ଖାମେନେଇଙ୍କ ମୃତ୍ୟୁ ଖବର ପରେ ଇରାନ ଏହି ପଦକ୍ଷେପ ନେଇଛି ।
ସମୁଦ୍ର ପଥରେ ଜାହାଜ ଚଳାଚଳ ୮୦% କମିଯାଇଛି । ବଡ଼ ବଡ଼ କମ୍ପାନୀଗୁଡ଼ିକ ସେମାନଙ୍କ ଜାହାଜକୁ ଆଫ୍ରିକା ବାଟ ଦେଇ ବୁଲାଇ ନେଉଛନ୍ତି । ବୀମା କମ୍ପାନୀଗୁଡ଼ିକ ଏହି ଅଞ୍ଚଳ ପାଇଁ ସୁରକ୍ଷା ଦେବାକୁ ମନା କରିଦେଇଛନ୍ତି । ଯାହାଫଳରେ ବ୍ୟବସାୟିକ ଜାହାଜ ଚଳାଚଳ ଅସମ୍ଭବ ହୋଇପଡ଼ିଛି। ସେପଟେ ଆମେରିକା ସେନା କହିଛି ଯେ ଇରାନ ପକ୍ଷରୁ କୌଣସି ପ୍ରତିବନ୍ଧକ ଲଗାଯାଇ ନାହିଁ । କିନ୍ତୁ ଆକ୍ରମଣ ଭୟରେ କେହି ଏହି ବାଟରେ ଯାଉନାହାନ୍ତି। ହର୍ମୁଜ ପ୍ରଣାଳୀ ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ। ସାରା ବିଶ୍ୱର ପ୍ରାୟ ୨୦-୩୦% କ୍ରୁଡ୍ ଅଏଲ୍ ଏହି ସଂକୀର୍ଣ୍ଣ ବାଟ ଦେଇ ଯାଇଥାଏ ।
ସାଉଦି ଆରବ, ଇରାକ ଏବଂ କତାର ଭଳି ଦେଶ ଏହି ପଥ ଉପରେ ନିର୍ଭର କରନ୍ତି । ହର୍ମୁଜ ପ୍ରଣାଳୀ ବନ୍ଦ ଦ୍ବାରା ବିଶ୍ୱ ବଜାରରେ ଅଶୋଧିତ ତେଲ ଦର ବଢ଼ିବାର ଆଶଙ୍କା ରହିଛି । ଯାହାଦ୍ୱାରା ମହଙ୍ଗା ମାଡ଼ ବଢ଼ିପାରେ। ସେହିପରି ଜାହାଜ ବାଟ ବୁଲିକରି ଯିବା କାରଣରୁ ସାମଗ୍ରୀ ପହଞ୍ଚିବାରେ ସମୟ ଲାଗିବ ଏବଂ ଖର୍ଚ୍ଚ ମଧ୍ୟ ବଢ଼ିବ। ଯଦି ଏହି ପଥ ବହୁଦିନ ଧରି ବନ୍ଦ ରହେ, ତେବେ ଆମେରିକା ଓ ତାର ସହଯୋଗୀ ଦେଶମାନେ ସାମରିକ ଶକ୍ତି ପ୍ରୟୋଗ କରିପାରନ୍ତି, ଯାହା ଯୁଦ୍ଧକୁ ଆହୁରି ଭୟଙ୍କର କରିବ ।
