ସଂଚାର ବ୍ୟୁରୋ: ପୁଣି ସାମ୍ନାକୁ ଆସିଲା ଦାଦନ ଦୁଃଖ । ଭିଡିଓ ଜରିଆରେ ଉଦ୍ଧାର ପାଇଁ ନିବେଦନ କଲେ ଦାଦନ ଶ୍ରମିକ । ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ ମହୁଲବାହାଲି ଗାଁର ଦାଦନ ଶ୍ରମିକମାନେ ହାଇଦ୍ରାବାଦ ବନଗିରି ଗାଁର ଶୁଲିଆପାଲିରେ ଥିବା ଇଟା କାରଖାନାରେ କାମ କରୁଛନ୍ତି । ଇଟା ଭାଟିରେ କାମ କରୁଥିବା ଅନେକ ଶ୍ରମିକ ଏବେ ଡାଇରିଆରେ ଆକ୍ରାନ୍ତ ଅଛନ୍ତି । ସେମାନଙ୍କ ମଧ୍ୟରୁ କେତେକଙ୍କ ମୃତ୍ୟୁ ମଧ୍ୟ ହୋଇଗଲାଣି । ଇଟାଭାଟି ମାଲିକ ସେମାନଙ୍କର ଉଚିତ ଚକିତ୍ସା କରୁନଥିବା ସହ ଘରକୁ ଫେରିବାକୁ ମଧ୍ୟ ଅନୁମତି ଦେଉନାହାନ୍ତି । ଘରକୁ ଫେରିବା ପାଇଁ କହିବାରୁ ଇଟାଭାଟି ମାଲିକ ନିର୍ଯାତନା ଦେଉଥିବା ଶ୍ରମିକମାନେ ଅଭିଯୋଗ କରିଛନ୍ତି । ଏକ ଭିଡିଓ ଜାରି କରି ଉଦ୍ଧାର ପାଇଁ ନିବେଦନ କରିଛନ୍ତି ଶ୍ରମିକମାନେ । ଏନେଇ ବଲାଙ୍ଗୀର ଜିଲ୍ଲାପାଳ କହିଛନ୍ତି ଏକ ସ୍ବତନ୍ତ୍ର ଟିମ ଗଠନ କରାଯାଇ ସେମାନଙ୍କୁ ଉଦ୍ଧାର କରାଯିବ ।
