ଆଜି ପହଲଗାମ ଆତଙ୍କୀ ହମଲାକୁ ପୁରିଲା ଏକ ମାସ । ଏପ୍ରିଲ ୨୨ ତାରିଖରେ ଜମ୍ମୁ-କାଶ୍ମୀର ପହଲଗାମର ବୈଶାରଣ ଘାଟିରେ ନରସଂହାରର କରିଥିଲେ ପାକିସ୍ତାନୀ ଆତଙ୍କବାଦୀ । ଧର୍ମ ପଚାରି ଜଣ ଜଣ କରି ୨୬ ଜଣଙ୍କୁ ଗୁଳି କରି ହତ୍ୟା କରିଥିଲେ । ଘଟଣାର ଦିନକ ପରେ ଅର୍ଥାତ ଏପ୍ରିଲ ୨୪ ତାରିଖରେ ଆତଙ୍କବାଦୀଙ୍କୁ ଓ ଆତଙ୍କବାଦୀଙ୍କ ଆଶ୍ରୟଦାତା ପାକିସ୍ତାନକୁ କଡ଼ା ବାର୍ତ୍ତା ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କହିଥିଲେ, ଆତଙ୍କବାଦୀଙ୍କୁ ଖୋଜି ଖୋଜି ମାରିବୁ । ପ୍ରଥମେ କେନ୍ଦ୍ର ସରକାର ପାକିସ୍ତାନ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ପାକିସ୍ତାନକୁ ପାନେ ଦେବା ପାଇଁ ଭାରତ ସିନ୍ଧୁ ନଦୀ ଜଳ ଚୁକ୍ତି ବାତିଲ କରିଥିଲା ।
ଯାହା ଏବେବି କାଏମ ରହିଛି । ସେପଟେ ଆକ୍ରମଣର ଠିକ୍ ୧୫ ଦିନ ପରେ ଅର୍ଥାତ୍ ମେ ୭ ତାରିଖ ରାତିରେ ପହଲଗାମର ପ୍ରତିଶୋଧ ନେଲା ଭାରତ । ପାକିସ୍ତାନ ଓ ପାକ୍ ଅଧିକୃତ କାଶ୍ମୀରରେ ଥିବା ୯ଟି ଆତଙ୍କବାଦୀଙ୍କ ଆଡ୍ଡାକୁ ଧ୍ବଂସ କଲେ ଭାରତୀୟ ସେନା । ସୀମା ପାର ନ କରି ଆତଙ୍କବାଦୀଙ୍କୁ ଦିଆଗଲା ମୁହଁତୋଡ଼ ଜବାବ । ଏଥିରେ ଶତାଧିକ ଆତଙ୍କବାଦୀ ନିପାତ ହେଲେ । ଏଥି ସହ ଭାରତ ସରକାରଙ୍କ ତରଫରୁ ପାକିସ୍ତାନକୁ ସୂଚନା ଦିଆଗଲା, ଯେ ଭାରତ କେବଳ ଆତଙ୍କବାଦୀଙ୍କୁ ମାରିଛି । ଆତଙ୍କବାଦୀଙ୍କ ଆଡ୍ଡା ଉପରେ ହିଁ ଆକ୍ରମଣ କରିଛି । କିନ୍ତୁ ପାକିସ୍ତାନ ଆତଙ୍କବାଦୀ ଉପରେ ହୋଇଥିବା ଆକ୍ରମଣକୁ ପାକିସ୍ତାନୀ ସେନା ନିଜ ଦେଶ ଉପରେ ଆକ୍ରମଣ ହୋଇଥିବା କହି ଭାରତର ସାଧାରଣ ଜନବସତି ଓ ସାମରିକ ଠିକଣାକୁ ଟାର୍ଗେଟ କରିଥିଲା ।
ଶହ ଶହ ଡ୍ରୋନ ଓ କ୍ଷେପଣାସ୍ତ୍ର ମାଡ଼ କରି ଭାରତର ବଡ଼ କ୍ଷତି କରିବାକୁ ଚେଷ୍ଟା କରିଥିଲା । ଏହାର କଡ଼ା ଜବାବ ଦେଇଥିଲା ଭରତୀୟ ସେନା । ଭାରତର ଡ୍ରୋନ ଓ ମିସାଇଲ ଆକ୍ରମଣରେରେ ପାକିସ୍ତାନର ବହୁ ଗୁରୁତ୍ବପୁର୍ଣ୍ଣ ଏୟାର ବେସ୍ ଓ ସାମରିକ ଠିକଣା ବହୁ ଭାବେ କ୍ଷତିଗ୍ରସ୍ତ ହେଲା । ପାକିସ୍ତାନର ୪୦ରୁ ଅଧିକ ଜବାନ ବି ନିହତ ହେଲେ । ଭାରତର ଆକ୍ରମଣରେ ଭୟଭିତ ପାକିସ୍ତାନ ନିଜକୁ ବଞ୍ଚାଇବା ପାଇଁ ବିଶ୍ବ ସମୁଦାୟର ଶରଣ ନେଇଥିଲା । ଭାରତର ଡିଜିଏମଓଙ୍କୁ ଫୋନ କରି ଅସ୍ତ୍ର ବିରତି ପାଇଁ ଅନୁରୋଧ କଲେ ପାକିସ୍ତାନର ଡିଜିଏମଓ । ଏହା ଭିତରେ ଏକ ମାସ ବିତିଯାଇଛି । ନରସଂହାରର ସଂପୃକ୍ତ ଆତଙ୍କବାଦୀଙ୍କ ବିଷୟରେ ସଠିକ୍ ସନ୍ଧାନ ମିଳିପାରି ନାହିଁ । ସେମାନଙ୍କୁ ଧରିବା ପାଇଁ ଏବେ ବି ଭାରତୀୟ ସେନା କାଶ୍ମୀର ଘାଟିରେ ଅପରେସନ ଜାରି ରଖିଛି ।
