ବାସୁଦେବପୁର : କେତେ ଦୁଃଖ କଷ୍ଟ ସହି ପୁଅକୁ ମଣିଷ କରିଥିଲା ବାପା । ପୁଅର ଭବିଷ୍ୟତ ପାଇଁ ତୁଣ୍ଡ ଝାଳକୁ ମୁଣ୍ଡରେ ମାରିଥିଲା । ଆଶା ରଖିଥିଲେ କି, ମୋ ପୁଅ ମୋର ସୁଖ ଦୁଃଖରେ ଛିଡ଼ା ହେବ । କିନ୍ତୁ ସେହି ପୁଅ ଯେ ବାପାକୁ ମାରିଦେବ କେହି କେବେ ମଧ୍ୟ କଳ୍ପନା କରି ନଥିବେ । ପୁଅର ପ୍ରହାରରେ ବାପା ଆଖି ବୁଜି ଦେଇଛି ସବୁଦିନ ପାଇଁ । କେତେ କଷ୍ଟ ହେଇଥିବ ସେ ବାପାକୁ ଯେତେବେଳେ ବାପା ଦେହରୁ ତାର ପ୍ରାଣ ଯାଇଥିବ । ଏୟା ଭାବି ଭାବି କଷ୍ଟ ହେଇଥିବ ଯେ ଯେଉଁ ପୁଅକୁ ପାଳି ପୋଷି ବଡ କରିଥିଲେ ତାରି ହାତରୁ ବାପାର ଜୀବନ ଚାଲିଯାଉଛି ।
ଏମିତି ଏକ ଅତି ଦୁଃଖଦ ଓ ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ବାସୁଦେବପୁର ପୁର ବ୍ଲକ ବେଳସାଉଁଳିଆ ଗାଁରେ । ଯେଉଁଠି ପୁଅର ଲୁହା ରଡ଼ ମାଡ଼ରେ ବାପାର ମୃତ୍ୟୁ ହୋଇଥିବା ଦେଖିବାକୁ ମିଳିଛି । ମୃତ ବାପା ହେଉଛନ୍ତି ବସନ୍ତ ମଳିକ । ପୁଅ ଶିବ ମଳିକ ପୂର୍ବରୁ ମାନସିକ ବିକାରଗ୍ରସ୍ତ ଥିବା ବେଳେ ଆଜି ଏକ ଲୁହା ରଡ଼ରେ ରାସ୍ତାରେ ଯାଉଥିବା ଗାଈକୁ ମାଡ ମାରୁଥିଲା । ହେଲେ ବାପା ବସନ୍ତ ଗାଈକୁ ମାରିବାକୁ ଶିବକୁ ବାରଣ କରିଥିଲେ । ହେଲେ ପୁଅ ଉତ୍ତେଜିତ ହୋଇ ବାପାର ମୁଣ୍ଡକୁ ଏକ ଶକ୍ତ ପ୍ରହାର ଦେଇଥିଲା । ଫଳରେ ବସନ୍ତ ଘଟଣା ସ୍ଥଳରେ ସଂଜ୍ଞା ହୀନ ହୋଇ ତଳେ ପଡିଯାଇଥିଲେ । ପରିବାର ଲୋକେ ତାଙ୍କୁ ଉଦ୍ଧାର କରି ବାସୁଦେବପୁର ଡାକ୍ତରଖାନା ନେଇଆସିଥିଲେ । ହେଲେ ଡାକ୍ତରଖାନା ବସନ୍ତକୁ ମୃତ୍ୟୁ ଘୋଷଣା କରିଥିଲେ ।
