ସଂଚାର ବ୍ୟୁରୋ: ଗଞ୍ଜାମ ଜିଲ୍ଲା ଖଲ୍ଲିକୋଟ ପୋଲିସ କବଜାରେ ମୋଷ୍ଟ ୱାଣ୍ଟେଡ ଅପରାଧୀ । ଆନ୍ତଃରାଜ୍ଯ କ୍ରିମିନାଲ ପ୍ରଦୀପ ପରିଡ଼ାକୁ ଗିରଫ କରିଛି ପୋଲିସ୍ । ପ୍ରଦୀପ ବିରୋଧରେ ଗଞ୍ଜାମ ଜିଲ୍ଲା ଖଲ୍ଲିକୋଟ ସମେତ ଓଡିଶାର ବିଭିନ୍ନ ଥାନା ୪ଟି ନରହତ୍ୟା ଓ ୨୦ରୁ ଉର୍ଦ୍ଧ୍ବ ଡକାୟତି, ଦାଦାବଟି ଓ ରାହାଜାନି ମାମଲା ରହିଛି । ପ୍ରଦୀପ ପରିଡାକୁ ଖଲ୍ଲିକୋଟ ଥାନା ପୋଲିସ କେଶପୁର ଅଞ୍ଚଳରୁ ଗିରଫ କରିଛି । ଖଲ୍ଲିକୋଟ ଥାନା ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀ ଛତ୍ରପୁର ଏସଡ଼ିପିଓ ଗୌରହରୀ ସାହୁ ଏହି ସୂଚନା ଦେଇଛନ୍ତି । ଗତ ଏପ୍ରିଲ ୨୬ ତାରିଖରେ ଗଞ୍ଜେଇ ବେପାରରେ ପଇସା ଭାଗବଣ୍ଟାକୁ କେନ୍ଦ୍ର କରି ପ୍ରଦୀପ ପରିଡା ଆସି ତୋଟା ଗାଁର ଗୋଲକ ବାରିକଙ୍କ ପୁଅ କାହ୍ନା ଘର ଆଗରେ ଦୁଇରାଉଣ୍ଡ ଗୁଳିଚାଳନା କରିବା ସହ ଆକ୍ରମଣ କରିଥିଲା । ଏନେଇ କାହ୍ନର ଏତଲା ପରେ ପୋଲିସ ତଦନ୍ତ ଆରମ୍ଭ କରିଥିଲା । ପ୍ରଦୀପ କେଶପୁର ଅଞ୍ଚଳରେ ଥିବା ଜାଣିବା ପରେ ପୋଲିସ୍ ଯୋଜନାବଦ୍ଧ ଭାବେ ତାକୁ କାବୁ କରିବାରେ ସକ୍ଷମ ହୋଇଛି । ପ୍ରଦୀପ ଠାରୁ ଏକ ୯ ଏମଏମ ପିସ୍ତଲ ଗୁଳି ଜବତ କରିଛି ପୋଲିସ୍ । ପ୍ରଦୀପ ବିରୋଧରେ ଗଞ୍ଜାମର ଧରାକୋଟ, କୋଦଳା, ଝାରସୁଗୁଡା, ବାଲୁଗାଁ, ବାଣପୁର, ଭୁବନେଶ୍ୱର, ଚମାଖଣ୍ଡି ଆଦି ଥାନାରେ ପ୍ରାୟ ୨୭ ଟି ମାମଲା ରହିଛି । ପ୍ରଦୀପର ଗିରଫଦାରୀ ନେଇ ଓଡିଶାର ବିଭିନ୍ନ ଥାନାକୁ ସୂଚନା ଦିଆଯାଇଛି ବୋଲି ଏସଡିପିଓ ଗୌରହରୀ ସାହୁ ଓ ଆଇଆଇସି ନରେଶ କୁମାର ସାହୁ ସୂଚନା ଦେଇଛନ୍ତି ।
