ସଂଚାର ବ୍ୟୁରୋ: ପ୍ରେମିକ ସାଜିଲା ସୈତାନ । ବାହାନା କରି ଲଜ୍ କୁ ଡାକିନେବା ପରେ ଦୁଇ ବନ୍ଧୁଙ୍କ ସହ କଲା ଗଣଦୁଷ୍କର୍ମ । ରାଜଧାନୀ ଭୁବନେଶ୍ବରରେ ଚାଞ୍ଚଲ୍ୟ । ଅଭିଯୋଗ ପରେ ୩ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଅଭିଯୁକ୍ତ ହେଲେ ଜଗତସିଂହପୁର ବିରିଡା ଥାନା ଅଞ୍ଚଳର ଚନ୍ଦନ କୁମାର ହାତୀ, ପ୍ରସନ୍ନ କୁମାର ଆଚାର୍ଯ୍ୟ ଓ ତୁମ୍ବା ଅଧେଇସାହିର ରାଜେଶ କୁମାର ଦାସ । ଚନ୍ଦନଙ୍କର ସୋସିଆଲ ମିଡିଆରେ ଜଣେ ଯୁବତୀଙ୍କ ସହ ଚିହ୍ନା ହୋଇଥିଲା । ପରେ ସେମାନଙ୍କ ସମ୍ପର୍କ ନିବିଡ ହୋଇଥିଲା ।
ପରେ ଗତ ୧୦ ତାରିଖରେ ଫଟୋସୁଟ୍ କରିବା ବାହାନାରେ ଯୁବତୀଙ୍କୁ ଏକ ଲଜ୍ କୁ ଡାକିଥିଲା ଚନ୍ଦନ । ଯୁବତୀ ଜଣକ ପହଁଞ୍ଚିବା ପରେ କୋଲ୍ ଡ୍ରିଙ୍କସ୍ ରେ ନିଶା ମିଶାଇ ନିଆଇ ଦେଇଥିଲେ । ପରେ ୩ ଜଣ ମିଶି ଦୁଷ୍କର୍ମ କରିଥିଲେ। ଚେତା ଫେରିବା ପରେ କୌଶଳ କ୍ରମେ ଖସିଆସିଥିଲେ ଯୁବତୀ । ୧୧ ତାରିଖରେ ମହିଳା ଥାନାକୁ ଯାଇ ଅଭିଯୋଗ କରିଥିଲେ । ବିଭିନ୍ନ ସ୍ଥାନରେ ଚଢ଼ାଉ କରି ଗତକାଲି ୩ ଅଭିଯୁକ୍ତଙ୍କୁ ଗିରଫ କରିଛି ପୋଲିସ ।
