ସଂଚାର ବ୍ୟୁରୋ: ପଦ ଛାଡ଼ିଲେ ଦେବାଶିଷ ସାମନ୍ତରାୟ । ବିଜେଡିର ପଦ ଛାଡ଼ିଲେ ସାଂସଦ ଦେବାଶିଷ ସାମନ୍ତରାୟ । ସିନିୟର୍ ସିଟିଜେନ୍ ସେଲ୍ ଉପସଭାପତି ପଦରୁ ଇସ୍ତଫା ଦେଲେ । ବିଜେଡି ସଭାପତି ନବୀନ ପଟ୍ଟନାୟକଙ୍କ ପାଖକୁ ପଠାଇଲେ ଇସ୍ତଫାପତ୍ର । ଦଳ ତାଙ୍କୁ ଗୁରୁତ୍ୱ ଦେଉନଥିବା ଦର୍ଶାଇ ଇସ୍ତଫା ଦେଲେ । ବିଜୁ ବାବୁଙ୍କ ଆଦର୍ଶରେ ଆଉ ଦଳ ଚାଲୁନଥିବା ଚିଠିରେ ଦର୍ଶାଇଲେ।
ନୂଆପଡାରେ ବିଜେଡି ପ୍ରାର୍ଥୀ ଚୟନ ନେଇ ପ୍ରଶ୍ନ ଉଠାଇଥିଲେ ଦେବାଶିଷ । ବିଜେଡି ପୂର୍ବ ଆଦର୍ଶରେ ଚାଲୁନି ବୋଲି ଅଭିଯୋଗ ଆଣିଛନ୍ତି ସାଂସଦ। ଏହାସହ ବରିଷ୍ଠ ନାଗରିକ ସେଲ ସଭାପତି ପଦରୁ ଇସ୍ତଫା ଦେଲେ ଦେବାଶିଷ ସାମନ୍ତରାୟ।
ଗତ କିଛିଦିନ ଧରି ଦଳୀୟ ଅସନ୍ତୋଷ ଜାହିର କରିଥିଲେ ଦେବାଶିଷ ସାମନ୍ତରାୟ । ନିକଟରେ ଶ୍ରୀମୟୀ ମିଶ୍ରଙ୍କ ସପକ୍ଷରେ ଯୁକ୍ତି ବାଢିଥିଲେ ବରିଷ୍ଠ ବିଜେଡି ନେତା ଦେବାଶିଷ ସାମନ୍ତରାୟ । ଶ୍ରୀମୟୀ ଯେତେବେଳେ ଯାହା କହିଛନ୍ତି ଠିକ୍ କହିଛନ୍ତି । ଟିକେଟ୍ ଦେବାକୁ କହି ଦଳ ତାଙ୍କୁ ନିର୍ବାଚନ ମଣ୍ଡଳୀ ବୁଲାଇଥିଲା । କିନ୍ତୁ ଦଳ ଶ୍ରୀମୟୀଙ୍କୁ ଟିକେଟ୍ ଦେଲା ନାହିଁ । ଶ୍ରୀମୟୀ ଯେଉଁ ସବୁ କଥା କହିଛନ୍ତି ସେଥିରେ ସତ୍ୟ ରହିଛି ବୋଲି ଦେବାଶିଷ ସାମନ୍ତରାୟ କହିଛନ୍ତି ।
କେବଳ ତାହା ନୁହେଁ ଦଳର ବରିଷ୍ଠ ନେତ୍ରୀ ଶ୍ରୀମୟୀ ମିଶ୍ରଙ୍କୁ ଦଳ ଏକ ପ୍ରକାର ନିର୍ଯାତନା ଦେଇଛି ବୋଲି ସେ କହିଛନ୍ତି । ସେହିପରି ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ସ୍ବାସ୍ଥ୍ୟାବସ୍ଥା ନେଇ ଭି.କେ ପାଣ୍ଡିଆନଙ୍କୁ ଟାର୍ଗେଟ କରି ବିସ୍ଫୋରକ ବୟାନ ଦେଇଥିଲେ ଦଳର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ। ନବୀନଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ନେତାମାନଙ୍କୁ ଓ ରାଜ୍ୟବାସୀଙ୍କୁ ନଜଣାଇବା ପାଣ୍ଡିଆନଙ୍କ ବଡ଼ ଭୁଲ ଓ ଦଳ ପାଇଁ କ୍ଷତି ବୋଲି ସେ କହିଥିଲେ।
ନୂଆପଡ଼ା ବିପର୍ଯ୍ୟୟ ପରେ ବିଭାଜନ ମୁହାଁ ବିରୋଧୀ । ସଂଗଠନ ସଜାଡ଼ିବା ପାଇଁ କସରତ ଆରମ୍ଭ କଲେ କଂଗ୍ରେସ ଓ ବିଜେଡି ସଭାପତି । ପିଏସି ବୈଠକ ଡାକି କାରଣ ଖୋଜିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସେପଟେ ରାହୁଲଙ୍କୁ ଭେଟିବା ପରେ ରାଜ୍ୟ ନେତୃତ୍ୱଙ୍କ ମାନସ ମନ୍ଥନ କଲେ ପିସିସି ସଭାପତି ଭକ୍ତ ଦାସ । ବିରୋଧୀଙ୍କ ତଣ୍ଟିରେ ଲାଗିଛି ନୂଆପଡ଼ା ବିପର୍ଯ୍ୟୟର କଣ୍ଟା । ନା ଗିଳି ପାରୁଛନ୍ତି ନା ବାହାର କରି ପାରୁଛନ୍ତି । ବିପର୍ଯ୍ୟୟ ପରେ ମୁଣ୍ଡ ଟେକିଥିବା ବିଦ୍ରୋହର ସ୍ଵର ଦଳ ବିଭାଜନର କାରଣ ପାଲଟିଛି ।
ଯାହାକୁ ନେଇ ଉଭୟ ବିଜେଡି ଓ କଂଗ୍ରେସ ସଭାପତିଙ୍କର ବଢିଛି ମୁଣ୍ଡ ବିନ୍ଧା । ସଂଗଠନ ସଜାଡ଼ିବା ପାଇଁ ପଲ୍ଲୀରୁ ନେଇ ଦିଲ୍ଲୀ ପର୍ଯ୍ୟନ୍ତ କସରତ ଚଳାଇଛନ୍ତି ନବୀନ ପଟ୍ଟନାୟକ ଓ ଭକ୍ତ ଦାସ । ଶନିବାର ବିଜେଡି ସୁପ୍ରିମୋ ରାଜନୈତିକ ବ୍ୟାପାର କମିଟିର ବୈଠକ ଡାକି ଆଗାମୀ ରଣନୀତି ବିଷୟରେ ଆଲୋଚନା କରିବା ସହ ବିପର୍ଯ୍ୟୟର ରିପୋର୍ଟ ମାଗିଛନ୍ତି । ଖାଲି ସେତିକି ନୁହେଁ ଭାଙ୍ଗି ପଡ଼ିଥିବା କର୍ମୀଙ୍କ ମନୋବଳ ବଢାଇବା, ତୃଣମୂଳ ସ୍ତରରୁ ସଂଗଠନ ସୁଦୃଢ କରିବା ଓ ସଂଗଠନ ବଞ୍ଚେଇବା ଲାଗି ସରକାର ବିରୋଧରେ ଆନ୍ଦୋଳନର ଡାକରା ଦେବା ଲାଗି ଦେଇଛନ୍ତି ନିର୍ଦ୍ଦେଶ ।
