ମାଡ଼ି ଆସୁଛି ଅକଭାନ । ଗତ ୬ ଘଣ୍ଟା ମଧ୍ୟରେ ଘଣ୍ଟା ପ୍ରତି ୫କିମି ବେଗରେ ଆଗକୁ ବଢୁଛି ଭୀଷଣ ବାତ୍ୟା । ବର୍ତ୍ତମାନ କଳିଙ୍ଗପାଟନମ ଠାରୁ ୪୯୦କିମି, ଗୋପାଳପୁର ଠାରୁ ୫୮୦ କିମି ଏବଂ ପୁରୀ ଠାରୁ ୬୪୦କିମି ଦୂରରେ କେନ୍ଦ୍ରୀଭୂତ ରହିଛି । ସିଭିୟର ସାଇକ୍ଲୋନ ଅକଭାନ ଦକ୍ଷିଣ ପଶ୍ଚିମ ବଙ୍ଗୋପସାଗରର କେନ୍ଦ୍ରୀୟ ଭାଗ ଏବଂ ସଂଲଗ୍ନ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ରହିଛି । ଏହା ଉତ୍ତର-ଉତ୍ତରପଶ୍ଚିମ ଦିଗରେ ଗତି କରିବ ।
ଆସନ୍ତାକାଲି ନରସାପୁର ଓ ପୁରୀ ମଧ୍ୟରେ ଲ୍ୟାଣ୍ଡଫଲ ସମ୍ଭାବନା । ମଧ୍ୟାହ୍ନ ସୁଦ୍ଧା ନରସାପୁର ଓ ପୁରୀ ମଧ୍ୟରେ ଉତ୍ତର ଆନ୍ଧ୍ରପ୍ରଦେଶ, ୟାନମ୍ ଏବଂ ଦକ୍ଷିଣ ଓଡ଼ିଶା ଉପକୂଳ ଅତିକ୍ରମ କରିପାରେ । ଏହି ସମୟରେ ପବନର ବେଗ ଘଣ୍ଟା ପ୍ରତି ୯୦-୧୦୦ କିମି ରହିପାରେ । ଝଟକା ପବନର ବେଗ ଘଣ୍ଟା ପ୍ରତି ୧୧୦ କିମି ପର୍ଯ୍ୟନ୍ତ ପହଞ୍ଚିପାରେ । ଆଇଏମଡି ନରସାପୁର ଓ ପୁରୀ ମଧ୍ୟରେ ସ୍ଥଳଭାଗ ଛୁଇଁବା ନେଇ ଆକଳନ କରିଥିବା ବେଳେ ବାତ୍ୟାର ଗତିପଥ ନେଇ ଟ୍ରାକ ଜାରି କରିଛି ଆମେରିକାର ଜଏଣ୍ଟ ଟାଇଫୁନ୍ ୱାର୍ଣ୍ଣିଂ ସେଣ୍ଟର। JTWCର ପୂର୍ବାନୁମାନ ଅନୁଯାୟୀ ବାତ୍ୟା ଆନ୍ଧ୍ରପ୍ରଦେଶର ଶ୍ରୀକାକୁଲମ ଉପକୂଳରେ ଲ୍ୟାଣ୍ଡଫଲ କରିପାରେ । ଟ୍ରାକରେ ଶ୍ରୀକାକୁଲମ ଜିଲ୍ଲାର କଳିଙ୍ଗପଟ୍ଟନମରୁ ବାରୁଭା ମଧ୍ୟବର୍ତ୍ତୀ ଉପକୂଳରେ ବାତ୍ୟା ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଛି ।
JTWCର ଆକଳନ ଅନୁଯାୟୀ ବାତ୍ୟା ବଙ୍ଗୋପସାଗରରୁ ଉତ୍ତର-ଉତ୍ତରପଶ୍ଚିମ ଦିଗରେ ଗତି କରି ଉତ୍ତର ଆନ୍ଧ୍ରପ୍ରଦେଶ ଉପକୂଳ ନିକଟରେ ପହଞ୍ଚିପାରେ । ଘରୋଇ ପାଣିପାଗ ସଂସ୍ଥା ସ୍କାଏମେଟ ଆକଳନ ଅନୁଯାୟୀ, ବାତ୍ୟା ଅକଭାନ କାଲି ପୂର୍ବାହ୍ନରେ ଆନ୍ଧ୍ରପ୍ରଦେଶ ଉପକୂଳରେ ସ୍ଥଳଭାଗ ଛୁଇଁବ । ମଚ୍ଛଲିପଟନମ୍ ଏବଂ ବିଶାଖାପାଟଣା ମଧ୍ୟରେ ଉପକୂଳ ଅତିକ୍ରମ କରିବ ବୋଲି ଆକଳନ କରାଯାଇଛି ।
ଗତିପଥ କାକିନାଡ଼ା-ଟୁନିର ସବୁଠାରୁ ପାଖରେ ରହିଛି । ସମୁଦ୍ରର ଥଣ୍ଡା ତାପମାତ୍ରା ଏବଂ ପବନର ଗତି ଯୋଗୁଁ ଏହା ଅତି ଭୀଷଣ ବାତ୍ୟାରେ ପରିଣତ ନ ହୋଇପାରେ ବୋଲି ସ୍କାଇମେଟ୍ ଆକଳନ କରିଛି। ବିଭିନ୍ନ ପାଣିପାଗ ମଡେଲରେ ବାତ୍ୟାର ସମ୍ଭାବ୍ୟ ଲ୍ୟାଣ୍ଡଫଲ୍ ଅଞ୍ଚଳ ବେଶ୍ ବିସ୍ତୃତ ରହିଛି । ତେଣୁ କେଉଁ ନିର୍ଦ୍ଦିଷ୍ଟ ସ୍ଥାନରେ ବାତ୍ୟାର କେନ୍ଦ୍ର ଉପକୂଳ ଅତିକ୍ରମ କରିବ ତାହା ଅସ୍ପଷ୍ଟ ରହିଛି ।



