ସଂଚାର ବ୍ୟୁରୋ: ବିମାନ ବନ୍ଦର ପାଖରେ ରହିବନି ବଡ଼ ବିଲ୍ଡିଂ । ଅହମ୍ମଦାବାଦ ବିମାନ ଦୁର୍ଘଟଣାର ଗୋଟିଏ ସପ୍ତାହ ପରେ କେନ୍ଦ୍ର ସରକାର ଏହି ନୂଆ ନିଷ୍ପତ୍ତି ନେଇଛନ୍ତି । ବିମାନ ବନ୍ଦର ନିକଟରେ ଥିବା ଘର ଓ ଗଛର ଉଚ୍ଚତା କମିବ । ଏନେଇ ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ ଘର ମାଲିକମାନଙ୍କୁ ନୋଟିସ୍ ଦିଆଯିବ । ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ବିମାନ ନିୟମ ୨୦୨୫ରେ ଏଭଳି ବିଜ୍ଞପ୍ତି ଜାରି କରିଛନ୍ତି ସରକାର । ସୂଚନାନୁଯାୟୀ, ବେସାମରିକ ବିମାନ ଚଳାଚଳ କର୍ତ୍ତୃପକ୍ଷଙ୍କ ଠାରୁ ନୋଟିସ୍ ପାଇବାର ୬୦ ଦିନ ଭିତରେ ଘରର ଉଚ୍ଚତା କମ୍ କରିବେ ମାଲିକ ।
ବିମାନ ଉଡ଼ାଣ ପଥଗୁଡ଼ିକରେ ବାଧା ସୃଷ୍ଟି କରୁଥିବା ସମ୍ଭାବ୍ୟ ଦୁର୍ଘଟଣାକୁ ରୋକିବା ପାଇଁ ଏଭଳି ସକ୍ରିୟ ଓ ଦୃଢ଼ ପଦକ୍ଷେପ ନିଆଯାଉଛି । ବିମାନ ଉଡାଣରେ କୌଣସି ଗଛ ଅବରୋଧ କରୁଥିଲେ ତାହାକୁ ତୁରନ୍ତ କଟାଯିବ । ଏଥିରେ ଘର ମାଲିକ କ୍ଷତିପୂରଣ ପାଇଁ ଆବେଦନ କରି ପାରିବେ । ଯଦି ଘର ମାଲିକ ନିର୍ଦ୍ଧାରିତ ସମୟ ଭିତରେ ଘର ନଭାଙ୍ଗିବେ କିମ୍ବା ଘରର ଉଚ୍ଚତା କମ୍ ନକରିବେ ତେବେ ଏନେଇ ଏରୋଡ୍ରମ ଅଧିକାରୀ ଜିଲ୍ଲାପାଳଙ୍କୁ ଅବଗତ କରିବେ । ଏହାପରେ ଜିଲ୍ଲାପାଳଙ୍କ ହସ୍ତକ୍ଷେପରେ ଘର ଓ ଗଛର ଉଚ୍ଚତା କମାଯିବ ।
ତେବେ ୬୦ ଦିନ ଭିତର ମାଲିକମାନେ ଏହା କରିବାକୁ ବାଧ୍ୟ । ଯଦି କିଛି ବଡ଼ ସମସ୍ୟା ରହିଥାଏ ତେବେ ଉପଯୁକ୍ତ କାରଣ ଦର୍ଶାଇଲେ ଆଉ ୬୦ ଦିନ ସମୟ ଦିଆଯିବ । ଘର ଏବ ଗଛର ଉଚ୍ଚତା ମାପିବା ପାଇଁ ସରକାରୀ ଅଧିକାରୀମାନେ ଯେକୌଣସି ଘର ପରିସରରେ ମାଲିକଙ୍କୁ ସୂଚନା ଦେଇ ପ୍ରବେଶ କରି ପାରିବେ । ଯଦି କେହି ବିରୋଧ କରନ୍ତି ତେବେ ସେମାନେ ଡିଜିସିଏକୁ ତାଙ୍କ ବିରୋଧରେ ରିପୋର୍ଟ କରିବେ । ସେହିପରି ଯାଞ୍ଚ ପରେ ଘର ଭାଙ୍ଗି କିମ୍ବା ଗଛ କାଟିବା ନେଇ ଅଧିକାରୀମାନେ ଜିଲ୍ଲାପାଳଙ୍କୁ ଅବଗତ କରାଇବେ ।
ଘର ଓ ଗଛ ବାବଦରେ କ୍ଷତିପୂରଣ ମଧ୍ୟ ପ୍ରଦାନ କରାଯିବ । ତେବେ ବିଜ୍ଞପ୍ତି ପ୍ରକାଶ ପରେ ଯେଉଁମାନଙ୍କ ଘର ଅଧାଗଢ଼ା ହୋଇ ରହିଛି ସେମାନଙ୍କର ଭଙ୍ଗା ଗଲେ ସେମାନେ କ୍ଷତିପୂରଣ ପାଇ ପାରିବେ ନାହିଁ । ଅବଶ୍ୟ ବିଜ୍ଞପ୍ତି ପ୍ରକାଶର ୨୦ ଦିନ ମଧ୍ୟରେ ଜନସାଧାରଣଙ୍କ ଠାରୁ ଏ ନେଇ ମତାମତ ମଗା ଯାଇଛି । ସେମାନେ ସିଭିଲ ଏଭିଏସନ୍ ଡାଇରେକ୍ଟର ଜେନେରାଲଙ୍କ ନିକଟକୁ ସିଧାସଳଖ ସେମାନଙ୍କ ମତାମତ ଓ ପ୍ରସ୍ତାବ ପଠାଇ ପାରିବେ ।
ସୂଚନାଯୋଗ୍ୟ, ଜୁନ୍ ୧୨ରେ ଗୁଜରାଟରେ ବଡ଼ ଧରଣର ଏୟାର ଇଣ୍ଡିଆ ବିମାନ କ୍ରାସ ହୋଇଥିଲା । ଏହି ଅହମ୍ମଦାବାଦ ଦୁର୍ଘଟଣା ସମୟରେ ପ୍ଲେନରେ ଥିବା ୨୪୨ ଯାତ୍ରୀଙ୍କ ମଧ୍ୟରୁ ୨୪୧ ପ୍ରାଣ ହରାଇଥିଲେ । ସେହି ଦୁର୍ଘଟଣାରେ କେବଳ ଜଣେ ଯାତ୍ରୀ ବଞ୍ଚି ଯାଇଥିଲେ । ସେ ଜଣକ ହେଉଛନ୍ତି ବିଶ୍ୱାସ କୁମାର ରମେଶ । ଯାହାଙ୍କର ଏକ ଭିଡିଓ ଏବେ ସାମ୍ନାକୁ ଆସିଛି । ଘନ ଧୂଆଁ ଭିତରୁ ରମେଶ ବାହାରକୁ ଆସୁଥିବାର ସେହି ଭିଡିଓରେ ଦେଖିବାକୁ ମିଳିଥିଲା । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଥିଲା । ତେବେ ବିମାନ ବନ୍ଦର ନିକଟରେ ଉଚ୍ଚା ବିଲଡିଂ ଏବଂ ଗଛ ଏକ ବଡ଼ ସମସ୍ୟା ହୋଇ ରହିଛି । ଯାହାକୁ ହଟାଇବା ପାଇଁ ଏବେ ପ୍ରୟାସ ଆରମ୍ଭ ହୋଇଛି ।
