ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଆସନ୍ତା ଡିସେମ୍ବରରେ ଭାରତ ଗସ୍ତରେ ଆସୁଛନ୍ତି । ତାଙ୍କ କାର୍ଯ୍ୟସୂଚୀ ପ୍ରକାଶ ପାଇଛି । ପୁଟିନ୍ ଡିସେମ୍ବର ୪ ଏବଂ ୫ ତାରିଖରେ ଭାରତ ଗସ୍ତରେ ରହିବେ । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ସାକ୍ଷାତ କରିବେ । ପୁଟିନ୍ ଭାରତ ଗସ୍ତ ଅନେକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ହେବ । ରୁଷ୍ ତୈଳ କିଣାକୁ ନେଇ ଡୋନାଲ୍ଡ ଟ୍ରମ୍ପ ଭାରତ ଉପରେ ଟାରିଫ୍ ଲଦିଛନ୍ତି । ଏପରି ସ୍ଥିତିରେ ପୁଟିନ୍ ଭାରତ ଗସ୍ତ ଗୁରୁତ୍ୱ ବହନ କରୁଛି । ବିଶେଷ କରି ପ୍ରତିରକ୍ଷା କ୍ଷେତ୍ରରେ ଦୁଇ ମଧ୍ୟରେ ଗୁରୁତ୍ୱପୂର୍ଣ୍ଣ ଆଲୋଚନା ହେବା ଆଶା କରାଯାଉଛି ।
ପୁଟିନ୍ଙ୍କ ଭାରତ ଗସ୍ତରେ ବୈଦେଶିକ ମନ୍ତ୍ରଣାଳୟ ସରକାରୀ ବିବୃତ୍ତି ଜାରି କରିଛି । ଏହି ଗସ୍ତରେ ପୁଟିନ୍ ନୂଆଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିବେ ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ମଧ୍ୟ ସାକ୍ଷାତ କରିବାର କାର୍ଯ୍ୟକ୍ରମ ରହିଛି । ଏହା ସହିତ ଏକ ନୈଶ୍ୟ ଭୋଜନର ମଧ୍ୟ ଆୟୋଜନ ହେବ । ୨୩ତମ ଭାରତ-ରୁଷ୍ ଶିଖର ସମ୍ମିଳନୀରେ ସାମିଲ ହେବେ ପୁଟିନ୍ । ଗସ୍ତରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କର ପ୍ରଗତି ସମୀକ୍ଷା କରାଯିବ । ପରବର୍ତ୍ତୀ ସହଯୋଗ ପାଇଁ ମାର୍ଗ ନିର୍ଦ୍ଧାରଣ କରାଯିବ । ଦୁଇ ବିଶ୍ୱ ନେତାଙ୍କ ମଧ୍ୟରେ ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ଆଲୋଚନା ହେବ । ଦୁଇ ଦେଶ ମଧ୍ୟରେ ଦୀର୍ଘକାଳାଳୀନ ରଣନୈତିକ ସମ୍ପର୍କକୁ ଆହୁରି ମଜବୁତ କରିବା ଉପରେ ମଧ୍ୟ ଧ୍ୟାନ ଦିଆଯିବ । ଏହା ପୂର୍ବରୁ ୨୦୨୧ରେ ପୁଟିନ୍ ନୂଆଦିଲ୍ଲୀ ଗସ୍ତ କରିଥିଲେ ।
ପ୍ରତିରକ୍ଷା କ୍ଷେତ୍ରରେ ଦୁଇ ଦେଶ ମଧ୍ୟରେ ଆଲୋଚନା ହେବ । ବିଶେଷ କରି ଭାରତ ରୁଷଠାରୁ ୫ଟି ନୂଆ ଏସ-୪୦୦ ମିସାଇଲ କିଣିବାକୁ ଲକ୍ଷ୍ୟ ରଖିଛି । ସେ ଦିଗରେ ନିଷ୍ପତ୍ତି ହେବା ଆଶା କରାଯାଉଛି । ରିପୋର୍ଟ ଅନୁସାରେ, ଭାରତର ‘ଅପରେସନ ସିନ୍ଦୁର’ରେ ବ୍ୟବହୃତ S-400 ବାୟୁ ପ୍ରତିରକ୍ଷା ପ୍ରଣାଳୀକୁ ବୃଦ୍ଧି କରିବା ପାଇଁ ୩୦୦ ରୁଷୀୟ କ୍ଷେପଣାସ୍ତ୍ର କ୍ରୟ ପାଇଁ ଏକ ଅନୁରୋଧ ପ୍ରସ୍ତାବ ଜାରି କରିପାରେ ।
ଡିସେମ୍ବର ୫ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ହେବାକୁ ଥିବା ବୈଠକରେ ପାଞ୍ଚଟି S-400 ସ୍କ୍ୱାର୍ଡନ ନେଇ ଆଲୋଚନା ହେବ । ଏହା ସହିତ ଭାରତ ରୁଷିଆର ପଞ୍ଚମ ପିଢ଼ିର ସୁଖୋଇ-୫୭ ଯୁଦ୍ଧ ବିମାନର ଦୁଇରୁ ତିନୋଟି ସ୍କ୍ୱାର୍ଡନ କିଣିବା ବିଷୟରେ ବିଚାର କରିପାରେ । ରୁଷ ଭରସା ଦେଇଛି କି, ଏସ-୪୦୦ର ଶେଷ ଦୁଇଟି ସ୍କ୍ୱାର୍ଡନ ପାଇଁ ୨୦୧୮ରେ ୫.୪ ଆରବ ଡଲାରରେ ହୋଇଥିବା ଚୁକ୍ତି ୨୦୨୬ ନଭେମ୍ବର ସୁଦ୍ଧା ଭାରତକୁ ଯୋଗାଇ ଦିଆଯିବ ।
ଭାରତ ଆସିବେ ପୁଟିନ୍ : ଡିସେମ୍ୱର ୪ରେ ଭାରତ ଆସିବେ ରୁଷ୍ ରାଷ୍ଟ୍ରପତି ପୁଟିନ୍ । ଦୁଇଦେଶ ମଧ୍ୟରେ ଶିଖର ବୈଠକ ହେବ । ପ୍ରଧାନମନ୍ତ୍ରୀ ମୋଦୀ ଓ ଭ୍ଲାଦିମିର ପୁଟିନଙ୍କ ମଧ୍ୟରେ ହେବ ସାକ୍ଷାତ । ଋଷ-ୟୁକ୍ରେନ ଯୁଦ୍ଧ ମଧ୍ୟରେ ପୁଟିନଙ୍କ ପ୍ରଥମ ଭାରତ ଗସ୍ତ । ବ୍ରିକ୍ସ ସମ୍ମିଳନୀ ଅବସରରେ ଶେଷଥର କାଜାନରେ ଦୁଇନେତା ଭେଟିଥିଲେ ।
