ମହାକୁମ୍ଭ ୨୦୨୫ରେ ଦେଶ ଦୁନିଆରୁ ଲକ୍ଷ ଲକ୍ଷ ଭକ୍ତ ଆସୁଛନ୍ତି । ବଲିଉଡ୍ କୋରିଓଗ୍ରାଫର ରେମୋ ଡି’ସୁଜା ମଧ୍ୟ ଶନିବାର ମହାକୁମ୍ଭରେ ପହଞ୍ଚି ଆସ୍ଥାର ବୁଡ଼ ପକାଇଛନ୍ତି । ସେ ନିଜ ବେଶ ବଦଳାଇ ମହାକୁମ୍ଭରେ ପହଞ୍ଚିଥିଲେ । କଳା କପଡ଼ାରେ ମୁହଁକୁ ଢାଙ୍କି ରଖିଥିଲେ । ପ୍ରଥମ ନଜରରେ ତାଙ୍କୁ ଚିହ୍ନବା କଷ୍ଟକର ଥିଲେ ବି ଜଣେ ମହିଳା କିନ୍ତୁ ଚିହ୍ନି ନେଇଥିଲେ । ସେ ସଙ୍ଗମ ପାର୍ଶ୍ଵ ସିଡି ଦେଇ ଯିବା ବେଳେ ମହିଳା ଜଣକ ତାଙ୍କୁ ଚିହ୍ନିଥିଲେ । ସେ ରେମୋଙ୍କୁ ରୋକିବାକୁ ଚେଷ୍ଟା କରିଥିଲେ, ହେଲେ ରେମୋ ଅଟକି ନ ଥିଲେ ।
କୋରିଓଗ୍ରାଫର ନିଜର ଫଟୋ ଓ ଭିଡିଓ ଇନଷ୍ଟାଗ୍ରାମରେ ସେୟାର କରିଛନ୍ତି । ଏଥିରେ ସେ କଳା ପୋଷାକ ପିନ୍ଧି ହାତରେ ବ୍ୟାଗ୍ ଧରି ଚାଲୁଥିବାର ଦେଖାଯାଉଛି । ସାଥୀରେ ଅଛନ୍ତି ପତ୍ନୀ ଲିଜେଲ । ରେମୋ ସିଙ୍ଗମରେ ବୁଡ଼ ପକାଇବା ସହ ଧ୍ୟାନରେ ଲୀନ ଥିବା ଦେଖାଯାଇଛି । ସେ ଡଙ୍ଗାରେ ବସି ବୁଲିଥିଲେ । ପକ୍ଷୀମାନଙ୍କୁ ଦାନା ଖୁଆଇଥିଲେ । ପତ୍ନୀଙ୍କ ସହ ମହାକୁମ୍ଭରେ ପହଞ୍ଚିଥିବା ରେମୋ ସ୍ୱାମୀ କୈଳାଶାନନ୍ଦ ଗିରି ମହାରାଜଙ୍କ ପ୍ରବଚନ ଶୁଣିଥିଲେ ଏବଂ ଆଶୀର୍ବାଦ ନେଇଥିଲେ ।
ରେମୋଙ୍କ ଭିଡିଓ ଦେଖିଲେ ଲାଗୁଛି, ସେ ମହାକୁମ୍ଭରେ କିଛି ବି ଭିଆଇପି ଟ୍ରିଟମେଣ୍ଟ ନେଇନାହାନ୍ତି । ସେ ସାଧାରଣ ଶ୍ରଦ୍ଧାଳୁଙ୍କ ଭଳି ମହାକୁମ୍ଭ ଯାଇ ଆସ୍ଥାର ବୁଡ଼ ପକାଇଛନ୍ତି । ରେମୋଙ୍କ ସରଳତାକୁ ଦେଖି ଫ୍ୟାନମାନେ ତାଙ୍କ ଦିୱାନା ହୋଇଯାଇଛନ୍ତି । କମେଣ୍ଟ ସେକ୍ସନରେ ସେମାନେ ରେମୋଙ୍କୁ ଖୁବ୍ ପ୍ରଶଂସା କରିଛନ୍ତି ।
କହି ରଖୁଛୁ, ରେମୋଙ୍କ ପୂର୍ବରୁ ବଲିଉଡ୍ ଅଭିନେତା ଅନୁପମ ଖେର ଓ ସିଙ୍ଗର ଗୁରୁ ରନ୍ଧାୱା ମଧ୍ୟ ମହାକୁମ୍ଭରେ ବୁଡ଼ ପକାଇଥିଲେ ।
