ସଂଚାର ବ୍ୟୁରୋ: ଭାରତ-ପାକିସ୍ତାନ ଯୁଦ୍ଧବିରତି ଘୋଷଣା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ପଞ୍ଜାବସ୍ଥିତ ଆଦମପୁର ବାୟୁସେନା ଏୟାରବେସରେ ପହଁଚିଛନ୍ତି । ପ୍ରଧାନମନ୍ତ୍ରୀ ଯବାନଙ୍କ ସହିତ କିଛି ବିଶେଷ ମୁହୂର୍ତ୍ତ ବିତାଇବା ସହିତ ମନୋବଳ ବଢ଼ାଇଛନ୍ତି ।
ଅପରେସନ ସିନ୍ଦୂର ପରେ ଦେଶବାସୀଙ୍କୁ ସମ୍ବୋଧନ କରିବା ପରେ ଆଜି ପ୍ରଥମ ଥର ପାଇଁ ଆଦମପୁର ଏୟାରବେସ୍ ଗସ୍ତ କରିଛନ୍ତି ପ୍ରଧାନମନ୍ତ୍ରୀ ମୋଦୀ । ଯବାନଙ୍କ ସହିତ ସମୟ ବିତାଇବା ସହିତ ଫଟୋ ଉଠାଇଛନ୍ତି ।
ଅପରେସନ୍ ସିନ୍ଦୂରବେଳେ ଉତ୍ତେଜନା ମଧ୍ୟରେ ପାକିସ୍ତାନ ଦାବି କରିଥିଲା ଯେ ଆଦମପୁର ଏୟାରବେସକୁ ତାର ମିସାଇଲ ଦ୍ୱାରା କ୍ଷତିଗ୍ରସ୍ତ କରିଛି । ଯାହାକି ଏକ ମିଥ୍ୟା ଅପପ୍ରଚାର ଥିଲା । ପାକିସ୍ତାନ କହିଥିଲା ଯେ ମେ ୯-୧୦ ତାରିଖ ରାତିରେ ଯେଏଫ୍-୧୭ (JF-17)ଫାଇଟର୍ ଜେଟ୍ ଦ୍ୱାରା ଦ୍ରୁତଗାମୀ ମିସାଇଲ୍ ରେ ଆଦମପୁରରେ ବାୟୁ ପ୍ରତିରକ୍ଷା ସିଷ୍ଟମ୍ ଏସ୍-୪୦୦କୁ କ୍ଷତି ଗ୍ରସ୍ତର କରିଛି । କିନ୍ତୁ ସେପରି କିଛି ଘଟି ନ ଥିଲା । ଭାରତ ପ୍ରତିରକ୍ଷା ସିଷ୍ଟମ୍ ସମ୍ପୂର୍ଣ୍ଣ ସୁରକ୍ଷିତ ଥିଲା ।
ଏଠାରେ ଉଲ୍ଲେଖ ଯୋଗ୍ୟ, ଗତକାଲି ମୋଦୀ ଅପରେସନ ସିନ୍ଦୂରକୁ ନେଇ ଭାରତୀୟ ସେନାକୁ ଭୂରି ପ୍ରଶଂସା କରିଥିଲେ । ମା ଓ ଭଉଣୀଙ୍କ ସିନ୍ଦୂର ଉଜାଡ଼ିଲେ ତାର ପ୍ରତିଶୋଧ ନିଆଯିବ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପାକିସ୍ତାନ ସହିତ କେବଳ ଆତଙ୍କବାଦ ଏବଂ ପିଓକେ ପ୍ରସଙ୍ଗରେ ଆଲୋଚନା ହେବ । ସେ କହିଛନ୍ତି ଯେ ଯଦି ଭାରତ ଉପରେ ଆତଙ୍କବାଦୀ ଆକ୍ରମଣ ହୁଏ, ତେବେ ଏହାର ଉଚିତ ଜବାବ ଦିଆଯିବ। ଭାରତ କୌଣସି ପ୍ରକାରର ପରମାଣୁ ବ୍ଲାକମେଲ୍ ସହ୍ୟ କରିବ ନାହିଁ। ଭାରତ ପରମାଣୁ ଶକ୍ତିର ଆବରଣ ତଳେ ବଢ଼ୁଥିବା ଆତଙ୍କବାଦୀ ଶିବିରଗୁଡ଼ିକ ଉପରେ ଏକ ସଠିକ୍ ଏବଂ ନିର୍ଣ୍ଣାୟକ ଆକ୍ରମଣ କରିବାକୁ ସକ୍ଷମ। ଆମେ ଆତଙ୍କବାଦକୁ ପ୍ରଶ୍ରୟ ଦେଉଥିବା ସରକାର ଏବଂ ଆତଙ୍କବାଦର ନେତୃତ୍ଵକୁ ଦୃଢ ହସ୍ତରେ ଦମନ କରିବୁ।
