ସଂଚାର ବ୍ୟୁରୋ: ମଧ୍ୟ ପ୍ରଦେଶର ଜବଲପୁରରେ ଶନିବାର ଟ୍ରେନ ଦୁର୍ଘଟଣା ଘଟିଛି । ଏଠାରେ ଇନ୍ଦୋରରୁ ଜବଲପୁର ମଧ୍ୟରେ ଯାତ୍ରା କରୁଥିବା ସୋମନାଥ ଏକ୍ସପ୍ରେସର ଦୁଇ ବଗି ଲାଇନଚଚ୍ୟୁତ ହୋଇଛି । ଏହି ଘଟଣାରେ କୌଣସି ପ୍ରକାରର ମୃତାହତର ସୂଚନା ନାହିଁ । ତେବେ ଦୁର୍ଘଟଣାରେ ଯାତ୍ରୀମାନେ ଭୟଭୀତ ଅବସ୍ଥାରେ ଅଛନ୍ତି । ଦୁର୍ଘଟଣାର ସୂଚନା ମିଳିବା ମାତ୍ରେ ରେଲୱେ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ରିଲିଫ ଓ ଉଦ୍ଧାରକାର୍ଯ୍ୟ ଜାରି ରହିଛି ।
ପଶ୍ଚିମ ମଧ୍ୟ ରେଲେଓର ସିପିଆରଓ ହର୍ଷିତ ଶ୍ରୀବାସ୍ତବ ସୂଚନା ଦେଇ କହିଛନ୍ତି, ୨୨୯୧ ଟ୍ରେନ ଇନ୍ଦୋରରୁ ଜବଲପୁର ଅଭିମୁଖେ ଯାତ୍ରା କରୁଥିଲା । ଟ୍ରେନ ଜବଲପୁର ପ୍ଲାଟଫର୍ମ ନମ୍ବର-୬ ଅଭିମୁଖେ ଯାଉଥିବା ବେଳେ ଅଚାନକ ଏହାର ଦୁଇଟି ବଗି ଲାଇନଚ୍ୟୁତ ହୋଇଥିଲା । ଟ୍ରେନ ପ୍ଲାଟଫର୍ମରେ ଅଟକିବାକୁ ଯାଉଥିବାରୁ ଏହାର ଗତି ଧିମା ଥିଲା ତେଣୁ କୌଣସି ଯାତ୍ରୀଙ୍କ କ୍ଷତି ଘଟିନାହିଁ । ସମସ୍ତ ଯାତ୍ରୀ ସୁରକ୍ଷିତ ରହିବା ସହ ନିଜ ନିଜ ଗନ୍ତବ୍ୟ ସ୍ଥଳ ଅଭିମୁଖେ ଯାତ୍ରା କରିଛନ୍ତି । ସକାଳ ପ୍ରାୟ ୫ଟା ୫୦ରେ ଏହି ଘଟଣା ଘଟିଛି ।
