ନାରୀ ନିର୍ଯାତନାକୁ ନେଇ ନବୀନଙ୍କ ଉଦ୍ ବେଗ । କହିଛନ୍ତି, ଯାଜପୁରରେ ବଳାତ୍କାର, ଜଗତସିଂପୁର ଏବଂ ମାଲକାନଗିରିରେ ଗଣଦୁଷ୍କର୍ମ ଏବଂ ପୁରୀରେ ଯୌନ ନିର୍ଯାତନା ଆମ ସମସ୍ତଙ୍କୁ ଗଭୀର ଭାବରେ ଦୁଃଖିତ ଏବଂ ଭୟଭୀତ କରିଛି। ମହିଳାଙ୍କ ବିରୁଦ୍ଧରେ ଅପରାଧର ଏକ ବିବ୍ରତକର ଧାରା ଓଡ଼ିଶାକୁ କବଳିତ କରୁଛି । ଉଭୟ ସହରାଞ୍ଚଳ ଓ ଗ୍ରାମାଞ୍ଚଳ ରାସ୍ତା ମହିଳାଙ୍କ ପାଇଁ ଅସୁରକ୍ଷିତ ପାଲଟିଛି । ସ୍କୁଲ, କଲେଜ ଓ ଟ୍ୟୁସନରୁ ଫେରୁଥିବା ଛାତ୍ରୀ ଅସୁରକ୍ଷିତ ମଣୁଛନ୍ତି ।
ବିପଦ ଏବେ ଦୈନନ୍ଦିନ ସାଧାରଣ ସ୍ଥାନଗୁଡ଼ିକରେ ଲୁଚି ରହିଛି । ଯୌନ ନିର୍ଯାତନା ବୃଦ୍ଧି ଆଇନ ଶୃଙ୍ଖଳାର ଦୁର୍ବଳତାକୁ ଦର୍ଶାଉଛି ବୋଲି କହିଛନ୍ତି ନବୀନ । ଏନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ନବୀନ । କହିଛନ୍ତି, ଯେତେବେଳେ ପୋଲିସର ବିଭିନ୍ନ ପଦାଧିକାରୀ ରାଜନୈତିକ ଚାପର ସମ୍ମୁଖୀନ ହୁଅନ୍ତି ସେତେବେଳେ ଉତ୍ତରଦାୟିତ୍ୱ ଦୁର୍ବଳ ହୋଇଯାଏ ଏହା ସହ ଏବଂ ମହିଳା ଏବଂ ଝିଅମାନେ ପ୍ରଥମେ ମୂଲ୍ୟ ଦିଅନ୍ତି ।
ଏହା ସହ ଟ୍ରମ୍ପ ସରକାରଙ୍କ ଗାଇଡଲାଇନମୁ ମନେ ପକାଇଦେଇଛନ୍ତି ନବୀନ । ଗତ ମାସରେ ଓଡ଼ିଶା ସହ ୬ଟି ରାଜ୍ୟକୁ ଆମେରିକା ପ୍ରଶାସନ ନିଜ କର୍ମଚାରୀଙ୍କ ପାଇଁ କଟକଣା ଜାରି କରିଥିଲା । ଯେଉଁଥିରେ ରାଜଧାନୀ ବାହାରକୁ ଯାତ୍ରା କରିବା ପାଇଁ ବିଶେଷ ଅନୁମୋଦନ ନେବାକୁ ପଡିବ । ଏହା ମହିଳାଙ୍କ ବିରୋଧରେ ବଢୁଥିବା ଅପରାଧକୁ ଦର୍ଶାଉଛି ବୋଲି କହିଛନ୍ତି ନବୀନ ।
ସେହିପରି ରେଭେନ୍ସା ବିଶ୍ୱବିଦ୍ୟାଳୟର ୧୭ ଜୁଲାଇ ନିର୍ଦ୍ଦେଶ ମହିଳାଙ୍କ ପ୍ରତି ସଙ୍କଟକୁ ଆହୁରି ପ୍ରଦର୍ଶିତ କରିଥିଲା। ଯେଉଁଥିରେ କୁହାଯାଇଥିଲା ସନ୍ଧ୍ୟା ୫:୩୦ ପରେ କ୍ୟାମ୍ପସରେ ମହିଳାମାନଙ୍କୁ ରହିବେନି । ଯଦିଓ ଜନସାଧାରଣଙ୍କ ଆକ୍ରୋଶ ପରେ ଏହାକୁ ପ୍ରତ୍ୟାହାର କରାଯାଇଥିଲା କିନ୍ତୁ ଏହି ନିର୍ଦ୍ଦେଶ ଏପରି ଏକ ମାନସିକତାକୁ ପ୍ରକାଶ କରିଥିଲା ଯାହା ମହିଳାମାନଙ୍କ ପାଇଁ ସାର୍ବଜନୀନ ସ୍ଥାନଗୁଡ଼ିକୁ ସୁରକ୍ଷିତ କରିବା ପରିବର୍ତ୍ତେ ପ୍ରତିବନ୍ଧିତ କରିବାକୁ ଚାହୁଁଛି । ବିଜେଡି ପ୍ରତ୍ୟେକ ମଞ୍ଚରେ ଆମର ମା’ ଏବଂ ଭଉଣୀମାନଙ୍କ ସୁରକ୍ଷା ପାଇଁ ସ୍ୱର ଉଠାଇବ ବୋଲି କହିଛନ୍ତି ବିରୋଧି ଦଳ ନେତା ନବୀନ ପଟ୍ଟନାୟକ ।
