ରିଜର୍ଭ ବ୍ୟାଙ୍କର ଋଣପ୍ରଦାନ ନୀତିକୁ ମାନୁନାହାନ୍ତି ବ୍ୟାଙ୍କ।ଏମଏସଏମଇ ପାଇଁ ଗରିବଙ୍କୁ ହତାଦର । ନ୍ୟାୟ ଦାବିରେ କଳିଙ୍ଗ ସେନାର ବିକ୍ଷୋଭ। ଭୁବନେଶ୍ଵର ରେଳଷ୍ଟେସନରୁ ଏକ ବିଶାଳ ପ୍ରତିବାଦ ଶୋଭାଯାତ୍ରା ବାହାରି ପିଏମଜି ଛକରେ ପହଞ୍ଚିଥିଲା । କ୍ଷୁଦ୍ର ବ୍ୟବସାୟୀ, ନୂତନ ଉଦ୍ୟୋଗୀ, କ୍ଷୁଦ୍ର ଓ ମଧ୍ୟମ ଉଦ୍ୟୋଗୀମାନଙ୍କୁ ଋଣ ନ ଦେବା ପ୍ରତିବାଦରେ ସେନାର ଶତାଧିକ କର୍ମୀ ବିକ୍ଷୋଭ ପ୍ରଦର୍ଶନ କରିଥିଲେ । ଲଘୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ନିମନ୍ତେ ବ୍ୟାଙ୍କ ଋଣ ପ୍ରଦାନରେ ବ୍ୟାପକ ମନମାନିର ତୀବ୍ର ସମାଲୋଚନା କରିଥିଲେ । କୃଷି ପରେ ଏମଏସଏମଇ ହେଉଛି ଦ୍ଵିତୀୟ ବୃହତ୍ତମ କର୍ମନିଯୁକ୍ତି କ୍ଷେତ୍ର । ଆତ୍ମନିର୍ଭରଶୀଳତା ପାଇଁ ଏଠାରେ ବ୍ୟାପକ ସୁଯୋଗ ରହିଛି । ଏସବୁ ଉଦ୍ୟୋଗ ପାଇଁ ବ୍ୟାଙ୍କମାନେ ବିନା ବନ୍ଧକରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପ୍ରଦାନ କରିବାକୁ ରିଜର୍ଭ ବ୍ୟାଙ୍କର ସ୍ପଷ୍ଟ ଗାଇଡଲାଇନ୍ ରହିଛି । ମାତ୍ର ଦୁର୍ଭାଗ୍ୟର କଥା ହେଉଛି, ବ୍ୟାଙ୍କମାନେ ରିଜର୍ଭ ବ୍ୟାଙ୍କର ଗାଇଡଲାଇନକୁ ମାନୁନାହାନ୍ତି । ବିନା ବନ୍ଧକରେ ଋଣ ଦେବାକୁ ବ୍ୟାଙ୍କ ସିଧା ସିଧା ମନା କରିଦେଉଛନ୍ତି । ଖାଲି ସେତିକି ନୁହେଁ, ୩ ବର୍ଷର ଆଇଟି ରିଟର୍ଣ୍ଣ କାଗଜପତ୍ର ମଧ୍ୟ ମଗାଯାଉଛି । ଏଥିରେ କ୍ଷୋଭ ପ୍ରକାଶ କରି ସେନା ପଚାରିଛି, ବାପାଙ୍କ ଋଣ ଟଙ୍କାରେ ପାଠ ପଢ଼ି ଆତ୍ମନିର୍ଭରଶୀଳ ହେବାକୁ ନିଷ୍ପତ୍ତି ନେଇଥିବା ଶିକ୍ଷିତ ଗରିବ ଯୁବକଟି ବ୍ୟାଙ୍କ ରଣ ପାଇବା ପାଇଁ ବନ୍ଧକ କେଉଁଠୁ ଯୋଗାଡ଼ କରିବ ? ଷ୍ଟାର୍ଟଅପ୍ ଆରମ୍ଭ କରିବାକୁ ମନସ୍ଥ କରିଥିବା ଗରିବ ଯୁବକଙ୍କ ପାଖରେ ୩ ବର୍ଷର ଆଇଟି ରିଟର୍ଣ୍ଣ କାଗଜପତ୍ର କେଉଁଠୁ ଆସିବ ? ବ୍ୟାଙ୍କମାନେ ଏ ସମ୍ପର୍କରେ କେବେ ଚିନ୍ତା କରିଛନ୍ତି କି ? ସରକାରଙ୍କ ଏମଏସଏମଇ ଯୋଜନା ତାହେଲେ କାହା ପାଇଁ ଉଦ୍ଦିଷ୍ଟ ବୋଲି ପ୍ରଶ୍ନ କରିଥିଲେ କଳିଙ୍ଗ ସେନା ସୁପ୍ରିମୋ ହେମନ୍ତ ରଥ । ବଡ଼ ବଡ଼ ପୁଞ୍ଜିପତିଙ୍କୁ ଲକ୍ଷ ଲକ୍ଷ କୋଟି ଟଙ୍କାର ଋଣ ଛାଡ଼ କରାଯାଉଥିବା ବେଳେ ଓଡ଼ିଶାର ଗରିବ ଶିକ୍ଷିତ ଯୁବକ ଯୁବତୀମାନଙ୍କୁ ନୂତନ ଉଦ୍ୟୋଗ ପ୍ରତିଷ୍ଠା ପାଇଁ ବ୍ୟାଙ୍କମାନେ ପ୍ରୋତ୍ସାହନ ଦେଉନାହାଁନ୍ତି କି ସହଯୋଗ କରୁନାହାନ୍ତି । ଯାହା କି ଅତ୍ୟନ୍ତ ଦୁର୍ଭାଗ୍ୟଜନକ । ଏ ଦିଗରେ ରାଜ୍ୟ ସରକାରଙ୍କ ଉଦାସୀନତା ଆହୁରି ଦୁଃଖଦାୟକ । ଋଣ ପ୍ରଦାନରେ ବ୍ୟାଙ୍କମାନଙ୍କର ମନମାନି ଏବଂ ବାଛ ବିଚାରକୁ ଆଉ ବରଦାସ୍ତ କରାଯିବ ନାହିଁ ବୋଲି ହେମନ୍ତ ଚେତାବନୀ ଦେଇଛନ୍ତି । ନଚେତ୍ ଆଗାମୀ ଦିନରେ ଆନ୍ଦୋଳନକୁ ବ୍ୟାପକ କରାଯିବବୋଲି ସେ ଚେତାବନୀ ଦେଇଛନ୍ତି ।
