ସଂଚାର ବ୍ୟୁରୋ: ଜ୍ୟୋତି ମାଲହୋତ୍ରା ଲିଙ୍କରେ ଆଜି ପଞ୍ଚମ ଦିନରେ ପ୍ରିୟଙ୍କା ସେନାପତିଙ୍କୁ ପଚରାଉଚରା ହେବ । ୪ ଦିନ ପଚରାଉଚରା ସରିଲାଣି । ଜୋରଦାର ହେଉଛି ଖୋଳତାଡ଼ । ଜ୍ୟୋତି ମାଲହୋତ୍ରା ପୁରୀ ଆସିବା ବେଳେ ତାଙ୍କୁ ବୁଲାବୁଲିରେ ସଂପୂର୍ଣ୍ଣ ସହାୟତା କରିଥିଲେ ପ୍ରିୟଙ୍କା । ଜ୍ୟୋତି ମାଲହୋତ୍ରାଙ୍କ ସହ କେଉଁ କେଉଁ ଜାଗା ବୁଲିଥିଲେ, କାହା ସଂସ୍ପର୍ଶରେ ଆସିଥିଲେ, ଜ୍ୟୋତି କାହା ସହ ପରିଚୟ କରାଇଥିଲେ, ଏନେଇ ତନାଘନା କରାଯାଉଛି । ସୋସିଆଲ ମିଡିଆ ପୋଷ୍ଟରୁ ଉଭୟଙ୍କ ମଧ୍ୟରେ ସଂପର୍କ ଅତି ଘନିଷ୍ଟ ଥିବା ସ୍ପଷ୍ଟ ଜଣାପଡୁଛି । ଜ୍ୟୋତିଙ୍କ ସହ ଲିଙ୍କ ନେଇ ଏନଆଇଏ, ଆଇବି, ରାଜ୍ୟ ଗୁଇନ୍ଦା ଓ ପୁରୀ ପୋଲିସ ତଦନ୍ତ ଚଳାଇଛନ୍ତି ।
ଜ୍ୟୋତିଙ୍କ ପୁରୀ ବୁଲିବା ଓ ଦିନ ତମାମ ବ୍ଲଗ୍ କରିବା ସମୟରେ ସହଯୋଗ କରିଥିଲେ ପ୍ରିୟଙ୍କା । ପରେ ଭିଡିଓକୁ ଅକ୍ଟୋବର ୪ ତାରିଖରେ ନିଜ ସୋସିଆଲ ଆକାଉଣ୍ଟରେ ଅପଲୋଡ କରିଥିଲେ ଜ୍ୟୋତି । ତେବେ ଜ୍ୟୋତି ଗିରଫ ହେବା ପରେ ମେ ୧୭ ତାରିଖରେ ପ୍ରିୟଙ୍କା ନିଜ ୟୁଟ୍ୟୁବରୁ ୨୫ଟି ଭିଡିଓ ଡିଲିଟ କରିଦେଇଛନ୍ତି । ଏହା ସହ ନିଜ ଇନଷ୍ଟା ଆକାଉଣ୍ଟକୁ ରେଷ୍ଟ୍ରିକ୍ଟ କରିଦେଇଛନ୍ତି । ଡିଲିଟ ହୋଇଥିବା ଭିଡିଓରେ କଣ କଣ୍ଟେଣ୍ଟ ଥିଲା? କାହିଁକି ପ୍ରିୟଙ୍କା ଏହାକୁ ଡିଲିଟ କଲେ? ତାଙ୍କ ଲାପଟପ ଓ ମୋବାଇଲର ଫରେନସିକ ଯାଞ୍ଚ କରୁଛି ତଦନ୍ତକାରୀ ସଂସ୍ଥା । ଜ୍ୟୋତି ପାକିସ୍ତାନ ପାଇଁ ଗୁଇନ୍ଦାଗିରି କରୁଥିବା ଜାଣିଥିଲେ କି ପ୍ରିୟଙ୍କା ? ସଂଦେହ ବଢ଼ୁଛି ।
