ମୁମ୍ବାଇ: ବଲିଉଡ଼ ଅଭିନେତା ସୈଫ ଅଲ୍ଲୀ ଖାନଙ୍କୁ ଆକ୍ରମଣ ଘଟଣାରେ ମୁଖ୍ୟ ଅଭିଯୁକ୍ତକୁ ଗିରଫ ହୋଇଛି । ଏନେଇ ମୁମ୍ବାଇ ପୁଲିସ ରବିବାର ସକାଳୁ ଏକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛି ।
ଡିସିପି ଦୀକ୍ଷିତ୍ ଗଦାମ ମିଡିଆକୁ ସୂଚନା ଦେଇ କହିଛନ୍ତି, ସୈଫଙ୍କୁ ଆକ୍ରମଣ କରିଥିବା ମୁଖ୍ୟ ଅଭିଯୁକ୍ତକୁ ବାନ୍ଦ୍ରା ପୁଲିସ ଥାଣେରୁ ଗିରଫ କରିଛି । ଅଭିଯୁକ୍ତ ହେଉଛି ମହମ୍ମଦ ଶରୀଫୁଲ୍ ଇସଲାମ୍ ଶହଜାଦ । ସେ ବାଂଲାଦେଶୀ ବୋଲି ଅନୁମାନ କରୁଛି ପୁଲିସ । ହେଲେ ଏହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ପ୍ରାରମ୍ଭିକ ତଦନ୍ତ ଏବଂ ମିଳିଥିବା ସାକ୍ଷ୍ୟ ଆଧାରରେ ଅଭିଯୁକ୍ତ ବାଂଲାଦେଶୀ କି ନୁହେଁ ତାହା ଶୀଘ୍ର ଜଣାପଡ଼ିବ ବୋଲି ପୁଲିସ କହିଛି । ଏହାଛଡ଼ା ଅଭିଯୁକ୍ତର ଆଜି ମେଡିକାଲ ଟେଷ୍ଟ ହେବ ପରେ ତା’କୁ କୋର୍ଟରେ ଚାଲାଣ କରାଯିବ । ମୁଖ୍ୟ ଅଭିଯୁକ୍ତ ମହମ୍ମଦ ଶହଜାଦ ନିକଟରୁ କୌଣସି ପ୍ରକାର ବୈଧ ଭାରତୀୟ ପ୍ରମାଣପତ୍ର ମିଳିନାହିଁ । ପୁଲିସ ଏବେ ଅଭିଯୁକ୍ତକୁ ପଚରାଉଚରା କରୁଛି । ୫ରୁ ୬ ମାସ ହେଲା ମୁମ୍ବାଇକୁ ଆସିଥିଲା ଏବଂ ଏକ ହାଉସ୍ କିପିଂ ଏଜେନ୍ସିରେ କାମ କରୁଥିଲା । ବର୍ତ୍ତମାନ ସମୟରେ ତାଙ୍କ ନିକଟରେ କୌଣସି ସ୍ପଷ୍ଟ ସୂଚନା ନାହିଁ । ଚୋରି କରିବା ଉଦ୍ଦେଶ୍ୟରେ ଅଭିଯୁକ୍ତ ମହମ୍ମଦ ଶହଜାଦ ସୈଫଙ୍କ ଘରେ ପ୍ରବେଶ କରିଥିବା ଅନୁମାନ କରାଯାଉଛି । ଅଭିଯୁକ୍ତ ମହମ୍ମଦ ସୈଫ ଅଲ୍ଲୀଙ୍କ ଘରେ ପଶିଛି ବୋଲି ତା’କୁ ଜଣା ନ ଥିଲା । ଅଚାନକ ଅଭିନେତା ତା’ ସାମ୍ନାରେ ଆସିଯାଇଥିଲେ । ଏହାପରେ ସେ ଛୁରୀରେ ହମଲା କରି ଦେଇଥିଲା ବୋଲି ପୁଲିସକୁ କହିଛି । ଅଭିଯୁକ୍ତ ବିରୋଧ ପୂର୍ବରୁ କୌଣସି ଅପରାଧିକ ମାମଲା ନାହିଁ । ମହମ୍ମଦ ଶରୀଫୁଲ୍ ଇସଲାମ୍ ଶହଜାଦ ବାବଦରେ ପୁଲିସ ଅଧିକ ତଥ୍ୟ ସଂଗ୍ରହ କରୁଛି ।
