ସଂଚାର ବ୍ୟୁରୋ: ଦିଲ୍ଲୀ ମଦନୀତି ମାମଲା । ସୁପ୍ରିମକୋର୍ଟରେ ପୂର୍ବତନ ଉପମୁଖ୍ଯମନ୍ତ୍ରୀ ମନୀଷ ସିସୋଦିଆଙ୍କ ଆବେଦନର ଆଜି ହେବ ଶୁଣାଣି । ସପ୍ତାହକୁ ଦୁଇ ଥର ତଦନ୍ତକାରୀ ଅଧିକାରୀଙ୍କ ନିକଟରେ ହାଜର ହେବା ନେଇ ଜାରି ହୋଇଥିବା ଜାମିନ ସର୍ତ୍ତାବଳୀରେ ପରିବର୍ତ୍ତନ କରିବା ଲାଗି ସେ କରିଛନ୍ତି ଆବେଦନ । ଦିଲ୍ଲୀ ମଦନୀତି ମାମଲାରେ ଗତ ଅଗଷ୍ଟ ୯ ତାରିଖରେ ସିସୋଦିଆଙ୍କୁ ମିଳିଥିଲା ଜାମିନ । ସିସୋଦିଆଙ୍କ ଲାଗି ବରିଷ୍ଠ ଆଇନଜୀବୀ ଅଭିଷେକ ମନୁ ସିଘଭି ଲଢୁଥିବାବେଳେ ଜଷ୍ଟିସ ଭୂଷଣ ଆର. ଗଭାଇ ଓ ଜଷ୍ଟିସ କେଭି ବିଶ୍ବନାଥନ ଏହି ଆଦେଶ ଦେଇଥିଲେ । ସିସୋଦିଆଙ୍କୁ ଜାମିନ ମଞ୍ଜୁର ବେଳେ ତଦନ୍ତକାରୀ ଅଧିକାରୀଙ୍କ ନିକଟରେ ସପ୍ତାହରେ ଦୁଇ ଥର ହାଜର ହେବା ଲାଗି କୋର୍ଟ କହିଥିଲେ । ନିଜ ଆବେଦନରେ ସିସୋଦିଆ କହିଛନ୍ତି ଜାମିନ ମିଳିବା ପରଠାରୁ ସେ ତଦନ୍ତକାରୀ ଅଧିକାରୀଙ୍କ ନିକଟରେ ୬୦ ଥର ହାଜର ହେବା ସହ ବିଚାର ପ୍ରକ୍ରିୟାର ସମସ୍ତ ୧୮ଟି ଯାକ ତାରିଖରେ ହାଜର ହୋଇଛନ୍ତି । ସେ ଜଣେ ସମ୍ମାନଯୋଗ୍ଯ ବ୍ଯକ୍ତି । ତେଣୁ ତାଙ୍କ ଅନୁରୋଧକୁ ବିଚାର କରାଯାଉ । ସିସୋଦିଆଙ୍କୁ ୧୦ ଲକ୍ଷ ଟଙ୍କର ବେଲ ବଣ୍ଡ ଦାଖଲ ପରେ ଜାମିନ ପ୍ରଦାନ କରାଯାଇଥିଲା । ଜାମିନରେ ଥିବାବେଳେ ପ୍ରମାଣ ନଷ୍ଟ ଲାଗି ଉଦ୍ଯମ ନ କରିବା ସକାଶେ କୋର୍ଟ ସର୍ତ୍ତ ରଖିଥିଲେ । ଦିଲ୍ଲୀ ମଦନୀତି ମାମଲାରେ ଗତ ୨୦୨୩ ଫେବ୍ରୁଆରୀ ୨୬ରେ ସିସୋଦିଆଙ୍କୁ ଗିରଫ କରିଥିଲା ସିବିଆଇ ।
