ସଂଚାର ବ୍ୟୁରୋ: ଏଯାଏଁ HMPV ନେଇ କେନ୍ଦ୍ର ସରକାର କୌଣସି ମାର୍ଗଦର୍ଶିକା ଦେଇ ନାହାନ୍ତି । ତେଣୁ ରାଜ୍ୟ ସରକାର କିଛି ମାର୍ଗଦର୍ଶିକା ଜାରି କରି ନାହାନ୍ତି ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର । HMPV ସଂକ୍ରମଣରେ ଥଣ୍ଡା ଜ୍ୱର ହୋଇଥାଏ । ସଂକ୍ରମଣ ସେତେ ଗୁରୁତର ହୁଏନି । ଯଦି ମାର୍ଗଦର୍ଶିକା ଆସେ, ସେହି ଅନୁସାରେ ସବୁ ହସ୍ପିଟାଲକୁ ନିର୍ଦ୍ଦେଶ ଦିଆଯିବ । ଭୁବନେଶ୍ୱରରେ ଷ୍ଟେଟ IDSP ସେଲ ଓ କେନ୍ଦ୍ରରୁ NCDC ଏହାକୁ ମନିଟର କରୁଛନ୍ତି । ହେଲଥ ଏମରଜେନସି ଅପରେସନ ସେଣ୍ଟର ଖୋଲିବା ନେଇ କେନ୍ଦ୍ର ସରକାର ସହ MOU ହୋଇଛି । ଏହି ସେଣ୍ଟର ୨୪ ଘଣ୍ଟା କାମ କରିବ । ସାରା ରାଜ୍ୟର ସ୍ୱାସ୍ଥ୍ୟ ଡାଟା ନେଇ ଏକ ଡ୍ୟାସବୋର୍ଡ ହେବ । ଏହା ରାଜ୍ୟ ଅଧୀନରେ କାମ କରିବ । ଭୁବନେଶ୍ୱର ନଅ ତାଲାରେ ଏହି ସେଣ୍ଟର ହେବ । ଖୁବ ଶୀଘ୍ର ଏହାର କାମ ଆରମ୍ଭ ହେବ । ମାସ୍କ ପିନ୍ଧା ନେଇ କୌଣସି ନିର୍ଦ୍ଦେଶ ଦେଇନୁ । ସମୟ ସମୟରେ ସ୍ଥିତି ସମୀକ୍ଷା କରାଯାଉଛି । WHO ରିପୋର୍ଟ ଅନୁସାରେ, ଚାଇନାରେ ବି ମାମଲା କମିଛି । ଭାରତରେ ବି କମୁଛି । ଓଡ଼ିଶାରେ ଏଯାଏଁ କୌଣସି ମାମଲା ଆସିନି । ତେବେ ବ୍ୟସ୍ତ ହେବାରେ କିଛି ନାହିଁ । ରାଜ୍ୟ ସରକାର ପ୍ରସ୍ତୁତ ଅଛନ୍ତି । ଥଣ୍ଡା, ଜ୍ୱର, କାଶ ହେଲେ ସଂଗରୋଧରେ ରୁହନ୍ତୁ । ଗହଳିକୁ ଯାଆନ୍ତୁ ନାହିଁ । ଋତୁ ପରିବର୍ତ୍ତନ ଯୋଗୁଁ ଶୀତ ଦିନରେ ଥଣ୍ଡା ଜ୍ୱର ବଢ଼ିଥାଏ ଏଥିରେ ବ୍ଯସ୍ତ ହେବାର କିଛି ନାହିଁ ବୋଲି ଆଶ୍ବାସନା ଦେଇଛନ୍ତି ଜନସ୍ବାସ୍ଥ୍ଯ ନିର୍ଦ୍ଦେଶକ ।
