ସଂଚାର ବ୍ୟୁରୋ: ଅଧା ରହିଗଲା ଜଗା ଦର୍ଶନ । ପୁରୀ ଚକ୍ରତୀର୍ଥ ରୋଡ ଆରଟିଓ ସମ୍ମୁଖରେ ଦୁର୍ଘଟଣା ଘଟି ଚାଲିଯାଇଛି ନାବାଳକର ଜୀବନ । ନାବାଳକ ଜଣଙ୍କ ଦୋକାନକୁ ଯିବାବେଳେ ଦ୍ରୁତ ଗତିରେ ଆସୁଥିବା ଏକ ବୋଲେରୋ ତାଙ୍କୁ ଧକ୍କା ଦେଇଥିଲା । ଧକ୍କା ଦେଇଥିବା ଗାଡିରେ ON DUTY EAST COAST RAILWAY ଲେଖାଯାଇଥିଲା । ନାବାଳକୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l ମୃତ ନାବାଳକ ଜଣକ ହେଉଛନ୍ତି ଖୋର୍ଦ୍ଧା ବେଗୁନିଆ ଅଞ୍ଚଳର ସୂର୍ଯ୍ୟକାନ୍ତ ଦାସଙ୍କ ୪ବର୍ଷର ପୁଅ ଆଶୁ ଦାସ। ସ୍ଥାନୀୟ ପୋଲିସ ଦୁର୍ଘଟଣା ଘଟାଇଥିବା ଗାଡ଼ି ଡ୍ରାଇଭରକୁ ଅଟକ ରଖି ପଚରାଉଚରା କରୁଛି । ଶବ ବ୍ୟବଚ୍ଛେଦ ପରେ ପୁରୀ ରେଳଷ୍ଟେସନ ସମ୍ମୁଖରେ ମୃତଦେହ ରଖି ରାସ୍ତା ରୋକ କରିଛନ୍ତି ଲୋକେ l ଆଜି ମହାପ୍ରଭୁଙ୍କ ଦର୍ଶନ ପାଇଁ ଟ୍ରେନ୍ ରେ ପରିବାର ଲୋକଙ୍କ ସହ ପୁରୀ ଆସିଥିଲା ଆଶୁ । ମହାପ୍ରଭୁଙ୍କ ଦର୍ଶନ ପୂର୍ବରୁ ଆରଟିଓ ନିକଟରେ ଥିବା ତାଙ୍କ ବନ୍ଧୁଙ୍କ ଘରକୁ ପରିବାର ସହିତ ଆସିଥିଲା । ଜଣେ ସମ୍ପର୍କୀୟଙ୍କ ସହ ନାବାଳକ ଜଣକ କୋଲଡ୍ରିଙ୍କ ପାଇଁ ଯାଉଥିବା ବେଳେ ଦୁର୍ଘଟଣା ଘଟିଥିଲା । ତେବେ ଏ ନେଇ ରେଲୱେ କର୍ତ୍ତୃପକ୍ଷଙ୍କ କୌଣସି ପତିକ୍ରିୟା ମିଳିପାରି ନାହିଁ l
