ମୁମ୍ବାଇ : ମହାରାଷ୍ଟ୍ର ବିଧାନସଭା ନିର୍ବାଚନ ପରେ ଇସ୍ତଫା ଦେଲେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ । ଦେବେନ୍ଦ୍ର ଫଡନାଭିସ୍ ଏବଂ ଅଜିତ ପାଓ୍ବାରଙ୍କ ଉପସ୍ଥିତିରେ ଏକନାଥ ସିନ୍ଦେ ରାଜଭବନ ପହଞ୍ଚି ରାଜ୍ୟପାଳ ସିପି ରାଧାକ୍ରିଷ୍ଣନଙ୍କୁ ଇସ୍ତଫା ପତ୍ର ପ୍ରଦାନ କରିଛନ୍ତି । ମହାୟୁତିର ବିପୁଳ ବିଜୟ ପରେ ସେ ମୁଖ୍ୟମନ୍ତ୍ରୀ ପଦ ଛାଡିଛନ୍ତି ।
ଏପଟେ ନୂଆ ସରକାର ଗଠନ ନେଇ ୩ଦିନ ହେଲା ସସପେନ୍ସ ଜାରି ରହିଛି । ଏପର୍ଯ୍ୟନ୍ତ କୌଣସି ନିଷ୍ପତ୍ତି ହୋଇପାରିନାହିଁ । ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି, ଶିବସେନା ଏବଂ ଏନସିପିର ସହଯୋଗୀ ମହାୟୁତି ଦଳ ବିଜୟୀ ହୋଇଛି । ସର୍ବାଧିକ ଆସିନ ପାଇଥିବା ଦୃଷ୍ଟିରୁ ଫଡନାଭିସଙ୍କୁ ମୁଖ୍ୟମନ୍ତ୍ରୀ କରିବା ଲାଗି ବିଜେପି ପ୍ରସ୍ତାବ ଦେଇଥିବା ବେଳେ ସେନା ଏହାକୁ ବିରୋଧ କରିଛି । ୨୮୮ ସଭ୍ୟ ବିଶିଷ୍ଟ ରାଜ୍ୟ ବିଧାନସଭା ନିର୍ବାଚନରେ ବିଜେପି ମେଣ୍ଟକୁ ୨୩୫ଟି ଆସନ ମିଳିଛି । ବିଜେପିକୁ ସର୍ବାଧିକ ୧୩୨ଟି ଆସନ ମିଳିଥିବାବେଳେ ଶିବସେନାକୁ ୫୭ ଏବଂ ଏନସିପିକୁ ୪୧ଟି ଆସନ ମିଳିଛି ।
ମହାରାଷ୍ଟ୍ର ବିଧାନସଭାର କାର୍ଯ୍ୟକାଳ ଆଜି ତଥା ନଭେମ୍ବର ୨୬ରେ ଶେଷ ହେଉଛି । ତେଣୁ ଏକନାଥ ସିନ୍ଦେ ଇସ୍ତଫା ଦେଇଛନ୍ତି ।
