ସଂଚାର ବ୍ୟୁରୋ: ଶ୍ରୀମନ୍ଦିର ଦଧିନଉତି ଉପରକୁ ଚଢିଗଲେ ବୃଦ୍ଧ । ନୀଳଚକ୍ରରେ ଚଢି ଦୀର୍ଘ ସମୟ ପର୍ଯ୍ଯନ୍ତ ଅଟକି ରହିଲେ । ସଂପୃକ୍ତ ବୃଦ୍ଧ ଛତ୍ରପୁରର ବଳରାମ ମହାରଣା ବୋଲି ସୂଚନା ମିଳିଛି । ସନ୍ଧ୍ଯାରେ ସେ ନୀଳଚକ୍ର ଉପରକୁ ଚଢିଥିଲେ । ଘଟଣାସ୍ଥଳରେ ପୋଲିସ, ଅଗ୍ନିଶମ ବାହିନୀ ଓ ମନ୍ଦିର ପ୍ରଶାସନ ପହଞ୍ଚି ତାଙ୍କୁ ଶ୍ରୀମନ୍ଦିର ତଳକୁ ଆଣିଥିଲେ । ତେବେ କାହିଁକି ସେ ଦଧିନଉତି ଉପରକୁ ଚଢିଥିଲେ ସେନେଇ କୌଣସି ସ୍ପଷ୍ଟ ସୂଚନା ମିଳିପାରନି । ତାଙ୍କ ମାନସିକ ସ୍ଥିତି ଠିକ ନଥିବା ସନ୍ଦେହ କରାଯାଉଛି । ସିଂହଦ୍ବାର ଥାନାକୁ ନେଇ ତାଙ୍କୁ ରଖାଯାଇଛି । କିଛି ସମୟରେ ପରେ ତାଙ୍କୁ ପଚରାଉଚରା କରାଯିବ ବୋଲି ପୁରୀ ଏସପି ସୂଚନା ଦେଇଛନ୍ତି । ପଚରାଉଚରା ପରେ ସବୁକିଛି ସ୍ପଷ୍ଟ ହେବ । ତେବେ ବୃଦ୍ଧ ଜଣଙ୍କ ଶ୍ରୀମନ୍ଦିର ଉପରକୁ ଚଢିଯିବା ଶ୍ରୀମନ୍ଦିରର ସୁରକ୍ଷା ବ୍ଯବସ୍ଥା ନେଇ ଅନେକ ପ୍ରଶ୍ନ ଉଠାଇଛି । ପ୍ରଶ୍ନ ଉଠୁଛି, ସୁରକ୍ଷା ବଳୟ ଭାଙ୍ଗି କେମିତି ଦଧିନଉତି ଉପରକୁ ଚଢିଗଲେ ବୃଦ୍ଧ ? ସଂପୃକ୍ତ ବ୍ଯକ୍ତି ଚଢିବାବେଳେ କେମିତି କେହି ଦେଖିପାରିଲେ ନାହିଁ ? ଜେଟିପି ଓ ପୋଲିସ ସେଠାରେ ନଥିଲେ କି ? ଯଦି ଥିଲେ ତେବେ ବୃଦ୍ଧ ବଳରାମଙ୍କୁ ଅଟକାଇଲେ ନାହିଁ କେମିତି ?
