ସଂଚାର ବ୍ୟୁରୋ: ଭାରତ ସରକାରକୁ ବାପାର ଆକୁଳ ନିବେଦନ । ମୋ ପୁଅ ଦେହରେ କରାଯାଉ ରୁଷିଆ କ୍ୟାନସର ଟୀକାର ପରୀକ୍ଷଣ। ଉତ୍ତରପ୍ରଦେଶ ଲକ୍ଷ୍ନୌର ମନୁ ଶ୍ରୀବାସ୍ତବଙ୍କ କ୍ୟାନସର ପୀଡ଼ିତ ୨୧ ବର୍ଷର ପୁଅ ଅଂଶ ଦେହରେ ଏହି ଟୀକାର ପରୀକ୍ଷଣ କରିବାକୁ ସେ ଅନୁରୋଧ କରିଛନ୍ତି। କ୍ୟାନସରରେ ପୀଡିତ ଅଂଶ ଶ୍ରୀବାସ୍ତବଙ୍କ ଜୀବନ ରକ୍ଷା ପାଇଁ ଏହି ଟୀକା ଦେବାକୁ ବାପା ମନୁ ଶ୍ରୀବାସ୍ତବ ରୁଷ ସରକାରଙ୍କ ନିକଟରେ ଆବେଦନ କରିଥିଲେ। ରୁଷରେ ନିର୍ମିତ କର୍କଟ ଟିକା ଭାରତରେ ଉପଲବ୍ଧ ନାହିଁ। ତେଣୁ ସେ ତାଙ୍କ ପୁଅ ଉପରେ ଏହାର ଟିକା ପରୀକ୍ଷଣ କରିବାକୁ ରୁଷ ସରକାରଙ୍କୁ ଅନୁରୋଧ କରିଥିଲେ। ପୁଅ ଅଂଶ ଶ୍ରୀବାସ୍ତବଙ୍କ କର୍କଟ ସ୍ଥିତି ଚତୁର୍ଥ ଷ୍ଟେଜରେ ଥିବାରୁ ସେ ଏହି ଟିକା ଦେବାକୁ ଅନୁରୋଧ କରିଥିଲେ।
ଅଂଶ ଏବେ ଭାରତର ଚିକିତ୍ସା ଚାଲିଛି। ତେବେ ଡାକ୍ତର ସମ୍ପୂର୍ଣ୍ଣ ସୁସ୍ଥ ହେବା ନେଇ କୌଣସି ପ୍ରତିକ୍ରିୟା ଦେଇନାହାଁନ୍ତି। ସୁସ୍ଥ ହେବା ନେଇ କୌଣସି ନିଶ୍ଚିତତା ନଥିବାରୁ ରୁଷର ଏହି ଟୀକା ଦେବାକୁ ସେ ଅନୁରୋଧ କରିଛନ୍ତି। ପ୍ରସ୍ତାବ ରୁଷ ସରକାର ସ୍ଵାସ୍ଥ୍ୟ ମନ୍ତ୍ରାଳୟରେ ବିଚାରାଧୀନ ରହିଛି। ଭାରତ ସରକାରଙ୍କୁ ମଧ୍ୟ ଏନେଇ ଚିଠି ଲେଖିଥିଲେ ମନୁ ଶ୍ରୀବାସ୍ତବ। ତେବେ ଏହି ଟୀକା କେବଳ ରୁଷରେ କାର୍ଯ୍ୟକାରୀ ହେଉଥିବା କହିଛନ୍ତି ଭାରତ ସରକାର। ତେଣୁ ଭାରତ କିମ୍ବା ଅନ୍ୟ କୌଣସି ଦେଶ ଏପର୍ଯ୍ୟନ୍ତ ପରୀକ୍ଷଣ ପାଇଁ ଅନୁମୋଦନ ପାଇନାହିଁ।
ମନୁ ଶ୍ରୀବାସ୍ତବ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ସମେତ ରୁଷ, ଦକ୍ଷିଣ କୋରିଆର ବରିଷ୍ଠ ଅଧିକାରୀମାନଙ୍କୁ ଚିଠି ଲେଖି ଏହି ଟୀକାର ପରୀକ୍ଷଣରେ ସାମିଲ କରିବାକୁ ଅନୁରୋଧ କରିଥିଲେ। ଆବେଦନର ଜବାବରେ ଗତ ଅକ୍ଟୋବର ୨୭ରେ ରୁଷ ସରକାରଙ୍କ ଠାରୁ ଏକ ଚିଠି ମିଳିଥିଲା। ରୁଷିଆ କର୍କଟ ଟିକା ସଫଳତାର ସହ ପ୍ରିକ୍ଲିନିକାଲ୍ ପରୀକ୍ଷଣ ସମାପ୍ତ କରିଥିବା କହିଥିଲେ ରୁଷ କର୍ତ୍ତୃପକ୍ଷ।ଏହି ଟୀକା କର୍କଟ ରୋଗ ଚିକିତ୍ସାରେ ବହୁତ ପ୍ରଭାବଶାଳୀ ପ୍ରମାଣିତ ହେଉଛି। ଟୀକା ଦ୍ଵାରା ଟ୍ୟୁମର ଆକାରରେ ହ୍ରାସ ଏବଂ ଟ୍ୟୁମର ଅଗ୍ରଗତିକୁ ୬୦ ରୁ ୮୦% ପର୍ଯ୍ୟନ୍ତ କମାଯାଇଥିବା ଦେଖିବାକୁ ମିଳିଛି। ଏହି ଟିକା ଯୋଗୁଁ ରୋଗୀଙ୍କ ବଞ୍ଚିବାର ହାର ବୃଦ୍ଧି ପାଇଛି।
