ସଂଚାର ବ୍ୟୁରୋ: ଚିନ୍ତା ବଢ଼ାଇଲାଣି ବାର୍ଡ ଫ୍ଲୁ । ବ୍ରଏଲର ଚାଷ କରୁଥିବା ଚାଷୀଙ୍କ ମୁଣ୍ଡରେ ପଡ଼ିଲାଣି ଚଡ଼କ । ପିପିଲି ପରେ ଏବେ ଅନ୍ୟ ଜିଲ୍ଲାକୁ ବ୍ୟାପିବା ଆରମ୍ଭ କଲାଣି ବାର୍ଡ ଫ୍ଲୁ । ଖୋର୍ଦ୍ଧା ଜିଲ୍ଲାର ଟାଙ୍ଗୀ ନିକଟସ୍ଥ ଏକ କୁକୁଡ଼ା ଫାର୍ମରେ ମରୁଛନ୍ତି ଶହଶହ କୁକୁଡ଼ା । ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ବାର୍ଡ଼ ଫ୍ଲୁ ଚିହ୍ନଟ ପାଇଁ ପରୀକ୍ଷଣ କେନ୍ଦ୍ରକୁ ସାମ୍ପୁଲ ପଠାଯାଇଛି । ଖୋର୍ଦ୍ଧା ଜିଲ୍ଲାର ଟାଙ୍ଗୀ ନିକଟସ୍ଥ ସୁନ୍ଦରପୁର ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ସୂଚନା ଅନୁଯାୟୀ, ରତିକାନ୍ତ ପରିଡ଼ା ସୁନ୍ଦରପୁର ଗ୍ରାମରେ ଏକ କୁକୁଡ଼ା ଫାର୍ମ କରିଛନ୍ତି । ସେ କୌଣସି ସରକାରୀ ଅନୁକମ୍ପା ନଆଣି କିମ୍ବା ସରକାରୀ ସାହାଯ୍ୟ ନଆଣି ନିଜର ବ୍ୟକ୍ତିଗତ ଅର୍ଥ ଓ ଧାରକରଜ କରି ନୂଆନୂଆ କୁକୁଡ଼ା ଫାର୍ମ କରିଛନ୍ତି । ଏଭଳି ସ୍ଥିତିରେ ଚିନ୍ତାର କାରଣ ସାଜିଛି ବାର୍ଡ ଫ୍ଲୁ । ରତିକାନ୍ତଙ୍କର ଏହି ଫାର୍ମରେ ମରୁଛନ୍ତି ଶହ ଶହ କୁକୁଡ଼ା । ତେବେ ଏହି କୁକୁଡ଼ାଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି । ଏହି ଖବର ପାଇ ଟାଙ୍ଗୀ ପ୍ରାଣୀ ଚିକିତ୍ସାଳୟର କର୍ମୀ ଫାର୍ମରେ ପହଞ୍ଚିଛନ୍ତି । ସେଠାରେ ପହଞ୍ଚି କୁକୁଡ଼ାଙ୍କ ସାମ୍ପୁଲ କଲେକ୍ସନ କରିଛନ୍ତି । ବାର୍ଡ଼ ଫ୍ଲୁ ଚିହ୍ନଟ ପାଇଁ ପରୀକ୍ଷଣ କେନ୍ଦ୍ରକୁ ଏହି ସାମ୍ପୁଲ ପଠାଯାଇଛି । ଏନେଇ ଟାଙ୍ଗୀ ପ୍ରାଣୀ ଚିକିତ୍ସାଧିକାରୀ ଚନ୍ଦ୍ରମଣି ସାହୁ ଗଣମାଧ୍ୟମକୁ ସୂଚନା ଦେଇଛନ୍ତି ।
