ସଂଚାର ବ୍ୟୁରୋ: ବ୍ରହ୍ମପୁର ବ୍ରଜରାଜନଗର ପ୍ରଥମ ଲାଇନରେ ରହିଥିବା ମସଲା ଓ ଆଚାର ଫ୍ୟାକ୍ଟ୍ରିରେ ଭୟାବହ ଅଗ୍ନିକାଣ୍ଡ । ଲକ୍ଷାଧିକ ଟଙ୍କାର ମସଲା ଓ ଆଚାର ପ୍ୟାକେଟ ତଥା ପ୍ରସ୍ତୁତ ସାମଗ୍ରୀ ଜଳି ପୋଡ଼ି ନଷ୍ଟ ହୋଇଯାଇଛି । ଆଜି ଭୋର ୬ଟା ସମୟରେ ବ୍ରଜରାଜନଗର ନଗର ପ୍ରଥମ ଲାଇନରେ ରହିଥିବା ଅଜୟ ସାହୁଙ୍କ ମସଲା ଓ ଆଚାର ଫ୍ୟାକ୍ଟ୍ରିରୁ ଧୂଆଁ ବାହାରୁଥିବା ନେଇ କିଛି ସ୍ଥାନୀୟ ବାସିନ୍ଦା ଦେଖିବାକୁ ପାଇଥିଲେ । ଏନେଇ ଅଜୟ ଦାସଙ୍କୁ ଜଣାଇବା ପରେ ସେ ଅଗ୍ନିଶମ ଅଧିକାରୀଙ୍କୁ ଖବର ଦେଇଥିଲେ । ଖବର ପାଇବା ପରେ ଅଗ୍ନିଶମ ବିଭାଗର ୩ଟି ଟିମ ପହଞ୍ଚି ନିଆଁକୁ ଆୟତ୍ତ କରିଥିଲେ । ଫ୍ୟାକ୍ଟ୍ରିରେ ଅନେକ ପ୍ଲାଷ୍ଟିକ ସାମଗ୍ରୀ ରହିଥିବା ଯୋଗୁଁ ସେଥିରେ ନିଆଁ ଲାଗିବା ପରେ ଫ୍ୟାକ୍ଟ୍ରିଟି ସମ୍ପୂର୍ଣ୍ଣ ରୂପେ ଧୂଆଁମୟ ହୋଇଯାଇଥିଲା ।
ଯାହାଫଳରେ ଧୂଆଁକୁ ଫ୍ୟାକ୍ଟ୍ରିରୁ ବାହାର କରିବା ସହ ନିଆଁ ଲିଭାଇବା ଅଗ୍ନିଶମ ବିଭାଗର ଅଧିକାରୀ ମାନଙ୍କ ପାଇଁ କଷ୍ଟସାଧ୍ୟ ହୋଇଥିଲା । ତଥାପି ମଧ୍ୟ ଅଗ୍ନିଶମ ବିଭାଗର ୩ଟି ଟିମରେ ଥିବା ପ୍ରାୟ ୧୦ରୁ ଅଧିକ କର୍ମଚାରୀ ମାନେ ନିଆଁକୁ ଆୟତ୍ତ କରିବାରେ ସଫଳ ହୋଇଥିଲେ । ଗତକାଲି ବିଳମ୍ବିତ ରାତି ୪ଟା ପର୍ଯ୍ୟନ୍ତ ଫ୍ୟାକ୍ଟ୍ରିର ମାଲିକ ଫ୍ୟାକ୍ଟ୍ରିରେ ଥିବା ବେଳେ ହଠାତ ଭୋର ୬ଟା ପରେ ଅଗ୍ନିକାଣ୍ଡ ହୋଇଥିଲା । ଅଗ୍ନିକାଣ୍ଡରେ ଫ୍ୟାକ୍ଟ୍ରିରେ ଥିବା ପ୍ରାୟ ୫୦ ଲକ୍ଷରୁ ଅଧିକ ଟଙ୍କାର ମେସିନ ସହ ଲକ୍ଷାଧିକ ଟଙ୍କାର ସାମଗ୍ରୀ ପୋଡ଼ି ହୋଇଯାଇଛି । ଫ୍ୟାକ୍ଟ୍ରିରେ ଅଗ୍ନି ନିର୍ବାପକ ବ୍ୟାବସ୍ଥା ରହିଥିବା ବେଳେ ବାରମ୍ବାର ଭଲଟେଜ ଅପଡାଉନ ହେବା ଯୋଗୁଁ ଅଗ୍ନିକାଣ୍ଡ ହୋଇଥିବା କହିଛନ୍ତି ଫ୍ୟାକ୍ଟ୍ରିର ମାଲିକ । ସେପଟେ କାରଣ ସ୍ପଷ୍ଟ ହୋଇନଥିବା ବେଳେ ସର୍ଟ ସର୍କିଟ ଯୋଗୁଁ ଅଗ୍ନିକାଣ୍ଡ ହୋଇଥାଇପାରେ ବୋଲି ଜଣାପଡିଥିବା କହିଛନ୍ତି ଅଗ୍ନିଶମ ଅଧିକାରୀ ।
