ସଂଚାର ବ୍ୟୁରୋ: ଶ୍ରୀମନ୍ଦିରରେ ଜେଟିପି କର୍ମଚାରୀ ନିୟୋଜନ ନେଇ ମନ୍ଦିର ପ୍ରଶାସନ ପକ୍ଷରୁ ଏକ ଘରୋଇ ସଂସ୍ଥାକୁ ଚିଠି କରାଯାଇଛି । ଏହାକୁ ନେଇ ସେବାୟତଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ମହା ପ୍ରଭୁଙ୍କ ସେବା ନେଇ ଦୀର୍ଘବର୍ଷ ହେବ ଜଗନ୍ନାଥ ଟେମ୍ପଲ ପୋଲିସ ବା ଜେଟିପି ନିୟୋଜିତ ହୋଇ ଆସୁଥିବା ବେଳେ ସେମାନଙ୍କର ନିଯୁକ୍ତି ପୂର୍ବରୁ ଶ୍ରୀମନ୍ଦିର ପ୍ରଶାସନ ନିଜେ କରି ଆସୁଥିଲା । ତେବେ ୭୫ଟି ଜେଟିପି ନିଯୁକ୍ତି ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏକ ଚିଠି କରାଯାଇଛି । ଚିଠିରେ ଭୁବନେଶ୍ଵର ସହିଦନଗରର ଏମ-ଏସ୍ ପ୍ରପର୍ଟି ସଲ୍ୟୁସନ ଇଣ୍ଡିଆ ପ୍ରାଇଭେଟ୍ ଲିମିଟେଡକୁ ନିଯୁକ୍ତିରେ ସହଯୋଗ ପାଇଁ ନିବେଦନ କରାଯାଇଛି । ଏହି ଚିଠିର ନମ୍ବର ରହିଛି ୨୬୦୨/୨୭.୦୨.୨୦୨୫ । ଚିଠିରେ ୬୦ଜଣ ପୁରୁଷ ଓ ୧୫ଜଣ ମହିଳାଙ୍କୁ ଜେଟିପି ସ୍କ୍ୱାଡ୍ ଭାବେ ନିଯୁକ୍ତି ଦେବା ପାଇଁ ଚିଠିରେ ଦର୍ଶାଯାଇଛି । ଯାହା ବେଆଇନ ବୋଲି ବିଭିନ୍ନ ମହଲରେ ଅଭିଯୋଗ କରାଯାଇଛି । ଅନ୍ୟ ପକ୍ଷରେ ଶ୍ରୀମନ୍ଦିରରେ ସେବାୟତ ପରିବାରର ସଦସ୍ୟ ମାନଙ୍କୁ ଜେଟିପିରେ ନିଯୁକ୍ତି ପାଇଁ ବରିଷ୍ଠ ସେବାୟତ ଦାବି କରିଛନ୍ତି । ସେପଟେ ଜେଟିପି ନିଯୁକ୍ତିରେ ଘରୋଇ ସଂସ୍ଥାକୁ ଚିଠିକୁ ନେଇ ଦୁର୍ଣ୍ଣିତିର ଗନ୍ଧ ବାରି ହେଉଥିବା କହିଛନ୍ତି ବୁଦ୍ଧିଜୀବୀ ।.
