ସଂଚାର ବ୍ୟୁରୋ: ଆନ୍ଧ୍ରପ୍ରଦେଶର ତିରୁପତି ମନ୍ଦିରରେ ଦଳଚକଟା ଘଟି ୬ ଜଣ ପ୍ରାଣ ହରାଇଛନ୍ତି । ଟୋକେନ ନେବାକୁ ଲୋକଙ୍କ ପ୍ରବଳ ଗହଳି ଲାଗିଥିବାବେଳେ ଏଭଳି ଅଘଟଣ ଘଟିଛି । ବୈକୁଣ୍ଠ ଏକାଦଶୀ ପାଇଁ ଭଗବାନ ବିଷ୍ଣୁଙ୍କୁ ଦର୍ଶନ କରିବାକୁ ହଜାର ହଜାର ଲୋକ ତିରୁପତିରେ ଏକାଠି ହୋଇଛନ୍ତି। ପ୍ରାୟ ୪ ହଜାର ଲୋକ ଟୋକେନ ପାଇଁ ଲାଇନ ଲଗାଇଥିଲେ । ଏହି ସମୟରେ ଦଳଚକଟା ହୋଇଛି । ୬ ଜଣ ପ୍ରାଣ ହରାଇଥିବାବେଳେ ୨୫ରୁ ଅଧିକ ଆହତ ହୋଇଛି । ମୃତକଙ୍କ ମଧ୍ୟରେ ଜଣେ ମହିଳା ଭକ୍ତ ଥିବା ସୂଚନା ମିଳିଛି। ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଘଟଣାରେ ଦୁଃଖ ପ୍ରକାଶ କରିବା ସହ ଉଚ୍ଚ ଅଧିକାରୀଙ୍କ ସହ ଜରୁରୀ ବୈଠକ କରିଛନ୍ତି । ଆହତଙ୍କ ଚିକିତ୍ସା ସମ୍ପର୍କରେ ପଚାରିବୁଝିଛନ୍ତି। ବୈକୁଣ୍ଠ ଦ୍ବାର ଦର୍ଶନ କେନ୍ଦ୍ର ନିକଟରେ ଏଭଳି ଦଳଚକଟା ହୋଇଛି । ଦର୍ଶନ ପାଇଁ ବୈକୁଣ୍ଠ ଦ୍ବାର ଦଶଦିନ ଲାଗି ଖୋଲାଯାଇଛି, ଆଉ ଏଠାରେ ହଜାର ହଜାର ଭକ୍ତଙ୍କ ସମାଗମ ହୋଇଛି । ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ଜରୁରୀ ବୈଠକ ଡକାଯାଇଛି । ପ୍ରଶାସନିକ ଅଧିକାରୀଙ୍କୁ ଘଟଣାସ୍ଥଳକୁ ଯିବାକୁ କୁହାଯାଇଛି ।
