ସଂଚାର ବ୍ୟୁରୋ: ବ୍ରହ୍ମପୁର ପୋଲିସର ଏନକାଉଣ୍ଟର । ଗୋଳନ୍ଥରା ପୋଲିସ ଅଧିକାରୀଙ୍କ ଗୁଳିରେ ଦୁର୍ଦ୍ଦାନ୍ତ ଅପରାଧୀ ସୁନିଲ ଓରଫ ମାଲ ନାହାକ ଆହତ । ସୁନିଲର ବାମ ଗୋଡ଼ ଜଙ୍ଘ ପାଖରେ ବାଜିଛି ଗୁଳି । ତାକୁ ଏମକେସିଜି ମେଡିକାଲରେ ଭର୍ତ୍ତି କରାଯାଇଛି । ସୁନିଲ ବିରୋଧରେ ବିଭିନ୍ନ ଥାନାରେ ଏକାଧିକ ସଙ୍ଗୀନ ମାମଲା ଥିବା ପୋଲିସ କହିଛି । ଗତ ୨୨ ତାରିଖ ରାତି ନିମଖଣ୍ଡି ଥାନା ଅନ୍ତର୍ଗତ ଗୋବିନ୍ଦ ବିହାରରେ ରହୁଥିବା ଶୁଭଶ୍ରୀ ଜେନା ନିଜ ପୁଅକୁ ଟ୍ୟୁସନରୁ ଧରି ଫେରୁଥିବା ବେଳେ ଘର ନିକଟରେ ସୁନିଲ ତାଙ୍କ ଗାଡ଼ି ଅଟକାଇ ଫାଏରିଂ କରି ଦୁଇ ଭରି ସୁନାହାର ଲୁଟ କରିଥିଲା । ଆଜି ଜାତୀୟ ରାଜପଥ ଗୋଳନ୍ଥରା ଦେଇ ଚିକିଟି ଯାଉଥିବା ଖବର ପାଇ ଵ୍ରହ୍ମପୁର ଏସପି କାବୁକରିବାକୁ ନିର୍ଦ୍ଦେଶ ଦେଇଥିଲେ । ଗୋଳନ୍ଥରା ଥାନାଧିକାରୀ ବିବେକାନନ୍ଦ ସ୍ୱାଇଁ, ଏସଆଇ ସିଲୁ ଧଳ ଓ ଅନ୍ୟାନ୍ୟ ପୋଲିସ କର୍ମଚାରୀ ତାର ପିଛା କରିଥିଲେ । ପିତାତଳି ପୂର୍ବରୁ ପୋଲିସ ଗାଡ଼ିକୁ ଦେଖି ସୁନିଲ ପ୍ରଥମେ ଦୁଇ ରାଉଣ୍ଡ ଗୁଳି ଚଳାଇଥିଲା । ପୋଲିସର ପାଲଟା ଆକ୍ରମଣରେ ସୁନିଲ ଆହତ ହୋଇଛି । ତା ନିକଟରୁ ବନ୍ଧୁକ ଓ ଗୁଳି ଜବତ କରିଛି ପୋଲିସ୍ । ସାଇଣ୍ଟିଫିକ ଟିମ ସହାୟତାରେ ପୋଲିସ ଘଟଣାର ତଦନ୍ତ କରୁଛି ।
